ញូវដេលី៖ ប្រធានាធិបតីអាម៉េរិក លោក ដូណាល់ ត្រាំ (Donald Trump) បាននិយាយកាលពីថ្ងៃទី៣០ ខែកក្កដាថា សហរដ្ឋអាម៉េរិក នឹងដាក់ពន្ធ២៥ភាគរយ លើទំនិញឥណ្ឌា ចាប់ពីថ្ងៃទី១ ខែសីហា ឆ្នាំ២០២៥ ដោយលើកឡើងពីពន្ធខ្ពស់របស់ទីក្រុងញូវដែលី និងរបាំងពាណិជ្ជកម្មមិនមែនរូបិយវត្ថុដ៏តឹងរឹង។
ទីភ្នាក់ងារព័ត៌មានរ៉យទ័ររបស់អង់គ្លេស បានផ្សាយថា បញ្ហាសំខាន់ៗ ដែលទំនងជាបានបង្អាក់កិច្ចចរចាពាណិជ្ជកម្មរវាងសហរដ្ឋអាម៉េរិក ដែលជាប្រទេសសេដ្ឋកិច្ចធំជាងគេរបស់ពិភពលោក និងប្រទេសឥណ្ឌាដែលធំជាងគេទីប្រាំរបស់ខ្លួន។
ប្រទេសឥណ្ឌាបានទប់ទល់នឹងការទាមទាររបស់សហរដ្ឋអាម៉េរិកក្នុងការបើកទីផ្សារកសិកម្ម និងទឹកដោះគោរបស់ខ្លួន ដោយនិយាយថា វិធានការបែបនេះនឹងប៉ះពាល់ដល់កសិករក្រីក្ររាប់លាននាក់នៅក្នុងប្រទេសឥណ្ឌា។
ការកាត់បន្ថយពន្ធលើពោត សណ្តែកសៀង ស្រូវសាលី និងអេតាណុល មិនមានរាប់បញ្ចូលឡើយ ដោយមន្ត្រីឥណ្ឌាបានលើកឡើងពីហានិភ័យពីផលិតផលកសិកម្ម ដែលឧបត្ថម្ភធនរបស់សហរដ្ឋអាម៉េរិក។
ក្រុមហ៊ុនផលិតរថយន្តក្នុងស្រុក ក្រុមហ៊ុនឱសថ និងឧស្សាហកម្មខ្នាតតូច ក៏បានបញ្ចុះបញ្ចូលឱ្យមានការបើកជាបណ្តើរៗផងដែរ ដោយខ្លាចមានការរំខានពីការនាំចូលពីសហរដ្ឋអាម៉េរិក។
បើតាមរបាយការណ៍របស់សេតវិមាន បានឱ្យដឹងថា ប្រទេសឥណ្ឌាដាក់ពន្ធជាមធ្យម ៣៩ភាគរយ លើទំនិញកសិកម្មនាំចូល បើធៀបនឹងប្រាំភាគរយ នៅសហរដ្ឋអាម៉េរិក ជាមួយនឹងពន្ធមួយចំនួនខ្ពស់រហូតដល់៥០ភាគរយ។
រដ្ឋបាលរបស់លោក ដូណាល់ ត្រាំ បានដាក់ពន្ធម្តងហើយម្តងទៀត នូវពន្ធគយទាំងនេះថា ជាឧបសគ្គដ៏សំខាន់ចំពោះទំនាក់ទំនងពាណិជ្ជកម្មកាន់តែស៊ីជម្រៅជាមួយឥណ្ឌា។
ទីក្រុងវ៉ាស៊ីនតោនកំពុងជំរុញឱ្យមានលទ្ធភាពកាន់តែប្រសើរឡើងទៅកាន់ទីផ្សាររបស់ប្រទេសឥណ្ឌា សម្រាប់វិស័យកសិកម្ម អេតាណុល ទឹកដោះគោ ភេសជ្ជៈមានជាតិអាល់កុល យានយន្ត ឱសថ និងឧបករណ៍វេជ្ជសាស្ត្រ។ វាក៏ចង់ឱ្យប្រទេសឥណ្ឌាកាត់បន្ថយរបាំងមិនមែនពន្ធគយ និងកំណែទម្រង់ច្បាប់ស្តីពីប៉ាតង់ ពាណិជ្ជកម្មឌីជីថល និងលំហូរទិន្នន័យ។
ទោះបីជាមានការផ្តល់ជូននូវការកាត់បន្ថយពន្ធមានកម្រិត និងការជំរុញការនាំចូលទំនិញថាមពល និងការពារជាតិរបស់សហរដ្ឋអាម៉េរិកក៏ដោយ ក៏ឥណ្ឌានិយាយថា ខ្លួននៅតែរង់ចាំសំណើច្បាស់លាស់ពីទីក្រុងវ៉ាស៊ីនតោន។ ក្រុមមន្ត្រីបានលើកឡើងពីការផ្លាស់ប្តូរពាណិជ្ជកម្ម ដែលមិនអាចទាយទុកជាមុនបានរបស់លោក ដូណាល់ ត្រាំ ជាការព្រួយបារម្ភ។
អ្នកនាំចេញរបស់ឥណ្ឌានៅតែមិនសប្បាយចិត្តចំពោះការដំឡើងពន្ធរបស់សហរដ្ឋអាម៉េរិកលើការនាំចូលរបស់ឥណ្ឌា ដោយពន្ធមូលដ្ឋានចំនួន១០ភាគរយ, រហូតដល់៥០0ភាគរយលើដែកថែប និងអាលុយមីញ៉ូម ២៥ភាគរយលើរថយន្ត ហើយឥឡូវនេ២៥ភាគរយ លើគ្រប់ទំនិញតែម្តង។
មន្ត្រីប្រទេសឥណ្ឌាមានទំនុកចិត្តលើកិច្ចព្រមព្រៀងមួយ ដោយរំពឹងថា សហរដ្ឋអាម៉េរិក នឹងអនុគ្រោះពាណិជ្ជកម្មកាន់តែស៊ីជម្រៅជាមួយដៃគូពាណិជ្ជកម្មដ៏ធំបំផុតមួយរបស់ខ្លួន។
នាយករដ្ឋមន្ត្រីឥណ្ឌា លោក ណារិន្ត្រា ម៉ូឌី (Narendra Modi) និងលោក ដូណាល់ ត្រាំ មានគោលបំណងចុះហត្ថលេខាលើកិច្ចព្រមព្រៀងដំណាក់កាលទីមួយ នៅរដូវស្លឹកឈើជ្រុះឆ្នាំ២០២៥ ដោយកំណត់គោលដៅពាណិជ្ជកម្មទ្វេភាគីចំនួន៥០០ពាន់លានដុល្លារ នៅឆ្នាំ២០៣០ ឱ្យកើនឡើងពី១៩១ពាន់លានដុល្លារ កាលពីឆ្នាំ២០២៤។
ការនាំចេញទំនិញរបស់ឥណ្ឌាទៅកាន់សហរដ្ឋអាម៉េរិក បានកើនឡើងដល់៨៧ពាន់លានដុល្លារក្នុងឆ្នាំ២០២៤ ដោយមានត្បូង និងគ្រឿងអលង្ការ មានទឹកប្រាក់ចំនួន៨,៥ពាន់លានដុល្លារ ឱសថមានទឹកប្រាក់ចំនួន៨០ ០០លានដុល្លារ និងគីមីឥន្ធនៈ មានទឹកប្រាក់ចំនួន៤ ០០០លានដុល្លារ។
ចំណែកការនាំចេញផលិតកម្មរបស់សហរដ្ឋអាម៉េរិកទៅកាន់ប្រទេសឥណ្ឌាវិញ ដែលមានតម្លៃជិត៤២ពាន់លានដុល្លារ ក្នុងឆ្នាំ២០២៤ ប្រឈមនឹងពន្ធខ្ពស់ចាប់ពីប្រាំពីរភាគរយ លើផលិតផលឈើ និងគ្រឿងម៉ាស៊ីនរហូតដល់ពី១៥ភាគរយ ទៅ២០ភាគរយ លើស្បែកជើង និងឧបករណ៍ដឹកជញ្ជូន និងលើម្ហូបអាហារជិត៦៨ភាគរយ៕
