ហ្សាការតា៖ រដ្ឋាភិបាលឥណ្ឌូនេស៊ី បានលុបចោលកូតានាំចូលគោរស់ពីប្រទេសអូស្ត្រាលី ដើម្បីធានាបាននូវការផ្គត់ផ្គង់សាច់គោ និងទឹកដោះគោ ដើម្បីពង្រឹងសន្តិសុខស្បៀងនៅក្នុងប្រទេស។
រដ្ឋមន្ត្រីសម្របសម្រួលស្បៀងអាហារឥណ្ឌូណេស៊ី បានប្រកាសអំពីគោលការណ៍លុបចោលកូតានេះ ក្នុងអំឡុងពេលនៃការប្រារព្ធទិវាទឹកដោះគោ ឆ្នាំ២០២៥ នៅទីក្រុងហ្សាកាតា កាលពីចុងសប្តាហ៍មុន។
លោកបានបន្តថា ឥឡូវនេះអ្នកនាំចូលត្រូវបានអនុញ្ញាតឱ្យនាំគោរស់ដោយគ្មានកំណត់កូតាទៀតទេ ក្នុងគោលបំណងដើម្បីជួយដល់ឧស្សាហកម្មបសុសត្វ និងបំពេញតម្រូវការសាធារណៈចំពោះសាច់គោ។
លោករដ្ឋមន្ត្រីបានបន្ថែមថា តាមរយៈការលុបចោលចំនួនកូតានាំចូលគោរស់នេះ រដ្ឋាភិបាលឥណ្ឌូណេស៊ីមានគោលបំណងផ្តល់ឱកាសដល់ឧស្សាហកម្មកែច្នៃទឹកដោះគោជាតិ ដើម្បីបង្កើនបរិមាណផលិតកម្ម កែលម្អគុណភាពផលិតផល និងបង្កើនភាពធន់នៃខ្សែសង្វាក់ផ្គត់ផ្គង់។
ទោះបីជាយ៉ាងណាក៏ដោយ លោករដ្ឋមន្ត្រីសម្របសម្រួលស្បៀងអាហារឥណ្ឌូណេស៊ី មិនបានផ្តល់ព័ត៌មានលម្អិតផ្នែកបច្ចេកទេសអំពីគោលការណ៍ថ្មីនេះទេ។
ចំណែកអនុរដ្ឋមន្ត្រីក្រសួងកសិកម្មឥណ្ឌូណេស៊ីវិញ ធ្លាប់បានថ្លែងថា ប្រទេសឥណ្ឌូណេស៊ីគ្រោងនឹងនាំចូលសត្វគោរស់ចំនួនពីរលានក្បាលក្នុងរយៈពេលប្រាំឆ្នាំខាងមុខ រួមទាំងគោយកទឹកដោះគោចំនួន១,២លានក្បាលផងដែរ។
លោកបញ្ជាក់ថា ការនាំចូលគោរស់ត្រូវបានរដ្ឋាភិបាលចាត់ទុកជាការវិនិយោគ ហើយនឹងមិនប្រើលុយពីក្នុងកញ្ចប់ថវិការបស់រដ្ឋឡើយ។
លោកបានបន្ថែមថា រដ្ឋាភិបាលឥណ្ឌូណេស៊ី កំពុងលើកទឹកចិត្តសហគ្រិនក្នុងស្រុក សហគមន៍កសិករ រូបវន្តបុគ្គល និងក្រុមហ៊ុនបរទេស ឱ្យដាក់ទុនវិនិយោគលើការបង្កាត់ពូជសត្វគោ និងចិញ្ចឹមគោនៅក្នុងប្រទេសឥណ្ឌូនេស៊ី។
គិតត្រឹមខែមីនា ឆ្នាំ២០២៥នេះ ពូជមេគោយកទឹកដោះចំនួន១ ២៥០ក្បាល ត្រូវបាននាំចូលពីប្រទេសអូស្ត្រាលី បានមកដល់កោះជ្វា ភាគខាងកើតឥណ្ឌូណេស៊ី តាមរយៈកិច្ចខិតខំប្រឹងប្រែងរបស់រដ្ឋាភិបាល ដើម្បីជំរុញការវិនិយោគក្នុងឧស្សាហកម្មផលិតទឹកដោះគោជាតិ។
កាលពីពេលថ្មីៗកន្លងមកនេះ រដ្ឋាភិបាលឥណ្ឌូណេស៊ី បានពិនិត្យឡើងវិញអំពីអាជ្ញាបណ្ណនាំចូលប្រចាំឆ្នាំសម្រាប់ចំណីអាហារសំខាន់ៗមួយចំនួន ដូចជាសាច់គោបង្កក គោរស់ អង្ករ ពោត និងអំបិល ហើយកែសម្រួលចំនួនកូតាផ្គត់ផ្គង់ និងតម្រូវការលើទីផ្សារ។
រដ្ឋមន្ត្រីសម្របសម្រួលស្បៀងអាហាររបស់ប្រទេសឥណ្ឌូនេស៊ី បានមានប្រសាសន៍ទៀតថា រដ្ឋាភិបាលឥណ្ឌូនេស៊ីបានសម្រេចចិត្តបង្កើនកូតាសម្រាប់គោចិញ្ចឹមយកសាច់ ដោយប្រាប់ប្រព័ន្ធផ្សព្វផ្សាយថា ការចិញ្ចឹមគោរស់ជួយពង្រឹងសេដ្ឋកិច្ចយ៉ាងច្រើនព្រោះវិស័យចិញ្ចឹមគោនេះផ្តល់អត្ថប្រយោជន៍ដល់អ្នកចិញ្ចឹមក្នុងស្រុកតែម្តង។
លោកបានមានប្រសាសន៍ថា ផ្ទុយទៅវិញ ការនាំចូលសាច់គោបង្កកមិនបានផ្តល់តម្លៃសេដ្ឋកិច្ចបន្ថែមទេ ព្រោះសាច់គោគ្រាន់តែនាំចូលមក ហើយធ្វើម្ហូបបរិភោគតែម្តង ដោយគ្មានបង្ហកើតការងារដល់ផលិតកម្មក្នុងស្រុកឡើយ។
លោកបានសង្កត់ធ្ងន់ថា រដ្ឋាភិបាលមានជម្រើស គឺប្រសិនបើយើងជ្រើសរើសយកការចិញ្ចឹមគោបំប៉នយកសាច់ នោះការនាំចូលសាច់គោកង្កកត្រូវតែគ្រប់គ្រងឱ្យបាន បើមិនដូច្នេះទេកសិករចិញ្ចឹមគោបំប៉នយកសាច់នឹងក្ស័យធនជាក់ជាមិនខាន។
ក្រសួងកសិកម្មឥណ្ឌូណេស៊ី ដំបូងបានកំណត់កូតានាំចូលសាច់គោបង្កកប្រចាំឆ្នាំ ចំនួន២០ម៉ឺនតោន ប៉ុន្តែរហូតមកដល់ពេលនេះ ចំនួនកូតានាំចូលត្រូវបានកាត់ពាក់បន្ថយកណ្តាលមកនៅត្រឹម១០ម៉ឺនតោនប៉ុណ្ណោះ។
ប្រទេសអូស្ត្រាលីបាននាំចេញគោរស់ចំនួន១៥៥ ៤០០ក្បាល ចូលមកកាន់ប្រទេសឥណ្ឌូនេស៊ី ក្នុងរយៈពេលបួនខែដំបូងនៃឆ្នាំ២០២៥ ដែលមានកំណើនបន្តិចនៃមធ្យមភាគសម្រាប់រយៈពេលប្រាំឆ្នាំ ចាប់ពីខែមករា ដល់ខែមេសា ដែលមានចំនួន១២៣ ៨៣៨ក្បាល។
ការនាំចេញគោរស់របស់អូស្ត្រាលីទៅកាន់ប្រទេសឥណ្ឌូណេស៊ី ជាមធ្យមក្នុងមួយឆ្នាំៗ មានចំនួន៤២០ ០០០ ក្បាលក្នុងរយៈពេលប្រាំឆ្នាំចុងក្រោយនេះ។
ចំណែកទំហំទឹកប្រាក់នៃការនាំចេញគោរស់ និងសាច់គោបង្កករបស់អូស្ត្រាលីទៅកាន់ប្រទេសឥណ្ឌូនេស៊ី ក្នុងឆ្នាំ២០២៤ មានចំនួនជិត៩០០លានដុល្លារ៕
