កូឡាឡាំពួរ៖អាជ្ញាធរម៉ាឡេស៊ី កំពុងចាប់ផ្តើមប្រតិបត្តិការដើម្បីទប់ស្កាត់សកម្មភាពលក់ក្លែងបន្លំនៅតាមទីផ្សារ និងលក់ផ្លែទុរេននាំចូលពីតំបន់ផ្សេងៗ ឬទុរេននាំចូលពីប្រទេសថៃ បន្លំថា ជាពូជទុរេនដ៏ល្បីល្បាញរបស់ប្រទេសម៉ាឡេស៊ី ដាំនៅក្នុងរដ្ឋប៉េណាំង។
ទីភ្នាក់ងារព័ត៌មានរបស់ម៉ាឡេស៊ី ប៊ើណាម៉ា បានធ្វើសេចក្តីរាយការណ៍ថា ប្រធានគណៈកម្មាធិការអភិវឌ្ឍន៍កសិកម្ម សន្តិសុខស្បៀង និងសហគមន៍ នៅក្នុងរដ្ឋប៉េណាំងនៃរដ្ឋ បានមានប្រសាសន៍កាលពីដើមសប្តាហ៍នេះថា ប្រតិបត្តិការរួមគ្នានេះនឹងមានការចូលរួមពីកម្លាំងនគរបាលសហការជាមួយនាយកដ្ឋានកសិកម្ម និងអាជ្ញាធរទីផ្សារកសិកម្មសហព័ន្ធរបស់ប្រទេសម៉ាឡេស៊ី។
លោកបាននិយាយថា «យើងបានរកឃើញចំណុចក្តៅចំនួនពីបីកន្លែង ដែលរក្សាទុកផ្លែទុរេននាំចូលតាមរថយន្តពីប្រទេសថៃ ប៉ុន្តែបានបន្លំលក់ជាផលិតផលក្នុងស្រុក។ ឥឡូវនេះអាជ្ញាធរកំពុងរង់ចាំពេលវេលាវេលាសមស្របដើម្បីឆ្មក់ចូលឆេកឆេតែម្តង»។
លោកពន្យល់ថា ការបង្ក្រាបនេះធ្វើឡើងដើម្បីឆ្លើយតបតាមបណ្តឹងរបស់សាធារណជន និងដំណើរត្រួតពិនិត្យជាបន្តបន្ទាប់។ ថ្មីៗនេះ ភ្នាក់ងារទប់ស្កាត់បទល្មើសបានដាក់បារ៉ាស់បិទផ្លូវ ដើម្បីស្ទាក់ចាប់ផលិតផលកសិកម្មផ្សេងៗ ដែលមិនអនុលោមតាមច្បាប់ ជាពិសេសពិនិត្យមើលការដឹកជញ្ជូនផ្លែទុរេនតែម្តង។
លោកប្រធានគណៈកម្មាធិការ បានកត់សម្គាល់ថា ផ្លែទុរេនមកពីតំបន់ផ្សេងទៀតមិនត្រូវបានហាមឃាត់ទេ ប៉ុន្តែមិនត្រូវភ្លេចពូជទុរេនដ៏ល្បីល្បាញ ដាំនៅក្នុងតំបន់បាលីក ពូឡៅ (Balik Pulau) នោះទេ។
ដើម្បីការពារផ្លែធុរេនរបស់ខ្លួន អាជ្ញាធររដ្ឋប៉េណាំង កាលពីដើមខែមិថុនា ឆ្នាំ២០២៥នេះ បានដាក់ឱ្យដំណើរការប្រព័ន្ធ “តាមដាន និងតាមចាប់” ដែលដាក់ស្លាកផ្លែទុរេននីមួយៗដោយមានបង់លេខ QR កូដ ដែលនៅពេលស្កេនរួចភ្លាមចេញប្រវត្តិពូជផ្លែទុរេន រួមទាំងអាសយដ្ឋានទីតាំងកសិដ្ឋានដើមដាំដំណាំនេះផងដែរ។
ប្រព័ន្ធតាមដាន និងតាមចាប់នេះ ត្រួតពិនិត្យគ្រប់ជំហាននៃសង្វាក់ផ្គត់ផ្គង់ផ្លែទុរេន ដោយមានលេខកូដសម្គាល់ និងមានវិញ្ញាបនបត្រសម្គាល់ចម្ការនីមួយៗ ហើយត្រូវបានទទួលស្គាល់ជាផ្លូវការដោយអាជ្ញាធររដ្ឋ និងអាជ្ញាធរសហព័ន្ធរបស់ម៉ាឡេស៊ី។
លោកបានមានប្រសាសន៍ថា “រាល់ផ្លែទុរេនទាំងអស់ត្រូវដាក់ស្លាកដោយលេខកូដ QR ដែលអាចឱ្យអ្នកប្រើប្រាស់ផ្ទៀងផ្ទាត់ប្រភពដើមរបស់វា ពីកសិដ្ឋានរហូតដល់លើតុ”។
ចំណែកសារព័ត៌មាន ឌឹស្តា របស់ម៉ាឡេស៊ី បានរាយការណ៍កាលពីដើមខែមិថុនានេះថា កសិករម៉ាឡេស៊ីប្រមាណ៦០នាក់បានប្តេជ្ញាប្រើប្រាស់ប្រព័ន្ធថ្មីនេះ ខណៈពេលសហគ្រិនខ្នាតធំចំនួន២០បានចុះឈ្មោះប្រើប្រព័ន្ធថ្មីនេះរួចហើយ។
តំបន់ដាំដំណាំទុរេនឈ្មោះ បាលី ពូឡៅ ស្ថិតនៅក្នុងរដ្ឋប៉េណាំង ដែលល្បីល្បាញដោយសារផ្លែទុរេន ពេលនេះបានក្លាយជាគោលដៅទេសចរណ៍ដ៏ពេញនិយមមួយនៅក្នុងទីក្រុង ប៉េណាំង ដែលជាតំបន់ផលិតផ្លែទុរេនដ៏សំខាន់បំផុតរបស់ម៉ាឡេ៊ី។ ពូជទុរេនដាំនៅក្នុងតំបន់បាលីក ពូឡៅ គឺជាផ្លែទុរេនពេញនិយមជាងគេនៅក្នុងប្រទេសម៉ាឡេស៊ី រួមជាមួយនឹង មូសាងឃីង (Musang King) រ៉េតប្រោន (Red Prawn) និងពូជទុរេន ប្លេកថន (Black Thorn)។
កាលពីដើមខែមិថុនា ឆ្នាំ២០២៥នេះ ប្រព័ន្ធផ្សព្វផ្សាយក្នុងស្រុកបានរាយការណ៍ពីការកើនឡើងនៃចំនួនអ្នកទេសចរនៅទីក្រុងប៉េណាំង ចំពេលរដូវប្រមូលផលផ្លែទុរេន និងចំថ្ងៃឈប់សម្រាករបស់សាលារៀននៅក្នុងប្រទេសម៉ាឡេស៊ី។ សណ្ឋាគារនៅទូទាំងទីក្រុងប៉េណាំង ស្ទើរតែគ្មានសល់បន្ទប់ ហើយបង្កជាការកកស្ទះចរាចរណ៍ ជាពិសេសនៅជុំវិញកន្លែងតាំងពិព័រណ៍ប្រកួតប្រជែងផ្លែទុរេន។
ផ្លែទុរេនលើសពីការទទួលទានក្នុងស្រុក ប្រទេសម៉ាឡេស៊ីក៏បាននាំចេញផ្លែទុរេនទៅកាន់ទីផ្សារអន្តរជាតិ ដូចជាប្រទេសចិនជាដើម ហើយមានគម្រោងពង្រីកទំហំទឹកប្រាក់នាំចេញរហូតដល់១,៨ពាន់លានរីងហ្គីត ឬស្មើនឹង៤២៥លានដុល្លារ នៅត្រឹមឆ្នាំ២០៣០៕
