រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅព្រឹកថ្ងៃទី១ ខែមិថុនា ឆ្នាំ២០២៥នេះ ក្រុមការងារតំណាងធនាគារ ARDB បានចូលរួមគាំទ្រកម្មវិធីរត់ដើម្បីលើកកម្ពស់ចំណេះដឹងផ្នែកហិរញ្ញវត្ថុនៅកម្ពុជា។
កម្មវិធីនេះ រៀបចំនៅទីក្រុងរណបជ្រោយចង្វារ ដែលគាំទ្រដោយសមាគមធនគារនៅកម្ពុជា និងសមាគមធានារ៉ាប់រងកម្ពុជា។
នៅក្នុងឱកាសនេះ, លោក រ័ត្ន សោភ័ណ ប្រធានសមាគមធនាគារនៅកម្ពុជា បានលើកឡើងថា កម្មវិធីនេះកម្មវិធីរត់ដើម្បីលើកកម្ពស់ចំណេះដឹងផ្នែកហិរញ្ញវត្ថុនៅកម្ពុជា មិនមែនគ្រាន់តែជាការរត់ដើម្បីតែសុខភាពប៉ុណ្ណោះទេ ប៉ុន្តែជាការចូលរួមលើកកម្ពស់ចំណេះដឹងផ្នែកហិរញ្ញវត្ថុដល់ប្រជាជនកម្ពុជា ក្រោមមូលនិធិ និងការឧបត្ថម្ភ ដែលប្រមូលបាននឹងយកទៅផលិតជាវីដេអូអប់រំស្តីពីចំណេះដឹងផ្នែកហិរញ្ញវត្ថុ សម្រាប់គាំទ្រ និងបង្កើនសមត្ថភាពគ្រប់គ្រងហិរញ្ញវត្ថុ និងការការពារ សម្រាប់ប្រជាជនកម្ពុជា។
លោកបន្តថា ចំណេះដឹងអំពីហិរញ្ញវត្ថុ គឺជាបំណិនជីវិតរបស់បុគ្គលគ្រប់រូប និងជាមូលដ្ឋានសម្រាប់សេដ្ឋកិច្ចដ៏រឹងមាំ។ ចំណេះដឹងផ្នែកហិរញ្ញវត្ថុអាចជួយឱ្យបុគ្គលម្នាក់ៗអាចចាត់ចែងសាច់ប្រាក់បានយ៉ាងច្បាស់លាស់ សុវត្ថិភាព ព្រមទាំងមានការសម្រេចចិត្តបានត្រឹមត្រូវរាល់ការប្រើប្រាស់លុយ ចាត់ចែងលុយ ការប្រើប្រាស់ឥណទានពីធនាគារ ការសន្សំ ការប្រើប្រាស់សេវាធនារ៉ាប់រង និងចំណាយប្រកបដោយភាពឆ្លាតវៃ និងការសម្រេចចិត្តផ្នែកវិនិយោគប្រកបដោយការទទួលខុសត្រូវ ព្រមទាំងដើម្បីរៀបចំអនាគតឱ្យបានល្អប្រសើរ។
លោកបានលើកឡើងថា “ទោះជាប្រទេសយើងមានការរីកចម្រើនលើសេវាហិរញ្ញវត្ថុក៏ដោយ ក៏ប៉ុន្តែប្រជាពលរដ្ឋជាច្រើននៅតែខ្វះខាតចំណេះដឹងផ្នែកហិរញ្ញវត្ថុ។ ដូច្នេះកម្មវិធីនាព្រឹកនេះពិតជាមានន័យសំខាន់បំផុតសម្រាប់យើងទាំងអស់គ្នាក្នុងការចូលរួមជំរុញ និងលើកកម្ពស់ចំណេះដឹងផ្នែកហិរញ្ញវត្ថុដល់ប្រជាជនកម្ពុជារបស់យើង”។
សមាគមធនាគារនៅកម្ពុជា និងសមាជិកធនាគារទាំងអស់ ចាត់ទុកការលើកម្ពស់ចំណេះដឹងហិរញ្ញវត្ថុជាអាទិភាពស្នូលរបស់ខ្លួន និងចូលរួមគ្រប់សកម្មភាពក្នុងការផ្សព្វផ្សាយចំណេះដឹងហិរញ្ញវត្ថុ និងការលើកស្ទួយទំនុកចិត្តរបស់សាធារណជនចំពោះប្រព័ន្ធហិរញ្ញវត្ថុ ជាក់ស្តែងក្នុងកម្មវិធីនាព្រឹកនេះ។ ការរួមគ្នារវាងសមាគមធនាគារ សមាគមធានារ៉ាប់រង គ្រឹះស្ថានធនាគារ ក្រុមហ៊ុនធានារ៉ាប់រង ស្ថាប័នហិរញ្ញវត្ថុទាំងអស់ និងសាធារណជន គឺជាការចូលរួមដ៏មានសារៈសំខាន់ក្នុងការបង្កើតប្រព័ន្ធហិរញ្ញវត្ថុប្រកបដោយភាពរឹងមាំ បរិយាបន្ន និងចីរភាព។
កញ្ញា ច័ន្ទ លាភា និស្សិតរៀននៅវិទ្យាស្ថាន Cam Ed និងវិទ្យាស្ថានបច្ចេកទេសធនគារ, អ្នកស្រី គឹម សុវណ្ណារី ប្រធានរដ្ឋបាល និងហិរញ្ញវត្ថុនៃក្រុមហ៊ុនមេធាវីខ្មែរអប្សារ៉ា បានចាត់ទុក ព្រឹត្តិការណ៍រត់ដើម្បីលើកកម្ពស់ចំណេះដឹងហិរញ្ញវត្ថុនៅកម្ពុជា ពិតជាមានសារសំខាន់សម្រាប់អ្នកចូលរួម ពិសេសអ្នកកំពុងសិក្សា ឬធ្វើការលើមុខជំនាញផ្នែកហិរញ្ញវត្ថុ ។ លើសពីនេះវាជួយឱ្យអ្នកចូលរួមទាំងអស់ បានពង្រឹងសុខភាពរាងកាយឱ្យមាំមួនល្អ ហើយចង់ឃើញស្ថាប័នពាក់ពាក់រៀបចំកម្មវិធីបែបនេះឱ្យបានរៀងរាល់ឆ្នាំផងដែរ៕
