ភ្នំពេញ៖ ក្រុមហ៊ុន អេមរុរ៉ាយស៍ កាលពីពេលថ្មីៗកន្លងមកនេះ បាននាំយកអង្ករសរីរាង្គកម្ពុជាទៅចូលរួមពិព័រណ៍អាហារធម្មជាតិ ឆ្នាំ២០២៥ រៀបចំឡើងនៅក្នុងប្រទេសអង់គ្លេស ដើម្បីទាក់ទាញការគាំទ្រក្នុងការនាំយកផលិតផលកសិកម្មជាច្រើនរបស់កម្ពុជាទៅកាន់ចក្រភពអង់គ្លេស។
ក្រុមហ៊ុន អេមរុរ៉ាយស៍ គឺជាក្រុមហ៊ុនមួយក្នុងចំណោមក្រុមហ៊ុនប្រាំមួយរបស់កម្ពុជា ដែលទទួលបានការឧបត្ថម្ភគាំទ្រពីក្រសួងពាណិជ្ជកម្មចក្រភពអង៉ក្លេស និងរៀបចំដោយក្រុមប្រឹក្សាពាណិជ្ជកម្មអន្តរជាតិ។
នៅក្នុងឆ្នាំ២០២៥ ក្រុមហ៊ុន អេមរុរ៉ាយស៍ និងក្រុមហ៊ុនបុត្រសម្ព័ន្ធ សាជីវកម្មសហគមន៍កសិកម្មកម្ពុជា បានបន្តអនុវត្តការងាររបស់ខ្លួនស្តីពីការជំរុញឱ្យកសិករចាប់ផ្តើមអនុវត្តនូវនវានុវត្តន៍ថ្មីឆ្ពោះទៅកាន់ការបំភាយកាបូនទាប និងកសិកម្មសរីរាង្គកកើតឡើងវិញ ដោយរួមជាមួយសហគមន៍កសិកម្មចំនួន៦ ដែលមានកសិករសរុបប្រមាណ១.៦០០នាក់ ស្ថិតក្នុងស្រុកកោះញែក ខេត្តមណ្ឌលគិរី។
តាមរយៈនវានុវត្តន៍ថ្មីនេះ ក្រុមហ៊ុនបានជំរុញឱ្យកសិករផ្លាស់ប្តូរពូជស្រូវ ដែលជាប្រភេទពូជធន់នឹងការប្រែប្រួលអាកាសធាតុ និងមានតម្រូវការទីផ្សារខ្ពស់ ហើយស្របតាមគោលនយោបាយរបស់រាជរដ្ឋាភិបាល។ ពូជស្រូវទាំងនោះមានដូចជា ពូជស្រូវសែនក្រអូប ពូជនាងអុក និងពូជនាងអំជាដើម។
មិនត្រឹមតែប៉ុណ្ណោះ ដើម្បីចូលរួមកែលម្អសុខភាពដី ក្រុមហ៊ុនក៏បានផ្តល់នូវប្រភេទជីធ្យូងអង្កាម ប្រមាណ៦០តោន និងដំណាំគម្របដី រួមទាំងផ្តល់ជូននូវឧបករណ៍កៀរពង្រាបដីដោយប្រព័ន្ធឡាស៊ែរ (Land Leveling Control by Laser System) ដែលជាផ្នែកមួយដ៏សំខាន់ក្នុងការគ្រប់គ្រងទឹក ការគ្រប់គ្រងសារធាតុចិញ្ចឹមសម្រាប់ដី និងការជួយបង្កើននូវទិន្នផល ដើម្បីកាត់បន្ថយចំណាយលើផលិតកម្មដំណាំស្រូវ។
ព្រមជាមួយគ្នានេះដែរ ក្រុមហ៊ុន ក៏បានចូលរួមលើកកម្ពស់ជីវភាពរបស់ប្រជាកសិករនៅតំបន់់ដាច់ស្រយាល ជាពិសេសបងប្អូនជនជាតិដើមភាគតិច ដែលខិតខំផលិត និងអនុលោមតាមស្តង់ដារសរីរាង្គ ស្តង់ដារកសិកម្មសរីរាង្គកកើតឡើងវិញ និងស្តង់ដារដាំដុះស្រូវប្រកបដោយនិរន្តរភាព ដើម្បីចូលរួមថែរក្សាបរិស្ថាន និងលើកកម្ពស់ការអភិវឌ្ឍសេដ្ឋកិច្ចសង្គមមូលដ្ឋាន។
សូមបញ្ជាក់ផងដែរថា សមិទ្ធផលសម្រេចបានសំខាន់ៗក្នុងឆ្នាំ២០២៤ កន្លងទៅនេះ ក្រុមហ៊ុនអេមរុរ៉ាយស៍ និងក្រុមហ៊ុនបុត្រសម្ព័ន្ធ បានដាក់សម្ពោធជាផ្លូវការនូវឃ្លាំងស្តុកស្រូវ និងឡសម្ងួតស្រូវ លើផ្ទៃដី១២ហិកតា និងបានប្រមូលទិញស្រូវសរីរាង្គពីកសិករ ចំនួន១.៤៥០តោន នៅក្នុងស្រុកកោះញែក ខេត្តមណ្ឌលគិរី៕
