ទីក្រុងម៉ានីល៖ ប្រទេសហ្វីលីពីន ដែលជាប្រទេសនាំចូលអង្ករច្រើនជាងគេបំផុតលើពិភពលោក កំពុងតែសម្លឹងមើលទីផ្សារអង្ករផ្សេងទៀត ដោយកាត់បន្ថយការនាំចូលអង្ករពីប្រទេសវៀតណាម ដើម្បីធានាស្ថិរភាពនៃការផ្គត់ផ្គង់ និងរក្សាតម្លៃប្រកួតប្រជែងនៅក្នុងប្រទេស។
យោងតាមសារព័ត៌មាន ប្លូមប៊ើក (Bloomberg) បានដកស្រង់សម្តីរដ្ឋមន្ត្រីក្រសួងកសិកម្មហ្វីលីពីន លោក ហ្វ្រង់ស៊ីស្កូ ធៀវ ឡួរ៉ែល (Francisco Tiu Laurel) ដែលបាននិយាយនៅក្នុងបទសម្ភាសន៍មួយ កាលពីចុងសប្តាហ៍មុនថា ក្រសួងកសិកម្មកំពុងតែពិភាក្សាជាមួយអ្នកនាំចូលអង្ករ ដើម្បីពិចារណារកទិញអង្ករពីប្រទេសផ្សេង ដូចជាប្រទេសកម្ពុជា ឥណ្ឌា ប៉ាគីស្ថាន និងប្រទេសភូមា។
លោករដ្ឋមន្ត្រីកសិកម្មបានបញ្ជាក់បន្ថែមថា ព្រមជាមួយគ្នានេះដែរ ក៏អាចនឹងមានកិច្ចព្រមព្រៀងជាមួយប្រទេសឥណ្ឌូណេស៊ី និងប្រទេសថៃ ដើម្បីនាំចូលអង្ករ។
លោកបានមានប្រសាសន៍ថា ប្រទេសហ្វីលីពីនកំពុងតែព្យាយាមរកប្រភពថ្មី ដើម្បីរក្សាកម្រិតសើ្មភាពគ្នា។ ប្រទេសវៀតណាម គឺជាអ្នកផ្គត់ផ្គង់អង្ករគួរឱ្យទុកចិត្តបំផុត ប៉ុន្តែការពិត ការនាំចេញអង្កររបស់វៀតណាមចូលប្រទេសហ្វីលីពីន ដែលមានរហូតដល់៩០ភាគរយ អាចក្លាយជាបញ្ហាភ្លាម ក្នុងករណីដំណើរការផ្គត់ផ្គង់ត្រូវជាប់គាំង។
យោងតាមទិន្នន័យពីអង្គការស្បៀងអាហារ និងកសិកម្មរបស់អង្គការសហប្រជាជាតិ បានឲ្យដឹងថា តម្លៃស្រូវអង្ករទាំងអស់ ដែលវៀតណាមលក់បានកើនឡើងដល់កម្រិតខ្ពស់ក្នុងរយៈពេលបីខែ គិតត្រឹមខែមេសា ឆ្នាំ២០២៥នេះ ដោយសារតែមានការចាប់អារម្មណ៍ទិញពីឈ្មួញក្នុងស្រុក និងឈ្មួញនាំចេញក្រៅប្រទេស។
តម្លៃអង្ករទាបសមរម្យ គឺជាចំណុចសំខាន់នៃកម្មវិធីនយោបាយរបស់ប្រធានាធិបតីហ្វីលីពីន ដូច្នេះទើបសម្រេចតែងតាំងលោក ហ្វ្រង់ស៊ីស្កូ ធៀវ ឡួរ៉ែល ជារដ្ឋមន្ត្រីក្រសួងកសិកម្ម ដើម្បីដឹកនាំធ្វើការងារលើការនាំចូលអង្ករនេះ។ កាលពីឆ្នាំ២០២៤ រដ្ឋាភិបាលហ្វីលីពីន បានកាត់បន្ថយពន្ធនាំចូលអង្ករពី៣៥ភាគរយ មកនៅត្រឹម១៥ភាគរយ ហើយបានប្រកាសអាសន្នសន្តិសុខស្បៀង កាលពីខែកុម្ភៈ ឆ្នាំ២០២៥ ដើម្បីទប់ស្កាត់ការឡើងថ្លៃហួសហេតុពេក។ គោលនយោបាយនោះបានជួយទប់ស្កាត់អតិផរណាឱ្យធ្លាក់មកនៅកម្រិតទាបបំផុត ចាប់តាំងពីឆ្នាំ២០១៩ ដោយផ្តល់ឱ្យឱកាសដល់ធនាគារកណ្តាល អាចកាត់បន្ថយអត្រាការប្រាក់បន្ថែមផងដែរ។
លោក ហ្វ្រង់ស៊ីស្កូ ធៀវ ឡួរ៉ែល បានរំពឹងថា ការនាំចូលអង្ករ នៅឆ្នាំ២០២៥នេះ នឹងទាបជាងឆ្នាំ២០២៤ ដោយមានបរិមាណមិនលើសពី៤,៥លានតោនឡើយ ខណៈក្រសួងកសិកម្មសហរដ្ឋអាមេរិក បានព្យាករណ៍ថា ប្រទេសហ្វីលីពីននឹងនាំចូលអង្ករចំនួន៥,៤លានតោន នៅក្នុងឆ្នាំ២០២៥។
រដ្ឋមន្ត្រីក្រសួងកសិកម្មហ្វីលីពីន ធ្លាប់មានប្រសាសន៍ថា អត្រាពន្ធ១៥ភាគរយលើអង្ករនាំចូលអាចនឹងត្រូវរក្សាទុកឱ្យនៅដដែលរហូតដល់ខែកញ្ញា ដើម្បីការពារការឡើងថ្លៃអង្ករនៅតាមបណ្តាហាងលក់រាយក្នុងប្រទេស ដោយសារតម្លៃអង្ករនៅលើពិភពលោកកើនឡើងបន្តិចម្តងៗ បន្ទាប់ពីរដូវប្រមូលផល។
លោករដ្ឋមន្ត្រីបានមានប្រសាសន៍បញ្ជាក់ថា លោកនឹងលើកជាយោបល់លើអត្រាពន្ធទាបនេះ បន្ទាប់បានពិនិត្យមើលលទ្ធផលនៃការអនុវត្តវិធានការនេះ នៅក្នុងខែកក្កដា ឆ្នាំ២០២៥។
លោក ហ្វ្រង់ស៊ីស្កូ ធៀវ លូរ៉ែល បាននិយាយកាលពីថ្ងៃទី២៦ ខែឧសភាថា សម្រាប់ពេលនេះ អត្រាពន្ធនឹងមិនកើនឡើងវិញទេ រាប់ចាប់តាំងពីរដូវប្រមូលផលស្រូវនៅក្នុងស្រុក ហើយប្រភពដើមនៃអង្ករនាំចូលក៏បានបញ្ចប់ការប្រមូលផលហើយ៕
