ខេត្តសានទុង៖ កសិដ្ឋានដាំបន្លែដ៏ល្បីល្បាញនៅក្នុងខេត្តសានទុងរប់សប្រទេសចិន កំពុងតែសាងសង់កសិដ្ឋានដាំដំណាំមួយកន្លែងមានផ្ទៃដីទំហំ១០ហិកតា ស្ថិតនៅលើវាលខ្សាច់ដ៏ស្ងួតហួតហែង ក្នុងប្រទេសអេមីរ៉ាតអារ៉ាប់រួម សម្រាប់ធ្វើកសិកម្មឆ្លាតវៃ ដើម្បីបង្ហាញពីការជឿនលឿនផ្នែកបច្ចេកវិទ្យាកសិកម្ម។
ទីភ្នាក់ងារព័ត៌មានរដ្ឋចិន ស៊ីនហួរ បានរាយការណ៍ថា កាលពីថ្ងៃទី១៩ ខែឧសភា ឆ្នាំ២០២៥ ក្រុមហ៊ុនកសិកម្មឈានមុខគេរបស់ប្រទេសអេមីរ៉ាតអារ៉ាប់រួម បានចុះហត្ថលេខាលើកិច្ចព្រមព្រៀងសហប្រតិបត្តិការយុទ្ធសាស្ត្រជាមួយក្រុមហ៊ុនចិន នៅក្នុងខេត្តសានទុង ដើម្បីសហការវិនិយោគរួមគ្នាក្នុងទឹកប្រាក់ចំនួន៣២,៦៧លានដុល្លារ សម្រាប់ផ្លាស់ប្តូរបច្ចេកទេសធ្វើកសិកម្មលើវាលខ្សាច់។
កិច្ចសហការនេះ គឺជាផ្នែកមួយនៃយុទ្ធនាការផ្សព្វផ្សាយជាសកលរបស់ប្រទេសចិន ដើម្បីបង្ហាញឧទាហរណ៍មួយទៀតរបស់រដ្ឋាភិបាលទីក្រុងប៉េកាំង ក្នុងការចែករំលែកចំណេះដឹងផ្នែកវិស័យកសិកម្មទៅកាន់ប្រទេសក្នុងតំបន់អារ៉ាប់ និងចូលរួមក្នុងគំនិតផ្តួចផ្តើម ខ្សែក្រវ៉ាត់មួយ និងផ្លូវមួយ ដែលជាយុទ្ធសាស្ត្រជំរុញហេដ្ឋារចនាសម្ព័ន្ធសម្រាប់ការតភ្ជាប់ក្នុងតំបន់។
កសិដ្ឋានថ្មីនេះនឹងប្រើប្រាស់បច្ចេកវិទ្យាទំនើបៗរបស់ចិន មានដូចជា បញ្ញាសិប្បនិម្មិត និងមនុស្សយន្ត ដើម្បីបង្កើនប្រសិទ្ធភាព និងភាពប្រាកដប្រជានៃការបណ្ដុះគ្រាប់ពូជ ការគ្រប់គ្រងអាកាសធាតុ ប្រព័ន្ធធារាសាស្រ្ត និងការប្រមូលផល។
ទីភ្នាក់ងារព័ត៌មាន ស៊ីនហួ បានសរសេររៀបរាប់ទៀតថា គម្រោងនេះនឹងគាំទ្រដល់ការដាំដុះពូជដំណាំជាង១០ប្រភេទ រួមមានប៉េងប៉ោះ ត្រសក់ ឪឡឹក និងស្ត្របឺរី ជាដើម។
ស្ថាបនិកក្រុមចិន បាននិយាយថា ទីក្រុង អាប៊ូ ដាប៊ី (Abu Dhabi) នៃប្រទេសអេមីរ៉ាតអារ៉ាប់រួម គឺជាទីតាំងសម្រាប់ប្រើបច្ចេកវិទ្យាកសិកម្ម ដោយបង្កើតបានជាវេទិកាប្រកបដោយចក្ខុវិស័យ និងជាកន្លែងសាកល្បងពិតៗសម្រាប់ប្រើប្រព័ន្ធបច្ចេកវិទ្យាកម្រិតខ្ពស់ នៅក្នុងលក្ខខណ្ឌអាកាសធាតុក្រៅខ្លាំង។
ចំណែកនាយកប្រតិបត្តិរបស់ក្រុមហ៊ុនអេមីរ៉ាតអារ៉ាប់រួម បាននិយាយថា កិច្ចសហប្រតិបត្តិការនេះនឹងបង្កើតគំរូសម្រាប់ការច្នៃប្រឌិតផ្នែកវិស័យកសិកម្មនៅទូទាំងឈូងសមុទ្រពែក្ស ដើម្បីរួមចំណែកដល់ការអភិវឌ្ឍក្នុងតំបន់ប្រកបដោយភាពធន់ និងមាននិរន្តរភាព។
កសិដ្ឋាននេះនឹងមានផ្ទះកញ្ចក់ ឬរោងសំណាញ់នាំចូលពីប្រទេសចិន ដែលអាចសម្របសម្រួលតាមលក្ខខណ្ឌអាកាសធាតុនៅក្នុងប្រទេសអេមីរ៉ាតអារ៉ាប់រួម។
ក្រុមហ៊ុនបានប្រកាសថា ហេដ្ឋារចនាសម្ព័ន្ធសំខាន់ៗ រួមមានបន្ទប់ពិសោធន៍ប្រើបញ្ញាសិប្បនិម្មិត តំបន់សាកល្បងបច្ចេកវិទ្យា ប្រព័ន្ធប្រព្រឹត្តិកម្មទឹកស្អាត តំបន់ដាំដុះផ្សិត និងមជ្ឈមណ្ឌលខ្សែចង្វាក់ដឹកជញ្ជូន ដែលបង្កើតបានជាប្រព័ន្ធអេកូឡូស៊ីកសិកម្ម តាំងពីពេលដាំដុះរហូតដល់ពេលប្រមូលផលលក់ចេញទៅកាន់ទីផ្សារ។
កិច្ចព្រមព្រៀងរវាងក្រុមហ៊ុនចិន និងក្រុមហ៊ុនអេមីរ៉ាតអារ៉ាប់រួម ត្រូវបានចុះហត្ថលេខាស្របពេលប្រទេសចិនកំពុងតែប្រឹងពង្រីកវិសាលភាពរបស់ខ្លួនក្នុងការធ្វើកសិពាណិជ្ជកម្ម។
កាលពីខែមេសា ឆ្នាំ២០២៥ អគ្គនាយកដ្ឋានគយចិន បានរាយការណ៍ថា អត្រាការនាំចេញផលិតផលថ្នាំសម្លាប់សត្វល្អិតរបស់ចិនទៅក្រៅប្រទេស តាមរយៈគោលនយោបាយគំនិតផ្តួចផ្តើមខ្សែក្រវាត់មួយ និងផ្លូវមួយ បានកើនឡើងចំនួន១៥,៥ភាគរយ គិតត្រឹមក្នុងត្រីមាសទីមួយ ខណៈការនាំចេញគ្រឿងយន្តកសិកម្ម បានកើនឡើងចំនួន៣៧,២ភាគរយ។
ក្រុមហ៊ុនដាំបន្លែរបស់ខេត្តសានទុង គឺជាអ្នកផ្គត់ផ្គង់បន្លែប្រចាំឆ្នាំ មានបរិមាណចំនួនប្រាំបួនលានតោនដល់តម្រូវនៅក្នុងប្រទេសចិន។ បច្ចុប្បន្នក្រុមហ៊ុនបន្លែដ៏ធំមួយនេះ កំពុងតែចាប់យកការដាំដុំតាមប្រព័ន្ធឌីជីថលរហូតបង្កើតបានកេរ្តិ៍បោះសំឡេងលើឆាកអន្តរជាតិថែមទៀតផង។ ចាប់តាំងពីបង្កើតបានរយៈ១៥ឆ្នាំកន្លងមក ក្រុមហ៊ុននេះបានបង្កើតកសិដ្ឋានដាំដំណាំក្រៅប្រទេសចំនួន២៧២កន្លែង នៅ២៩ប្រទេស។
រដ្ឋមន្ត្រីក្រសួងកសិកម្មចិន បានកត់សម្គាល់ថា បច្ចេកវិទ្យាកសិកម្មរបស់ប្រទេសចិនបានឈានដល់លំដាប់ទីមួយលើសកលលោក ដែលបានរួមចំណែក៦៣,២ភាគរយចំពោះវឌ្ឍនភាពកសិកម្ម ព្រមគ្របដណ្តប់លើផ្ទៃដីកសិកម្មនៅទូទាំងប្រទេសចិនរហូតជាង៩៦ភាគរយ៕
