ទីក្រុងម៉ានីល៖ រដ្ឋមន្ត្រីក្រសួងកសិកម្មហ្វីលីពីន លោក ហ្វ្រង់ស៊ីស្កូ ធៀវ លូរ៉ែល (Francisco Tiu Laurel) បានមានប្រសាសន៍ថា អត្រាពន្ធ១៥ភាគរយលើអង្ករនាំចូលអាចនឹងត្រូវរក្សាទុកឱ្យនៅដដែលរហូតដល់ខែកញ្ញា ដើម្បីការពារការឡើងថ្លៃអង្ករនៅតាមបណ្តាហាងលក់រាយក្នុងប្រទេស ដោយសារតម្លៃអង្ករនៅលើពិភពលោកកើនឡើងបន្តិចម្តងៗ បន្ទាប់ពីរដូវប្រមូលផល។
លោករដ្ឋមន្ត្រីបានមានប្រសាសន៍បញ្ជាក់ថា លោកនឹងលើកជាយោបល់លើអត្រាពន្ធទាបនេះ បន្ទាប់បានពិនិត្យមើលលទ្ធផលនៃការអនុវត្តវិធានការនេះ នៅក្នុងខែកក្កដា ឆ្នាំ២០២៥។
យោងតាមសារព័ត៌មានហ្វីលស្តារបស់ហ្វីលីពីន បានឱ្យដឹងថា អត្រាពន្ធអង្ករនាំចូល ដែលធ្លាប់កាត់បន្ថយបានចូលជាធរមាន ចាប់តាំងពីខែកក្កដា ឆ្នាំ២០២៤មកម្លេះបន្ទាប់ពីប្រធានាធិបតីហ្វីលីពីន ចេញបទបញ្ជាប្រតិបត្តិ ដែលបានកាត់បន្ថយពន្ធគយដល់កម្រិតទាបពី៣២ភាគរយ មកនៅត្រឹម១៥ភាគរយ។
បទបញ្ជាប្រតិបត្តិរបស់ប្រធានាធិបតី បានកំណត់ឱ្យមានការពិនិត្យឡើងវិញជាទៀងទាត់នៃអត្រាពន្ធនូវរៀងរាល់បួនខែម្តង។ ការត្រួតពិនិត្យលើកដំបូងត្រូវបានធ្វើឡើងនៅក្នុងខែវិច្ឆិកា ឆ្នាំ២០២៤ ហើយត្រូវបានអនុវត្តបន្ត កាលពីខែមីនា ឆ្នាំ២០២៥នេះ។
លោក ហ្វ្រង់ស៊ីស្កូ ធៀវ លូរ៉ែល បាននិយាយកាលពីថ្ងៃទី២៦ ខែឧសភាថា សម្រាប់ពេលនេះ អត្រាពន្ធនឹងមិនកើនឡើងវិញទេ រាប់ចាប់តាំងពីរដូវប្រមូលផលនៅក្នុងស្រុក ហើយប្រភពដើមនៃអង្ករនាំចូលក៏បានបញ្ចប់ការប្រមូលផលហើយ។ ប្រសិនបើត្រូវដំឡើងពន្ធ ល្អបំផុតដំឡើងក្នុងរដូវប្រមូលផលរបស់ប្រទេសនាំចេញអង្ករ។
ទោះបីជាយ៉ាងណាក៏ដោយ លោករដ្ឋមន្ត្រីក្រសួងកសិកម្ម បានបញ្ជាក់ពីគោលជំហរមុននេះថា ការដំឡើងពន្ធលើអង្ករនាំចូលត្រូវតែធ្វើជាបណ្តើរៗ ដើម្បីបញ្ចៀសផលប៉ះពាល់លើទីផ្សារ។
លោករដ្ឋមន្ត្រីបានបញ្ជាក់ថា ការដំឡើងពន្ធអង្ករ គឺអាស្រ័យលើពេលពេលវេលាជាក់ស្តែង។
បើយោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិ បានឱ្យដឹងថា តម្លៃអង្ករវៀតណាមបានឡើងថ្លៃបន្តិច កាលពីក្នុងខែមេសា ឆ្នាំ២០២៤ ខណៈការប្រមូលផលស្រូវឆ្នាំនេះជិតរួចរាល់។
នៅក្នុងឆ្នាំ២០២៥នេះ អង្ករបាក់ប្រាំភាគរយរបស់វៀតណាម លក់នៅក្នុងខែមេសា ឡើងថ្លៃដល់៣៩៦,៨ដុល្លារក្នុងមួយតោន បើធៀបនឹងតម្លៃ៣៨៦,៥ដុល្លារក្នុងមួយតោន លក់នៅក្នុងខែមីនា។
ចំណែកជំនួយការរដ្ឋមន្ត្រី និងជាអ្នកនាំពាក្យក្រសួងកសិកម្ម បាននិយាយថា ប្រសិនបើដំឡើងអត្រាពន្ធអង្ករនាំចូលនៅពេលនេះ ខណៈពេលការផ្គត់ផ្គង់មិនទាន់គ្រប់គ្រាន់ អាចធ្វើឲ្យតម្លៃលក់រាយក្នុងស្រុកកើនឡើងជាក់ជាមិនខាន។
ការព្យាយាមទម្លាក់អត្រាពន្ធនាំចូលអង្ករ គឺក្នុងគោលបំណងគ្រប់គ្រងអតិផរណាស្បៀងអាហារ ជាពិសេសការកើនឡើងនៃតម្លៃអង្ករលក់រាយ ដូចនៅក្នុងឆ្នាំ២០២៣ និង២០២៤៕
