ហាណូយ៖ យោងតាមក្រសួងកសិកម្ម និងបរិស្ថានរបស់វៀតណាម បានឱ្យដឹងថា ការនាំចេញកសិផល-រុក្ខាប្រមាញ់ និងនេសាទ របស់វៀតណាម ក្នុងរយៈពេលពីរខែដើមឆ្នាំ២០២៥នេះ ទទួលបានប្រាក់ចំណូលចំនួន៩,៣ពាន់លានដុល្លារ គឺមានកំណើនកើនឡើងរហូតដល់៨,៣ភាគរយពីមួយឆ្នាំទៅមួយឆ្នាំ។
គ្រាន់តែក្នុងខែកុម្ភៈ ឆ្នាំ២០២៥នេះ ប្រទេសវៀតណាមរកចំណូលបានសរុបចំនួន៤,៤ពាន់លានដុល្លារ ពីការនាំចេញផលិតផលកសិកម្មទៅកាន់ទីផ្សារក្រៅប្រទេស គឺកើនឡើងចំនួន៣៧,២ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ក្នុងចំណូលសរុបនេះ ផលិតផលកសិកម្ម បាននាំប្រាក់ចំណូលចំនួន៤,៨៩ ពាន់លានដុល្លារ ក្នុងអំឡុងពេលពីរខែដំបូងនៃឆ្នាំ២០២៥ គឺកើនឡើងចំនួន៤,៥ភាគរយ ខណៈចំណូលបានមកពីការចិញ្ចឹមសត្វ មានចំនួន៧២,២លានដុល្លារ គឺកើនឡើងចំនួន៤ភាគរយ។
ចំណែកការនាំចេញផលិតផលជលផលវិញ ទទួលបានចំណូលចំនួន១,៤២ពាន់លានដុល្លារ គឺស្មើនឹង១៨,៦ភាគរយ រីឯការនាំចេញផលិតផលព្រៃឈើ ទទួលបានប្រាក់ចំណូលចំនួន២,៦៨ពាន់លានដុល្លារ គឺស្មើនឹង១១,៩ភាគរយ។ សម្រាប់ការនាំចេញអំបិលមានការកើនឡើងគួរឱ្យកត់សម្គាល់ផងដែរ ដោយកើនឡើងទ្វេដង ទទួលបានប្រាក់ចំណូលដល់១,៤លានដុល្លារ។
ទ្វីបអាស៊ីនៅតែជាទីផ្សារដ៏លេចធ្លោមួយសម្រាប់ផលិតផលកសិ-រុក្ខាប្រមាញ់ និងនេសាទ របស់វៀតណាម ដែលស្មើនឹង៤២,២ភាគរយនៃតម្លៃនាំចេញសរុប។ បន្តមកទៀតទីផ្សារនៅទ្វីបអាមេរិក និងទ្វីបអឺរ៉ុប ចំណែកទីផ្សារសម្រាប់ការនាំចេញទៅកាន់ទ្វីបអាហ្រ្វិក និងទ្វីបអូសេអានី គឺស្ថិតនៅក្នុងបិរមាណទៀបជាងគេ។
ក្នុងចំណោមផលិតផលកសិកម្មសំខាន់ៗ ការនាំចេញកាហ្វេរបស់វៀតណាមមានបរិមាណចំនួន២៨៤,០០០តោន ក្នុងអំឡុងខែមករា ដល់ខែកុម្ភៈ ដែលមានតម្លៃសរុបចំនួន១,៥៨ពាន់លានដុល្លារ។ ទោះបីជាបរិមាណទំនិញបានថយចុះបន្តិចក៏ដោយ ប៉ុន្តែតម្លៃទំនិញបានកើនឡើង បើធៀបនឹងរយៈពេលដូចគ្នា ក្នុងឆ្នាំ២០២៤។ ការកើនឡើងនេះត្រូវបានគេសន្មត់ថា ជាកំណើនគួរឱ្យកត់សម្គាល់នៃតម្លៃនាំចេញជាមធ្យម ដែលមានទឹកប្រាក់ជិត៥,៥៧៥ដុល្លារក្នុងកាហ្វេមួយតោន។ ប្រទេសអាល្លឺម៉ង់ អ៊ីតាលី និងប្រទេសជប៉ុន គឺជាទីផ្សារធំបំផុតសម្រាប់ផលិតផលកាហ្វេវៀតណាម។
ចំណែកការនាំចេញម្រេចវិញ ក៏បានបង្ហាញពីនិន្នាការវិជ្ជមានផងដែរ ទោះបីជាបរិមាណនាំចេញកាហ្វេធ្លាក់ចុះបន្តិចក៏ដោយ ប៉ុន្តែតម្លៃកាហ្វេបានកើនឡើង គឺក្នុងបរិមាណកាហ្វេដល់២៨,០០០តោន រកប្រាក់ចំណូលបានចំនួន១៨៨,៧លានដុល្លារ។
នៅក្នុងរយៈពេលពីរខែដំបូងនេះដែរ វៀតណាមបាននាំចេញអង្ករចំនួន១,១លានតោន ដោយទទួលបានចំណូលសរុបចំនួន៦១៣លានដុល្លារ គឺបរិមាណអង្ករកើនឡើង ប៉ុន្តែតម្លៃបានធ្លាក់ចុះ។ តម្លៃអង្ករនាំចេញជាមធ្យមបានធ្លាក់ចុះ១៨,៣ភាគរយ ពីមួយឆ្នាំទៅមួយឆ្នាំ មកនៅត្រឹម៥៥៣,៦ដុល្លារក្នុងមួយតោន។ ប្រទេសហ្វីលីពីន គឺជាអ្នកទិញអង្ករវៀតណាមច្រើនជាងគេ បន្ទាប់មកគឺប្រទេសកូដេវ័រ និងប្រទេសហ្គាណា នៃទ្វីបអាហ្វ្រីក។
រីឯការនាំចេញបន្លែ និងផ្លែឈើ បានធ្លាក់ចុះចំនួន១១ភាគរយ គិតជាតម្លៃទឹកប្រាក់ចំនួន៧២៤,៥លានដុល្លារ។ ប្រទេសចិននៅតែជាទីផ្សារដ៏ធំបំផុតសម្រាប់បន្លែ និងផ្លែឈើរបស់វៀតណាម បន្ទាប់មកសហរដ្ឋអាមេរិក៕
