ម៉ានីល៖ ប្រទេសហ្វីលីពីនបាននាំចេញផ្លែស្វាយស្រស់ជាលក្ខណៈពាណិជ្ជកម្មទៅកាន់ប្រទេសកាណាដា តាមរយៈផែនការពង្រីកទីផ្សារក្រៅប្រទេសថែមទៀត សម្រាប់ផលិតផលកសិកម្ម និងបង្កើតប្រាក់ចំណូលសម្រាប់កសិករហ្វីលីពីន។
ការនាំចេញលើកនេះមានផ្លែស្វាយចំនួន២៥០ប្រអប់ ហើយត្រូវបានដឹកចេញ កាលពីថ្ងៃទី១៨ ខែកញ្ញា ឆ្នាំ២០២៦ ដោយក្រុមហ៊ុនឯកជនរបស់ហ្វីលីពីន តាមរយៈកម្មវិធីអាជីវកម្មទៅក្រៅប្រទេសរបស់ក្រសួងពាណិជ្ជកម្ម និងឧស្សាហកម្ម ហ្វីលីពីន។
ចំណែកក្រុមហ៊ុននៅទីក្រុ វ៉ាន់ខូវើរ (Vancouver) ប្រទេសកាណាដានឹងចែកចាយផ្លែស្វាយស្រស់ទាំងនេះទៅកាន់ផ្សារទំនើប និងអ្នកទិញបន្ត ចំណែកក្រុមហ៊ុនអាកាសចរណ៍កាណាដា ទទួលបន្ទុកអ្នកដឹកជញ្ជូនតាមផ្លូវអាកាស ដើម្បីផ្គត់ផ្គង់តាតម្រូវការទីផ្សារ។
ព្រមជាមួយគ្នានេះដែរ ក្រសួងកសិកម្មហ្វីលីពីន បាននិងកំពុងពង្រឹងសមត្ថភាពឧស្សាហកម្មដំណាំស្វាយ ដើម្បីបំពេញតាមតម្រូវការនាំចេញ និងអាចនាំចូលទៅកាន់ទីផ្សារអន្តរជាតិឱ្យបានយូរអង្វែង។ ក្រុមសហគមន៍អ្នកដាំស្វាយជាង៤០ ក្រុម រួមបញ្ចូលគ្នាទៅជាសហព័ន្ធតែមួយ ដើម្បីពង្រឹងការសម្របសម្រួលក្នុងការដាំដុះ ការប្រមូល និងនាំចូលទៅកាន់ទីផ្សារអន្តរជាតិ។
ក្រសួងកសិកម្មក៏កំពុងដោះស្រាយបញ្ហាជំងឺ ដែលប៉ះពាល់ដល់ផលិតកម្មស្វាយ និងពង្រឹងវិធានការការពារសុខភាពរុក្ខជាតិ ដែលជាកត្តាចាំបាច់សម្រាប់បំពេញតាមលក្ខខណ្ឌរបស់ទីផ្សារនាំចេញ។
រដ្ឋមន្ត្រីកសិកម្ម លោក ហ្វ្រែនស៊ីស្កូ ធៀវ ឡូរ៉ែល (Francisco Tiu Laurel) បានមានប្រសាសន៍ថា ការនាំចេញលើកនេះជាស្ថិតក្រោមយុទ្ធសាស្ត្ររបស់រដ្ឋាភិបាល ដើម្បីបើកទីផ្សារថ្មីៗសម្រាប់ផលិតផលកសិកម្មរបស់ហ្វីលីពីន និងបង្កើនប្រាក់ចំណូលពីការនាំចេញផលិតផលកសិកម្ម។
លោកបានមានប្រសាសន៍ថា «ការបើកទីផ្សារថ្មី មានន័យថា ការបើកឱកាសថ្មីៗសម្រាប់កសិកររបស់យើង។ នៅពេលដែលយើងអាចលក់ផលិតផលកសិកម្មរបស់ហ្វីលីពីន បានកាន់តែច្រើនទៅក្រៅប្រទេស យើងនឹងបង្កើតឱកាសបង្កើនប្រាក់ចំណូលដល់កសិករ ជំរុញការវិនិយោគបន្ថែមក្នុងវិស័យកសិកម្ម និងនាំមកនូវសកម្មភាពសេដ្ឋកិច្ចកាន់តែច្រើនទៅកាន់តំបន់ជនបទ»។
លោកបានបន្ថែមថា ការនាំចេញផលិតផលកសិកម្មកាន់តែរឹងមាំ ក៏អាចបង្កើតឱកាសនៅទូទាំងខ្សែច្រវាក់ចេញពីកសិដ្ឋានទៅដល់ទីផ្សារ រាប់ចាប់ពីការផលិត ការប្រមូលផ្គុំផលិតផល ការដឹកជញ្ជូន និងភស្តុភារ រហូតដល់ការកែច្នៃ និងការចែកចាយ៕ (ផាន់ អាណា)
