ដោយ ហៃ ស៊ីណា
ភ្នំពេញ៖ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិន ប្រចាំកម្ពុជា បានបង្ហាញសញ្ញាដ៏វិជ្ជមានមួយសម្រាប់ការបន្តពង្រឹងទំនាក់ទំនង និងកិច្ចសហប្រតិបត្តិការកម្ពុជា-ចិន ជាពិសេសក្នុងការជំរុញពាណិជ្ជកម្ម វិនិយោគ កសិកម្ម និងការនាំចេញផលិតផលកម្ពុជា ទៅកាន់ទីផ្សារចិន និងទីផ្សារអន្តរជាតិ។
ឯកឧត្តម វ៉ាង វិនពីន (Wang Wenbin) បានបង្ហាញការប្តេជ្ញាចិត្តបែបនេះ នៅក្នុងដំណើរទស្សនកិច្ច និងស្វែងយល់អំពីដំណើរការរបស់ក្រុមហ៊ុន ស៊ីធី រ៉ាយស៍ (City Rice) នាចុងសប្តាហ៍នេះ ក្នុងខេត្តបាត់ដំបង់ ដែលទទួលស្វាគមន៍ពីឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងឯកឧត្តម សុខ លូ អភិបាលខេត្តបាត់ដំបង។
ដំណើរទស្សនកិច្ចដ៏មានអត្ថន័យនេះ មិនត្រឹមតែជាកិត្តិយសដ៏ធំធេងសម្រាប់ប្រទេសកម្ពុជាប៉ុណ្ណោះទេ ប៉ុន្តែថែមទាំងជាកម្លាំងចិត្តដ៏មានតម្លៃសម្រាប់ក្រុមហ៊ុននាំចេញអង្ករកម្ពុជា ក្នុងការបន្តខិតខំអភិវឌ្ឍវិស័យស្រូវ-អង្ករកម្ពុជាឱ្យកាន់តែមានគុណភាពខ្ពស់ ស្របតាមស្តង់ដារ និងមានសមត្ថភាពប្រកួតប្រជែងនៅលើទីផ្សារអន្តរជាតិ។
ក្នុងឱកាសទស្សនកិច្ចនេះ គណៈប្រតិភូបានចុះទស្សនកិច្ច និងស្វែងយល់អំពីដំណើរការរបស់ក្រុមហ៊ុន ស៊ីធី រ៉ាយស៍ ចាប់ពីការប្រមូលទិញស្រូវ ការកែច្នៃ ការរក្សាទុក ការត្រួតពិនិត្យគុណភាព រហូតដល់ការរៀបចំផលិតផលសម្រាប់ទីផ្សារ។
ដំណើរទស្សនកិច្ចនេះ ក៏ជាឱកាសដ៏ល្អសម្រាប់ការផ្លាស់ប្តូរទស្សនៈ និងបទពិសោធន៍ ព្រមទាំងពិភាក្សាអំពីសក្តានុពល និងឱកាសនៃការពង្រីកកិច្ចសហប្រតិបត្តិការក្នុងវិស័យកសិកម្ម ស្រូវ-អង្ករ ពាណិជ្ជកម្ម និងការវិនិយោគ។
ឧកញ៉ា ឡាយ ឈុនហួ ក្នុងនាមជាម្ចាស់ក្រុមហ៊ុន ដែលមានមូលដ្ឋាននៅស្រុកថ្មគោលខេត្តបាត់ដំបង ដែលជាតំបន់មានសក្តានុពលខ្ពស់ក្នុងការផលិតស្រូវ និងកសិផល ក្រុមហ៊ុនស៊ីធី រ៉ាយស៍ មានមោទកភាពក្នុងការរួមចំណែកបង្កើតតម្លៃបន្ថែមដល់ផលិតផលកសិកម្មក្នុងស្រុក និងចូលរួមជាមួយកសិករក្នុងការលើកកម្ពស់គុណភាពស្រូវ និងអង្ករកម្ពុជា។
ឧកញ៉ាបានលើកឡើងថា ការអញ្ជើញមកទស្សនកិច្ចរបស់ឯកឧត្តម វ៉ាង វិនពីន ក្នុងនាមជាតំណាងដ៏ខ្ពង់ខ្ពស់របស់ប្រទេសចិនប្រចាំកម្ពុជា គឺជាសញ្ញាដ៏វិជ្ជមានមួយសម្រាប់ការបន្តពង្រឹងទំនាក់ទំនង និងកិច្ចសហប្រតិបត្តិការកម្ពុជា-ចិន ជាពិសេសក្នុងការជំរុញពាណិជ្ជកម្ម ការវិនិយោគ កសិកម្ម និងការនាំចេញផលិតផលកម្ពុជាទៅកាន់ទីផ្សារចិននិងអន្តរជាតិ។
ក្នុងរយៈពេល៧ខែនៃឆ្នាំ២០២៦ កម្ពុជាបាននាំចេញអង្ករបានចំនួន៧០៧ ៤៧១តោន តាមរយៈក្រុមហ៊ុននាំចេញអង្ករចំនួន៦១ក្រុមហ៊ុន ទៅកាន់គោលដៅចំនួន៦៦ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន៣៣ បានបរិមាណអង្ករចំនួន២០៧ ១៥៧តោន គិតជាទឹកប្រាក់ចំនួន១៥៦,៤៥លានដុល្លារ។ ចំណែកការនាំចេញទៅកាន់ប្រទេសចិន និងហុងកុង ចំនួន១៧៤ ៩៣០តោន គិតជាទឹកប្រាក់ចំនួន១០៣,៣១លានដុល្លារ៕
