តូក្យូ៖ ក្រសួងកសិកម្មជប៉ុនបានឱ្យដឹងថា សមាមាត្រនៃភាពគ្រប់គ្រាន់ដោយខ្លួនឯងនៃស្បៀងអាហាររបស់ប្រទេសបានធ្លាក់ចុះមកត្រឹម៣៧ភាគរយសម្រាប់ឆ្នាំសារពើពន្ធ ដែលបានបញ្ចប់នៅថ្ងៃទី៣១ ខែមីនា ឆ្នាំ២០២៦ ដែលធ្លាក់ចុះមួយភាគរយ បើធៀបនឹងឆ្នាំមុន និងទាបជាងគោលដៅ៤៥ភាគរយរបស់រដ្ឋាភិបាលជប៉ុន សម្រាប់ឆ្នាំសារពើពន្ធឆ្នាំ២០៣០។
បើយោងតាមសារព័ត៌មាន ឆែនណែល ញូវស៍ អេស៊ា (Channel News Asia) បានឱ្យដឹងថា អត្រានេះស្ថិតក្នុងចំណោមអត្រាទាបបំផុតនៃបណ្តាប្រទេសអភិវឌ្ឍន៍ ដែលបង្ហាញយ៉ាងច្បាស់អំពីភាពងាយរងគ្រោះរបស់ជប៉ុនចំពោះការរំខានដល់ការផ្គត់ផ្គង់ស្បៀងអាហារ ចំពេលមានតានតឹងភូមិសាស្ត្រនយោបាយកាន់តែខ្លាំងឡើង រួមទាំងសង្គ្រាមអូសបន្លាយរវាងរុស្ស៊ី និងអ៊ុយក្រែន និងជម្លោះនៅមជ្ឈិមបូព៌ាផងដែរ។
ក្រសួងកសិកម្ម រុក្ខាប្រមាញ់ និងនេសាទ ជប៉ុន បានបញ្ជាក់ថា អត្រាដែលផ្អែកលើការវាស់កាឡូរី ដោយវាស់វែងពីចំណែកនៃប្រើប្រាស់ស្បៀងអាហារផលិតក្នុងស្រុក បានធ្លាក់ចុះដោយសារតែការប្រើប្រាស់អង្ករថយចុះ និងការកើនឡើងនៃស្តុកស្បៀង នៅក្នុងវិស័យឯកជន។ អត្រានេះបានបន្តស្ថិតនៅក្រោម៤០ភាគរយអស់រយៈពេលជាង១០ឆ្នាំកន្លងមកហើយ បើទោះបីជាមានកិច្ចខិតខំប្រឹងប្រែងរបស់រដ្ឋាភិបាលជប៉ុន ក្នុងការជម្រុញផលិតកម្មក្នុងស្រុកនូវមុខដំណាំនាំចូលជាច្រើន ដូចជាស្រូវសាលី និងសណ្តែកសៀង។
បើយោងតាមការប៉ាន់ប្រមាណរបស់ក្រសួងដោយផ្អែកលើទិន្នន័យចុងក្រោយ បានឱ្យដឹងថា ប្រទេសអូស្ត្រាលី កាណាដា បារាំង និងសហរដ្ឋអាម៉េរិក មានសមត្ថភាពផលិតស្បៀងអាហារដោយខ្លួនឯងលើសពី១០០ភាគរយ ខណៈអត្រារបស់ប្រទេសអាល្លឺម៉ង់មាន៨១ភាគរយ ចក្រភពអង់គ្លេស៥៦ភាគរយ និងអ៊ីតាលី៥១ភាគរយ នៅក្នុងឆ្នាំ២០២៣។
សមត្ថភាពផលិតស្បៀងអាហារដោយខ្លួនឯងរបស់ជប៉ុន ដែលវាស់វែងតាមតម្លៃផលិតកម្ម បានកើនឡើងរហូតដល់៦៦ភាគរយ នៅក្នុងឆ្នាំសារពើពន្ធចុងក្រោយនេះ ចំណែកតម្លៃស្រូវអង្ករ និងផលិតផលបសុសត្វ ក៏ឡើងខ្ពស់ផងដែរ។
ទោះជាយ៉ាងណាក៏ដោយ វិស័យកសិកម្មនៅតែបន្តប្រឈមមុខនឹងបញ្ហារចនាសម្ព័ន្ធជាច្រើន រួមមានកម្លាំងពលកម្មមានវ័យចំណាស់ ការខ្វះខាតអ្នកបន្តវេន និងការរួមតូចនៃដីកសិកម្ម។ ការផ្លាស់ប្តូរទម្លាប់នៃការហូបចុក ដោយកាត់បន្ថយការបរិភោគបាយ ហើយបែរទៅរកការបរិភោគសាច់ និងអាហារចម្អិនជាមួយប្រេងវិញនោះ ក៏បានដាក់សម្ពាធ និងធ្វើឱ្យប៉ះពាល់ដល់អត្រាសមត្ថភាពផលិតស្បៀងអាហារដោយខ្លួនឯងផងដែរ។
លោក តូស៊ីអាគិ សាសាគិ (Toshiaki Sasaki) ប្រធាននាយកដ្ឋានរៀបចំផែនការនៅការិយាល័យសន្តិសុខស្បៀងរបស់ក្រសួងកសិកម្ម រុក្ខាប្រមាញ់ និងនេសាទ បានថ្លែងថា ដើម្បីសម្រេចបាននូវគោលដៅ៤៥ភាគរយ ជប៉ុនមានផែនការពង្រីកដីកសិកម្មសម្រាប់ដាំស្រូវសាលី និងសណ្តែកសៀង ដែលជាផលិតផលនាំចូល។
លោកបានមានប្រសាសន៍ថា ក្រសួងនឹងពិនិត្យឡើងវិញនូវវឌ្ឍនភាពឆ្ពោះទៅរកគោលដៅសារពើពន្ធ ឆ្នាំ២០៣០ និងពិចារណាលើវិធានការបន្ថែមតាមតម្រូវការ៕ (ញឹក សំអូន)
