ដោយ នៅ ស៊ីវុត្ថា
ត្បូងឃ្មុំ៖ ខេត្តត្បូងឃ្មុំកំពុងតែមានសក្តានុពលខ្ពស់ក្នុងវិស័យកសិឧស្សាហកម្ម ដោយសារដីក្រហមមានជីជាតិអំណោយផលដល់ការដាំដុះ ជាពិសេសដំណាំយុទ្ធសាស្រ្ត ដូចជាកៅស៊ូជាដើម ដែលមានទំហំធំជាងបណ្តាខេត្តមួយចំនួននៅទូទាំងប្រទេស។
យោងតាមកិច្ចប្រជុំ និងពិភាក្សាការងារ រវាងរដ្ឋបាលខេត្តត្បូងឃ្មុំ និងប្រតិភូក្រុមហ៊ុន Shijiazhuang Hongray Group Co., Ltd. និងក្រុមហ៊ុន Hebei Yulei Construction Engineering Co., Ltd.នាពេលថ្មីៗកន្លងមកនេះ បានបង្ហាញថា ខេត្តត្បូងឃ្មុំមានផ្ទៃដីដាំកៅស៊ូប្រមាណ ៨៨.១៤៥ ហិកតា ក្នុងនោះផ្ទៃដីអាជីវកម្មជ័រមានចំនួន ៦៦.០៣៦ ហិកតា និងទទួលបានផលប្រមាណ ៣៩.៦២៤ តោន ដែលមានតម្លៃសរុបប្រមាណ ៧៥ លានដុល្លារអាមេរិក។
ខេត្តត្បូងឃ្មុំមានសក្តានុពលខ្ពស់លើការដាំដុះដំណាំកៅស៊ូ ដោយសារមានដីក្រហមដែលមានជីជាតិ និងមានប្រវត្តិដាំកៅស៊ូជាងមួយសតវត្សមកហើយ។ ទិន្នផលកៅស៊ូនៅខេត្តត្បូងឃ្មុំក៏មានកម្រិតល្អប្រសើរ ដោយអាចទទួលបានប្រមាណ ១,៥ តោនក្នុងមួយហិកតា ខណៈខេត្តមួយចំនួនផ្សេងទៀតទទួលបានប្រមាណ ១,១ ឬ ១,៣ តោនក្នុងមួយហិកតា។
កាលពីឆ្នាំ២០២៥ ខេត្តត្បូងឃ្មុំមានផ្ទៃដីកៅស៊ូចៀរជ័រប្រមាណ ៦៦.០៣៦ ហិកតា និងទទួលបានបរិមាណផលជ័រកៅស៊ូប្រមាណ ៩៩.០៥៤ តោន ដែលមានតម្លៃសេដ្ឋកិច្ចប្រមាណ ១៧៦ លានដុល្លារអាមេរិក។
ក្រៅពីសក្តានុពលលើវិស័យកៅស៊ូ ខេត្តត្បូងឃ្មុំមានផ្ទៃដីកសិ-ឧស្សាហកម្មសរុបប្រមាណ ២៤៣ ពាន់ហិកតា និងមានមូលដ្ឋានឧស្សាហកម្ម និងសិប្បកម្មចំនួន ៦៩១ កន្លែង ព្រមទាំងសហគ្រាសកែច្នៃកសិផលចំនួន ៩២ កន្លែង។
សក្តានុពលលើវិស័យកៅស៊ូក៏កំពុងត្រូវបានជំរុញ តាមរយៈការវិនិយោគលើការកែច្នៃក្នុងស្រុក។ កាលពីថ្ងៃទី២៧ ខែឧសភា ឆ្នាំ២០២៦ ខេត្តត្បូងឃ្មុំ បានសម្ពោធរោងចក្រកែច្នៃជ័រភ្នាសកៅស៊ូស្តង់ដារអឺរ៉ុបរបស់ក្រុមហ៊ុន គីមស៍ រ៉ាប់ប៊័រ (ខេមបូឌា) ឯ.ក ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
រោងចក្រនេះមានទុនវិនិយោគប្រមាណ ៣០ លានដុល្លារអាមេរិក និងមានសមត្ថភាពផលិតជ័រកៅស៊ូប្រមាណ ១០ ម៉ឺនតោនក្នុងមួយឆ្នាំ។ ការវិនិយោគនេះត្រូវបានចាត់ទុកថា ជាការរួមចំណែកដល់ការលើកកម្ពស់វិស័យដំណាំកៅស៊ូ តាមរយៈការពង្រីកការកែច្នៃ និងទីផ្សារផលិតផលកៅស៊ូនៅក្នុងប្រទេសនឹងជួយពង្រីកទីផ្សារជ័រកៅស៊ូនៅកម្ពុជា បង្កើតការងារ និងកាត់បន្ថយការពឹងផ្អែកលើឈ្មួញកណ្តាល។
ក្រៅពីនេះភូមិសាស្ត្រអំណោយផលសម្រាប់ការដឹកជញ្ជូន និងធ្វើពាណិជ្ជកម្ម ដោយមានព្រំប្រទល់ជាប់ប្រទេសវៀតណាម មានច្រកទ្វារព្រំដែនសរុបចំនួន ៧ ព្រមទាំងបណ្តាញផ្លូវជាតិសំខាន់ៗចំនួន ៥ ខ្សែ ប្រវែងសរុប ២៦១,១ គីឡូម៉ែត្រ និងមានកំពង់ផែទឹកសាបនៅតំបន់ទន្លេបិទ ដែលអាចជួយសម្រួលដល់ការដឹកជញ្ជូនកសិផល និងការធ្វើពាណិជ្ជកម្មឆ្លងដែន។
បច្ចុប្បន្នមានគម្រោងវិនិយោគចុះបញ្ជីនៅថ្នាក់ខេត្តចំនួន ៥ ក្រុមហ៊ុន ដែលមានទុនវិនិយោគប្រមាណ ១៦ លានដុល្លារអាមេរិក និងគម្រោងដែលគ្រប់គ្រងដោយក្រុមប្រឹក្សាអភិវឌ្ឍន៍កម្ពុជា (CDC) ចំនួន ៣៩ ក្រុមហ៊ុន ដែលមានទុនវិនិយោគសរុបជាង ៤៣២ លានដុល្លារអាមេរិក។
