កង់បេរ៉ា៖ ក្រុមប្រឹក្សាសាកវប្បកម្មនៃ សហព័ន្ធកសិករជាតិអូស្ត្រាលី (National Farmers’ Federation Horticulture Council) កំពុងអំពាវនាវដល់អ្នករៀបចំគោលនយោបាយ សុំឱ្យលើកលែងកម្មករចំណាកដោយព្រមានថា ការកាត់បន្ថយកម្លាំងពលកម្មតាមរដូវ នឹងធ្វើឱ្យផលិតកម្មស្បៀងអាហារថយចុះ និងតម្លៃអាហារឡើងថ្លៃសម្រាប់អ្នកប្រើប្រាស់។
លោក រីឆាត សាណុន (Richard Shannon) នាយកប្រតិបត្តិនៃក្រុមប្រឹក្សាសាកវប្បកម្មនៃសហព័ន្ធកសិករជាតិអូស្ត្រាលី បាននិយាយថា ទំនាក់ទំនងរវាងគោលនយោបាយអន្តោប្រវេសន៍ និងសន្តិសុខស្បៀងអាហារ គេតែងតែមើលរំលង។
លោកបាននិយាយថា «ប្រជាជនអូស្ត្រាលីរំពឹងថា រាល់ថ្ងៃនឹងមានអាហារស្រស់មានគុណភាពខ្ពស់ និងតម្លៃសមរម្យនៅលើធ្នើផ្សារទំនើប។ រឿងនេះអាចធ្វើបានពីព្រោះមានកម្លាំងពលកម្មតាមរដូវធ្វើដំណើរទៅកាន់តំបន់ជនបទ នានានៃអូស្ត្រាលី នៅពេលដំណាំដល់ពេលប្រមូលផល»។
យោងតាមភា្នក់ងារការងារ និងជំនាញរបស់អូស្ត្រាលី (Jobs and Skills Australia) កម្មករភាគច្រើននៅក្នុងវិស័យសាកវប្បកម្ម គឺជាកម្មករចំណាកស្រុក ដែលបានធ្វើឱ្យវិស័យសាកវប្បកម្មក្លាយជាវិស័យពឹងផ្អែកលើជនអន្តោប្រវេសន៍ខ្លាំងបំផុត នៅក្នុងខ្សែសង្វាក់ផ្គត់ផ្គង់ស្បៀងអាហាររបស់ប្រទេសអូស្តាលី។
កម្មកររបស់កម្មវិធី កម្មករធ្វើការក្នុងពេលឈប់សម្រាក (Working Holiday Maker) មានកម្លាំងកម្មករអន្តោប្រវេសន៍ប្រហែលជាងពាក់កណ្តាលនៃកម្លាំងពលកម្មក្រៅម៉ោងនៅក្នុងវិស័យនេះអំឡុងពេលប្រមូលផលធំ ដែលត្រូវការកម្មករច្រើនបំផុត។
ក្នុងឆ្នាំ២០២៤-២០២៥ ឧស្សាហកម្មនេះបានផលិតបន្លែផ្លែឈើ និងគ្រាប់ធញ្ញជាតិ មានតម្លៃសរុបចំនួន១៩,៥ពាន់លានដុល្លារ ដែលភាគច្រើនបំផុតផលិតសម្រាប់អ្នកប្រើប្រាស់ក្នុងប្រទេសអូស្ត្រាលី។
លោក រីឆាត សាណុន បានព្រមានចំពោះការធ្វើកំណែទម្រង់ ដែលមានគោលបំណងកាត់បន្ថយចំនួនកម្មករអន្តោប្រវេសន៍ ដោយមិនគិតពីផលប៉ះពាល់ជាបន្តបន្ទាប់។
លោកបាននិយាយថា «យើងសូមប្រុងប្រយ័ត្នចំពោះកំណែទម្រង់ ដែលបង្កើតឡើងដើម្បីប្តូរតួលេខ ប៉ុន្តែចុងក្រោយបែរជាបំផ្លាញបន្តិចម្តងៗនូវប្រព័ន្ធផ្គត់ផ្គង់កម្មករ ដែលកសិកររបស់យើងត្រូវការ ហើយការកាត់បន្ថយចំនួនកម្មករមានបទពិសោធន៍ ដែលត្រូវវិលត្រឡប់មកធ្វើការនៅក្នុងកសិដ្ឋានជាលើកទីពីរ ឬទីបី ហើយក៏ផ្ទុយនឹងគោលដៅរបស់រដ្ឋាភិបាល និងតម្រូវការសេដ្ឋកិច្ចជាបន្ទាន់របស់ប្រទេស ក្នុងការលើកកម្ពស់ផលិតភាព»។
ក្រុមប្រឹក្សាសាកវប្បកម្មនៃសហព័ន្ធកសិករជាតិអូស្ត្រាលី ក៏ប្រឆាំងនឹងសំណើ ដែលចង់ភ្ជាប់កម្មករអន្តោប្រវេសន៍ទៅនឹងការអនុញ្ញាតសាងសង់លំនៅឋានផងដែរ ព្រោះកម្មករធ្វើការក្នុងពេលឈប់សម្រាក ភាគច្រើនរស់នៅក្នុងកន្លែងស្នាក់នៅរបស់កសិដ្ឋាន ឬកន្លែងស្នាក់នៅបណ្តោអាសន្នតាមតំបន់ជនបទ ហើយពួកគេមិនបានប្រកួតប្រជែងដណ្តើមយកលំនៅឋាននៅតំបន់ជនបទជាមួយប្រជាជនអូស្ត្រាលីទេ។
លោក រីឆាត សាណុន នាយកប្រតិបត្តិនៃក្រុមប្រឹក្សាសាកវប្បកម្មនៃសហព័ន្ធកសិករជាតិអូស្ត្រាលី បានបញ្ចប់ថា «ប្រសិនបើកសិករមិនអាចទទួលបានកម្មករ នៅពេលដំណាំត្រូវប្រមូលផល នោះផលិតកម្មស្បៀងអាហារនឹងធ្លាក់ចុះ ថ្លៃដើមនឹងកើនឡើង ហើយប្រជាជនអូស្ត្រាលីនឹងត្រូវចំណាយថ្លៃខ្ពស់ជាងមុនសម្រាប់ម្ហូបអាហារស្រស់ៗ»។ (ផាន់ អាណា)
