ដោយ ហៃ ស៊ីណា
បាត់ដំបង៖ នៅដើមសប្តាហ៍នេះ ក្រុមហ៊ុននាំចេញអង្ករដ៏ធំមួយ នៅខេត្តបាត់ដំបង ឈ្មោះ ស៊ីធី រ៉ាយស៍ អ៊ឹមផត អិចផត ខូ អិលធីឌី បានចាប់ផ្តើមទិញស្រូវពីកសិករតាមកិច្ចសន្យា ដែលបានព្រមព្រៀង និងចុះហត្ថលេខាជាមួយក្រុមកសិករអ្នកផលិតស្រូវរួចហើយ។
ការចុះទិញស្រូវរបស់ក្រុមហ៊ុនកែច្នៃអង្ករខាងលើ បន្ទាប់ពីថ្មីៗនេះ ភាគីខាងរោងម៉ាស៊ីន និងក្រុមអ្នកផលិតស្រូវបានចុះកិច្ចសន្យាមួយ ដែលប្រព្រឹត្តិទៅដោយតំណាងសមាគម៏បណ្តាញកសិករតេជោ នៅទីស្នាក់ការធានាគាអភិវឌ្ឍន៍ជនបទ និងកសិកម្ម (ARDB)។
ឯកឧត្តម ឡាយ ឈុនហាំង នាយកទូទៅក្រុមហ៊ុនស៊ីធី រ៉ាយស៍ អ៊ឹមផត អិចផត ខូ អិលធីឌី និងជាអនុប្រធានបណ្តាញកសិករតេជា ប្រចាំខេត្តបាត់ដំបង បានមានប្រសាសន៍ថា ទើបចាប់ផ្តើមការច្រូតកាត់ ការប្រមូលទិញរបស់ក្រុមហ៊ុនបានជាង១ ០០០តោន នៅប្រភេទស្រូវបីប្រភេទ OM5451 ទិញក្នុងតម្លៃ៩៧០រៀល ស្រូវស្រងែ១ ០២០រៀល និងស្រូវសែនក្រអូប តម្លៃ១ ០៥០រៀល ក្នុងមួយគីឡូក្រាម។
ឯកឧត្តម ឡាយ ឈុនហាំង បានបញ្ជាក់ទៀតថា ការប្រមូលទិញស្រូវចូលរបស់ក្រុមហ៊ុនមានទាំងកិច្ចសន្យាកសិកម្មបានចុះជាមួយក្រុមផលិតតាមស្រុក និងការប្រមូលទិញពីកសិករផ្ទាល់ ហើយកសិករក្នុងសមាគមបណ្តាញកសិករតេជោ មានទីផ្សារច្បាស់លាស់ ព្រមទាំងទទួលបានអត្តប្រយោជន៍តម្លៃបន្ថែម ជាពិសេសមានទីផ្សារមួយច្បាស់លាស់ផងដែរ។
តំណាងក្រុមហ៊ុនកែច្នៃអង្ករខាងលើបានបន្ថែមថា ការចាប់ផ្តើមអនុវត្តកិច្ចសន្យានេះ គឺជាដំណឹងដ៏ល្អសម្រាប់កសិករក្នុងកិច្ចសន្យា ព្រោះវាជួយបង្កើនភាពច្បាស់លាស់ក្នុងការរកទីផ្សារ និងរៀបចំផែនការផលិតកម្មបានកាន់តែប្រសើរ។ ជាមួយគ្នានេះ តម្លៃទីផ្សារស្រូវបូកជាមួយប្រាក់លើកទឹកចិត្តនឹងត្រូវអនុវត្តដោយផ្អែកលើស្ថានភាពទីផ្សារស្រូវពិតប្រាកដ គុណភាពស្រូវ និងលក្ខខណ្ឌ ដែលបានព្រមព្រៀងក្នុងកិច្ចសន្យា ដោយផ្តោតលើភាពត្រឹមត្រូវ តម្លាភាព និងផលប្រយោជន៍របស់កសិករ។
លោកបានរំពឹងទុកថា ការទិញតាមកិច្ចសន្យាក៏ជួយកាត់បន្ថយភាពមិនប្រាកដប្រជាផ្នែកទីផ្សារ និងផ្តល់ឱកាសឱ្យកសិករទទួលបានទីផ្សារ ដែលមានការរៀបចំច្បាស់លាស់។ ដូច្នេះ បងប្អូនកសិករទាំងអស់ខិតខំថែទាំស្រូវ យកចិត្តទុកដាក់លើគុណភាព និងអនុវត្តតាមបច្ចេកទេសកសិកម្មល្អ ដើម្បីឱ្យផលិតផលមានគុណភាពខ្ពស់ និងអាចទទួលបានតម្លៃល្អនៅពេលប្រមូលផល។
បន្ថែមពីនេះ ការខិតខំប្រឹងប្រែងរបស់កសិករ គឺជាមូលដ្ឋានសំខាន់សម្រាប់សន្តិសុខស្បៀង និងការរីកចម្រើននៃវិស័យកសិកម្មកម្ពុជា។ កសិករមិនត្រូវបាក់ទឹកចិត្តចំពោះការប្រែប្រួលតម្លៃទីផ្សារ តែត្រូវបន្តពង្រឹងគុណភាព ផលិតតាមតម្រូវការទីផ្សារ និងចូលរួមក្នុងការលក់តាមប្រព័ន្ធកិច្ចសន្យា ដើម្បីបង្កើនអំណាចចរចា និងផលប្រយោជន៍របស់កសិករ។
ជារួមវិញ សមាគម៏បណ្តាញកសិករតេជោ និងក្រុមហ៊ុន ស៊ីធី រ៉ាយស៍ អ៊ឹមផត អិចផត ខូ អិលធីឌី នឹងបន្តពង្រឹងកិច្ចសហការជាមួយកសិករ ដើម្បីរួមគ្នាបង្កើតទីផ្សារ ដែលមានភាពច្បាស់លាស់ និងមាននិរន្តរភាព៕
