ដោយ នៅ ស៊ីវុត្ថា
ភ្នំពេញ៖ ប្រទេសកម្ពុជាកំពុងពង្រឹងសមត្ថភាពក្នុងការវាស់វែង និងប្រមូលទិន្នន័យការបំភាយឧស្ម័នមេតានពីការដាំស្រូវ ដើម្បីគាំទ្រដល់ការកាត់បន្ថយឧស្ម័នផ្ទះកញ្ចក់ និងជំរុញវិស័យស្រូវឱ្យឈានទៅរកផលិតកម្ម ដែលមានការបំភាយកាបូនទាប។
ប្រទេសកម្ពុជាបានប្តេជ្ញាកាត់បន្ថយការបំភាយឧស្ម័នមេតានចំនួន២០ភាគរយ នៅឆ្នាំ២០៣០ និង៥០ភាគរយ នៅឆ្នាំ២០៥០ ព្រមទាំងបង្កើតទិន្នន័យ ដែលជាគន្លឹះសម្រាប់រៀបចំវិធានការកាត់បន្ថយការបំភាយឧស្ម័នប្រកបដោយប្រសិទ្ធភាព។
វិទ្យាស្ថានស្រាវជ្រាវស្រូវអន្តរជាតិ (International Rice Research Institute) សហការជាមួយវិទ្យាស្ថានកំណើនបៃតងសកល (Global Green Growth Institute) និងសាកលវិទ្យាល័យភូមិន្ទភ្នំពេញ បានរៀបចំសិក្ខាសាលាបណ្តុះបណ្តាល ស្តីពីការអភិវឌ្ឍកត្តាបំភាយឧស្ម័នមេតានជាក់លាក់តាមប្រទេសសម្រាប់ផលិតកម្មស្រូវ។
កម្មវិធីនេះបានប្រមូលផ្តុំអ្នកស្រាវជ្រាវ មន្ត្រីរាជការ និងអ្នកជំនាញបច្ចេកទេសកម្ពុជា ដើម្បីពង្រឹងជំនាញក្នុងការវាស់វែង និងវិភាគការបំភាយឧស្ម័នពីវាលស្រែ ដោយប្រើប្រាស់វិធីសាស្ត្រវិទ្យាសាស្ត្រ និងឧបករណ៍តាមស្តង់ដារ។
ក្នុងការបណ្តុះបណ្តាលនេះ អ្នកចូលរួមបានសិក្សាអំពីដំណើរការវាស់វែងឧស្ម័នមេតាន ចាប់ពីការជ្រើសរើសទីតាំងសិក្សា ការដំឡើងឧបករណ៍ប្រមូលសំណាក ការវិភាគឧស្ម័នក្នុងមន្ទីរពិសោធន៍ រហូតដល់ការគណនាបរិមាណការបំភាយ។
ការសិក្សាផ្ទាល់នៅទីវាលត្រូវបានធ្វើឡើងនៅខេត្តកំពង់ធំ ដែលជាផ្នែកមួយនៃការបង្កើនសមត្ថភាពអ្នកជំនាញក្នុងការប្រមូលទិន្នន័យពីប្រព័ន្ធផលិតកម្មស្រូវពិតប្រាកដនៅកម្ពុជា។
តំណាងក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ការបណ្តុះបណ្តាលនេះនឹងជួយឱ្យប្រទេសកម្ពុជាអាចសិក្សាអំពីការបំភាយឧស្ម័នមេតានដោយខ្លួនឯង តាមវិធីសាស្ត្រកម្រិតទី២ ដែលផ្អែកលើទិន្នន័យក្នុងស្រុក និងមានភាពត្រឹមត្រូវជាងមុន។
ជាមួយគ្នានេះ ការមានទិន្នន័យច្បាស់លាស់អំពីការបំភាយឧស្ម័នមេតាន ក៏អាចជួយកម្ពុជាកំណត់វិធានការកាត់បន្ថយការបំភាយដែលសមស្រប ដូចជាការគ្រប់គ្រងទឹកក្នុងស្រែឱ្យមានប្រសិទ្ធភាព និងការអនុវត្តបច្ចេកទេសកសិកម្មឆ្លាតវៃតាមអាកាសធាតុ។
វិស័យស្រូវមានសារៈសំខាន់ខ្លាំងសម្រាប់កសិករកម្ពុជារាប់លាននាក់ និងជាមូលដ្ឋានគ្រឹះសម្រាប់សន្តិសុខស្បៀងជាតិ។ ប៉ុន្តែវិស័យនេះក៏កំពុងប្រឈមនឹងផលប៉ះពាល់ពីការប្រែប្រួលអាកាសធាតុ ដូចជា ភាពមិនទៀងទាត់នៃទឹកភ្លៀង ការខ្វះទឹកស្រោចស្រព និងការកើនឡើងសីតុណ្ហភាព។
វិទ្យាស្ថានស្រាវជ្រាវស្រូវអន្តរជាតិកំពុងសហការជាមួយរាជរដ្ឋាភិបាលកម្ពុជា ដើម្បីជំរុញការអភិវឌ្ឍពូជស្រូវ ការអនុវត្តកសិកម្មប្រកបដោយនិរន្តរភាព និងបច្ចេកវិទ្យាផលិតកម្ម ដែលអាចកាត់បន្ថយការបំភាយឧស្ម័ន។
អ្នកជំនាញចាត់ទុកថា ការបង្កើតទិន្នន័យឧស្ម័នមេតានជាក់លាក់សម្រាប់កម្ពុជានឹងមិនត្រឹមតែជួយប្រទេសសម្រេចគោលដៅអាកាសធាតុប៉ុណ្ណោះទេ ប៉ុន្តែថែមទាំងអាចលើកកម្ពស់ភាពប្រកួតប្រជែងរបស់អង្ករកម្ពុជា នៅទីផ្សារអន្តរជាតិ ដែលកាន់តែផ្តោតលើផលិតផលកសិកម្មបៃតង និងមាននិរន្តរភាព។
គំនិតផ្តួចផ្តើមនេះ ទទួលបានការគាំទ្រពីមជ្ឈមណ្ឌលមេតានសកល (Global Methane Hub) និងមូលនិធិសហប្រតិបត្តិការអាស៊ាន-កូរ៉េ ដើម្បីជួយប្រទេសកម្ពុជាអាចកសាងវិស័យស្រូវ ដែលមានភាពធន់នឹងអាកាសធាតុ និងបញ្ចេញឧស្ម័នតិច៕
