ម៉ានីល៖ ប្រទេសហ្វីលីពីនបាននាំចេញផ្លែម្នាស់ស្រស់ពីកោះមីនដាណាវ (Mindanao) ទៅកាន់ប្រទេសអេមីរ៉ាត អារ៉ាប់រួម ដោយពង្រីកលទ្ធភាពចូលទៅកាន់ទីផ្សារសម្រាប់ការនាំចេញផ្លែឈើរបស់ប្រទេសហ្វីលីពីន។
ក្រសួងកសិកម្មហ្វីលីពីន បានប្រារព្ធពិធីបញ្ជូនផ្លែម្នាស់ជាផ្លូវការ កាលពីថ្ងៃទី៦ ខែមិថុនា ឆ្នាំ២០២៦ នៅកំពង់ផែក្នុងទីក្រុងដាវ៉ៅ (Davao) សម្រាប់ការដឹកជញ្ជូនទៅកាន់កំពង់ផែប្រទេសអេមីរ៉ាត អារ៉ាប់រួម។
ការដឹកជញ្ជូននេះ ត្រូវបានរៀបចំឡើងដោយក្រុមហ៊ុននាំចេញផ្លែម្នាស់ ពូជ អឹមឌី២ (MD2) ស្រស់ចំនួន១៨តោន ដែលខ្ចប់ក្នុង១ ៥០០ប្រអប់។ ផ្លែម្នាស់នេះមានប្រភពមកពីកសិដ្ឋាននៅភាគខាងត្បូងប្រទេសហ្វីលីពីន ហើយត្រូវបានគេរំពឹងថា នឹងដឹកដល់ប្រទេសអេមីរ៉ាត អារ៉ាប់រួម នៅថ្ងៃទី២៥ ឬ២៦ ខែមិថុនា ឆ្នាំ២០២៦នេះ។
យោងតាមអាជ្ញាធរស្ថិតិហ្វីលីពីន បានឱ្យដឹងថា ម្នាស់គឺជាផលិតផលនាំចេញឈានមុខគេរបស់ប្រទេសហ្វីលីពីន សម្រាប់នាំចេញទៅកាន់ទីផ្សារប្រទេសអេមីរ៉ាត អារ៉ាប់រួម។
រដ្ឋមន្ត្រីក្រសួងកសិកម្មហ្វីលីពីន លោក ហ្វ្រេនស៊ីស្កូ ធៀវ ឡូរ៉ែល បានមានប្រសាសន៍ថា ការនាំចេញនេះ គឺជាលទ្ធផលនៃកិច្ចខិតខំប្រឹងប្រែង ដើម្បីពង្រីកទីផ្សារក្រៅប្រទេសសម្រាប់ផលិតផលកសិកម្មរបស់ហ្វីលីពីន។
លោករដ្ឋមន្ត្រីបានមានប្រសាសន៍ថា “ផលិតផលហ្វីលីពីនគ្រប់ប្រភេទ ដែលឈានដល់ទីផ្សារថ្មី ឬមានស្រាប់ គែបង្ហាញឱ្យឃើញនូវប្រាក់ចំណូលកាន់តែច្រើនសម្រាប់កសិករ ការងារកាន់តែច្រើនសម្រាប់កម្មករ និងផ្តល់តម្លៃកាន់តែច្រើន នៅតាមផ្ទះ។ នោះហើយជាមូលហេតុ ដែលយើងកំពុងខិតខំស្វែងរកឱកាសនាំចេញថ្មីៗ សម្រាប់វិស័យកសិកម្មហ្វីលីពីន។”
លោក ហ្វ្រេនស៊ីស្កូ ធៀវ ឡូរ៉ែល បានបន្ថែមថា “គោលដៅរបស់យើងមិនមែនគ្រាន់តែ ដើម្បីនាំចេញផលិតផលកាន់តែច្រើនប៉ុណ្ណោះទេ ប៉ុន្តែដើម្បីកសាងវិស័យកសិកម្មកាន់តែរឹងមាំ និងមានការប្រកួតប្រជែង ដែលកសិករហ្វីលីពីនទទួលបានអត្ថប្រយោជន៍ដោយផ្ទាល់ពីឱកាសទីផ្សារពិភពលោក។”
ក្រសួងកសិកម្មហ្វីលីពីន បាននិយាយថា ការដឹកជញ្ជូនត្រូវបានបញ្ចប់ ទោះបីជាមានការរំខានផ្នែកភស្តុភារ និងការកើនឡើងថ្លៃដឹកជញ្ជូន ដោយសារវិបត្តិនៅតំបន់ឈូងសមុទ្រក៏ដោយ។ ក្រសួងក៏បានកត់សម្គាល់ផងដែរថា ការនាំចេញផ្លេម្នាស់បង្ហាញពីការអនុលោមតាមតម្រូវការភូតគាមអនាម័យរបស់អេមីរ៉ាត អារ៉ាប់រួម និងស្តង់ដារនាំចូល។
មន្ត្រីកសិកម្ម បាននិយាយថា ការនាំចេញនេះអាចគាំទ្រដល់ឱកាសពាណិជ្ជកម្មបន្ថែមទៀត នៅក្នុងតំបន់ឈូងសមុទ្រ និងពង្រឹងទំនាក់ទំនងពាណិជ្ជកម្មកសិកម្មជាមួយអេមីរ៉ាត អារ៉ាប់រួម។
គំនិតផ្តួចផ្តើមនេះក៏ជាផ្នែកមួយនៃកិច្ចខិតខំប្រឹងប្រែងកាន់តែខ្លាំង ដើម្បីកាត់បន្ថយឱនភាពពាណិជ្ជកម្មកសិកម្មរបស់ហ្វីលីពីន ដែលមានទឹកប្រាក់ចំនួនជាង១១ពាន់លានដុល្លារ ក្នុងឆ្នាំ២០២៥។
អនិវត្តតាមសារាចរណែនាំរបស់ប្រធានាធិបតីហ្វីលីពីន ក្រសួងកសិកម្មបានបន្តកិច្ចខិតខំប្រឹងប្រែង ដើម្បីបើកទីផ្សារនាំចេញថ្មីសម្រាប់ផលិតផលកសិកម្មរបស់ហ្វីលីពីន ក្នុងគោលបំណងបង្កើនប្រាក់ចំណូលពីការនាំចេញ និងធ្វើឱ្យប្រសើរឡើងនូវតុល្យភាពពាណិជ្ជកម្មកសិកម្មរបស់ប្រទេសហ្វីលីពីន៕ (ផាន់ អាណា)
