ញូវយ៉ក៖ ក្នុងកិច្ចខិតខំប្រឹងប្រែងរុញច្រាននិងលើកកម្ពស់កេរ្តិ៍ឈ្មោះអង្ករខ្មែរនៅលើទីផ្សារអន្តរជាតិ ឯកឧត្តម បាន លីម អគ្គនាយករងនៃធនាគារអភិវឌ្ឍន៍ជនបទ និងកសិកម្ម (ARDB) និងជាតំណាងដ៏ខ្ពង់ខ្ពស់របស់ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ARDB បានអញ្ជើញចូលរួមក្នុងកម្មវិធីពិព័រណ៍ម្ហូបអាហារដ៏ធំប្រចាំឆ្នាំ “Fancy Food Show” នៅបុរីយូវយ៉ក សហរដ្ឋអាម៉េរិក ដោយសហការយ៉ាងជិតស្និទ្ធជាមួយសហព័ន្ធស្រូវអង្ករកម្ពុជា។
ព្រឹត្តិការណ៍នេះ គឺជាការបើកទំព័រថ្មីមួយទៀតសម្រាប់វិស័យស្រូវអង្ករកម្ពុជា ក្នុងការបង្ហាញពីសក្តានុពល គុណភាព និងស្តង់ដារខ្ពស់នៃអង្ករខ្មែរទៅកាន់ពិភពលោក តាមរយៈកិច្ចសហការរវាងស្ថាប័នគន្លឹះទាំងពីរ៖
- ធនាគាអភិវឌ្ឍន៍ជនបទ និងកសិកម្ម៖ ក្រោមការដឹកនាំរបស់ឯកឧត្តមបណ្ឌិត កៅ ថាច បានបង្ហាញពីការប្តេជ្ញាចិត្តយ៉ាងមុតមាំក្នុងការគាំទ្រផ្នែកហិរញ្ញប្បទានដល់ខ្សែច្រវាក់តម្លៃកសិកម្ម ជួយជំរុញសមត្ថភាពផលិតកម្ម និងការកែច្នៃអង្ករកម្ពុជាឱ្យស្របតាមស្តង់ដារតម្រូវការខ្ពស់របស់ទីផ្សារអាម៉េរិក និងអឺរ៉ុប។
- សហព័ន្ធស្រូវអង្ករកម្ពុជា៖ ក្រោមការដឹកនាំរបស់ឧកញ៉ា ឡាយ ឈុនហួរ បានដើរតួជាស្ពានចម្លងដ៏សំខាន់ក្នុងការសម្របសម្រួល និងបើកទីផ្សារថ្មីៗ ដោយនាំយកក្រុមហ៊ុននាំចេញអង្ករលំដាប់កំពូលៗរបស់កម្ពុជា ទៅជួបពិភាក្សា និងចងសម្ព័ន្ធភាពពាណិជ្ជកម្មផ្ទាល់ជាមួយអ្នកបញ្ជាទិញធំៗនៅលើពិភពលោក។
នៅក្នុងព្រឹត្តិការណ៍ពិព័រណ៍ម្ហូបអាហារនេះ ក្រុមហ៊ុននាំចេញអង្ករ និងសហគ្រាសឈានមុខគេរបស់កម្ពុជាចំនួនប្រាំបួន បានរួមគ្នាយ៉ាងសកម្មក្នុងការដាក់តាំងបង្ហាញផលិតផលអង្ករប្រណីតៗ របស់កម្ពុជា ដើម្បីបង្ហាញពីភាពសម្បូរបែប និងស្តង់ដារខ្ពស់នៃអង្ករខ្មែរ៖
1-Daily Fresh Foods ( Cambodia) Co., Ltd.
2-City Rice Import Export Co., Ltd.
3- Lor Eak Heng Sek Meas Rice Co., Ltd.
4-Primalis Corporation., Ltd.
5-Khmer Food Group Co., Ltd.
6-Golden Rice (Cambodia) Co., Ltd.
7-Golden Star Rice Mill and Import Export Co., Ltd.
8-Indochina Rice Mill Co., Ltd.
9- Signature Rice Co., Ltd.
ការចូលរួមពីសំណាក់ក្រុមហ៊ុនទាំងនេះ មិនត្រឹមតែជាឱកាសក្នុងការស្វែងរកដៃគូពាណិជ្ជកម្មថ្មីៗប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីច្រវាក់ផលិតកម្មប្រកបដោយនិរន្តរភាព និងការទទួលខុសត្រូវខ្ពស់ ដែលឆ្លើយតបទៅនឹងនិន្នាការ និងតម្រូវការប្រើប្រាស់របស់ទីផ្សារសហរដ្ឋអាម៉េរិកយ៉ាងពិតប្រាកដ។
កម្មវិធីពិព័រណ៍ម្ហូបអាហារ នៅបុរីញូវយ៉កនេះ ត្រូវបានរំពឹងថា នឹងជួយបង្កើនទំហំនាំចេញអង្ករកម្ពុជាទៅកាន់ទីផ្សារអាម៉េរិកបន្ថែមទៀត ព្រមទាំងពង្រឹងទំនុកចិត្តលើម៉ាកយីហោអង្ករជាតិ។
នាគាអភិវឌ្ឍន៍ជនបទ និងកសិកម្ម និងសហព័ន្ធស្រូវអង្ករកម្ពុជា ឈានមុខគេនៅលើតុអាហាររបស់ប្រជាជនទូទាំងសកលលោក៕
