ហូជីមិញ៖ តាមរយៈភាពជាដៃគូជាមួយបណ្តាក្រុមហ៊ុនសហគ្រាសផលិតម្នាស់ពូជ MD2 សម្រាប់ការកែច្នៃ កសិករវៀតណាម ត្រូវបានធានាការលក់នៅលើទីផ្សារប្រកបដោយស្ថិរភាព និងអាចរកប្រាក់ចំណេញបានជាប់លាប់។
ក្នុងរយៈពេលប៉ុន្មានឆ្នាំថ្មីៗនេះ ការប្រែប្រួលអាកាសធាតុបានជះឥទ្ធិពលយ៉ាងខ្លាំងដល់ផលិតកម្មកសិកម្មវៀតណាម ជាពិសេសលើការដាំដុះម្នាស់។ ការឡើងកម្តៅ រលកកម្តៅអូសបន្លាយពេលយូរ និងរបបទឹកភ្លៀងប្រែប្រួលខុសប្រក្រតី បានជះឥទ្ធិពលដល់ការលូតលាស់របស់ដំណាំ។ ការដាំដុះបន្តបន្ទាប់គ្នាជាច្រើនឆ្នាំ បានធ្វើឱ្យជីជាតិដីថយចុះជាលំដាប់ ដែលបង្កជាបញ្ហាប្រឈមយ៉ាងខ្លាំងដល់ផលិតកម្មម្នាស់ក្នុងស្រុក។
ទោះជាយ៉ាងណាក៏ដោយ ដោយសារតែការប្រែប្រួលអាកាសធាតុ និងស្ថានភាពគុណភាពដីធ្លាក់ចុះ ដើមម្នាស់ងាយរងគ្រោះជាងមុន។ ការលូតលាស់ និងទិន្នផលលែងឆ្លើយតបនឹងការរំពឹងទុក ដែលនេះបានគូសបញ្ជាក់ពីតម្រូវការចាំបាច់សម្រាប់ដំណោះស្រាយកសិកម្មឱ្យសមស្របជាងមុន។
យោងតាមប្រធានក្រុមប្រឹក្សាភិបាលនៃសហករណ៍កសិកម្មក្នុងស្រុកតំបន់ បានឱ្យដឹងថា លក្ខខណ្ឌអាកាសធាតុ និងដីកំពុងជះឥទ្ធិពលដល់ផលិតកម្ម។
លោកបាននិយាយថា «ការធ្លាក់ចុះគុណភាពពូជ បច្ចុប្បន្នជាបញ្ហាប្រឈមធំបំផុត។ ដីក៏បានថយចុះជីជាតិផងដែរ បន្ទាប់ពីការដាំដុះអស់រយៈពេលជាច្រើនឆ្នាំ។ បន្ថែមលើនេះ សីតុណ្ហភាពក្នុងរយៈពេលប៉ុន្មានឆ្នាំចុងក្រោយនេះ ជួនកាលបានឡើងដល់៣០-៤០អង្សា ដែលខ្ពស់ជាងកាលពីមុនយ៉ាងខ្លាំង ជាលទ្ធផលធ្វើឱ្យរុក្ខជាតិលូតលាស់មិនបានល្អ»។
ដើម្បីឆ្លើយតបទៅនឹងបញ្ហាប្រឈមទាំងនេះ ម្នាស់ពូជ MD2 ត្រូវបានគេទទួលស្គាល់ថា ជាពូជ ស័ក្តិសមបំផុតទៅនឹងលក្ខខណ្ឌអាកាសធាតុ និងដីនានានៅពេលបច្ចុប្បន្ន។ ពូជនេះមានភាពរឹងមាំ មានភាពធន់នឹងសត្វល្អិត និងជំងឺ ព្រមទាំងភាពបត់បែនទៅនឹងដីអាស៊ីត និងអាកាសធាតុក្តៅសើម នៃតំបន់ដី
សណ្តទន្លេមេគង្គ ព្រមទាំងរក្សាបាននូវទិន្នផលមានស្ថេរភាព។
យោងតាមគំរូផលិតកម្ម ទិន្នផលម្នាស់ពូជ MD2 មានចន្លោះចាប់ពី៥០ ដល់៦០តោន ក្នុងមួយហិកតា។ ចំណែកតម្លៃទិញតាមកិច្ចសន្យាក្នុង៨ ០០០ដុង ឬស្មើនឹង០,៣០ដុល្លារ ក្នុងមួយគីឡូក្រាម។ អ្នកដាំដុះអាចរកចំណូលបានប្រចាំឆ្នាំរហូតដល់១៥០លានដុង ឬស្មើនឹង៥ ៧០០ដុល្លារ ក្នុងមួយហិកតា។ នេះគឺជាប្រភពចំណូលដ៏មានស្ថិរភាពមួយ ដែលជួយលើកកម្ពស់ជីវភាពរស់នៅរបស់កសិករវៀតណាម និងកាត់បន្ថយហានិភ័យក្នុងផលិតកម្ម។
ក្រៅពីអត្ថប្រយោជន៍សេដ្ឋកិច្ច គំរូដាំដុះម្នាស់ពូជ MD2 ក៏ជួយកាត់បន្ថយថ្លៃដើមផលិតកម្មផងដែរ តាមរយៈការប្រើប្រាស់កម្រាលប្លាស្ទិក ដែលជួយទប់ស្កាត់ស្មៅ និងបង្កើនការរក្សាសំណើមនៅក្នុងដី។ ការអនុវត្តកសិកម្មក៏ត្រូវបានលើកកម្ពស់តាមរយៈការប្រើប្រាស់ជី និងថ្នាំការពារដំណាំប្រកបដោយប្រសិទ្ធភាពខ្ពស់ ដែលជួយកាត់បន្ថយផលប៉ះពាល់ដល់បរិស្ថាន និងស្របទៅតាមគោលការណ៍នៃកសិកម្មបៃតង និងប្រកបដោយចីរភាព។
ក្រោមការរៀបចំកសិកម្មតាមកិច្ចសន្យា កសិករដែលចូលរួមអាចមានទីផ្សារម្នាស់ តាមរយៈកិច្ចព្រមព្រៀងទិញ-លក់ជាមួយបណ្តាក្រុមហ៊ុនសហគ្រាស ដែលជួយឱ្យការលក់ផលិតផលមានស្ថិរភាព និងកាត់បន្ថយហានិភ័យនៃតម្លៃទីផ្សារ។ កត្តានេះជួយឱ្យអ្នកដាំដុះអាចបណ្តាក់ទុនលើផលិតកម្មដោយមានទំនុកចិត្តកាន់តែខ្លាំង និងមានផែនការច្បាស់លាស់ក្នុងរយៈពេលវែង។
ពូជម្នាស់ MD2 ត្រូវបានប្រជាជនវៀតណាមចាត់ទុកថា ជាជម្រើសដ៏សមស្របមួយ ដោយសារតែវាមានភាពធន់នឹងកម្តៅខ្លាំង និងអាចផ្តល់ផលចំណេញសេដ្ឋកិច្ចប្រកបដោយស្ថិរភាព៕ (ញឹក សំអូន)
