អាំស្ទើដាំ៖ ប្រទេសកាហ្សាក់ស្ថាន និងប្រទេសហូឡង់ បានចុះហត្ថលេខាលើកិច្ចព្រមព្រៀង និងឈានដល់ការរៀបចំគម្រោងរួម ដែលមានតម្លៃទឹកប្រាក់ជិត១៨៥លានដុល្លារ ក្នុងអំឡុងវេទិកាធុរកិច្ចកាហ្សាក់ស្ថាន-ហូឡង់ ឆ្នាំ២០២៦ ដែលរៀបចំឡើងនៅទីក្រុងអាំស្ទើដាំ ប្រទេសហូឡង់។
វេទិកានេះ គឺជាព្រឹត្តិការណ៍នៃបេសកកម្មពាណិជ្ជកម្ម និងសេដ្ឋកិច្ចរបស់ប្រទេសកាហ្សាក់ស្ថានទៅកាន់ប្រទេសហូឡង់ កាលពីថ្ងៃទី៩ ខែមិថុនា ឆ្នាំ២០២៦ ដោយមានការប្រមូលផ្តុំក្រុមហ៊ុន និងអង្គការជាង៥០០ស្ថាប័ន មកពីជាង៤០ប្រទេស ព្រមទាំងភ្ញៀវមកចូលរួមពី១២០ប្រទេស។
ប្រទេសហូឡង់ គឺជាដៃគូពាណិជ្ជកម្ម និងសេដ្ឋកិច្ចដ៏សំខាន់មួយរបស់ប្រទេសកាហ្សាក់ស្ថាន នៅក្នុងសហភាពអឺរ៉ុប។ ក្នុងខែមករា ដល់ខែកុម្ភៈ ឆ្នាំ២០២៦ ពាណិជ្ជកម្មទ្វេភាគី បានឈានដល់៩៧០លានដុល្លារ កើនឡើង៥៧,៩ភាគរយ ពីមួយឆ្នាំទៅមួយឆ្នាំ។ ចំណែកការនាំចេញរបស់កាហ្សាក់ស្ថាន មានទឹកប្រាក់ចំនួនសរុបជាង៩៣០លានដុល្លារ គឺកើនឡើង៦៥ភាគរយ។
រដ្ឋមន្ត្រីក្រសួងពាណិជ្ជកម្ម និងសមាហរណកម្ម កាហ្សាក់ស្ថាន លោក អាម៉ាន ហ្សាកាលីយេ (Arman Shakkaliyev) បានមានប្រសាសន៍ថា “កិច្ចព្រមព្រៀងថ្ងៃនេះបញ្ជាក់ពីផលប្រយោជន៍ទៅវិញទៅមកដ៏រឹងមាំរបស់អាជីវកម្ម នៅក្នុងប្រទេសទាំងពីរ។ កាហ្សាក់ស្ថានត្រៀមខ្លួនជាស្រេចក្នុងការពង្រីកការផ្គត់ផ្គង់ផលិតផល ដែលមានគុណភាពទៅកាន់ទីផ្សារអឺរ៉ុប និងបង្កើតលក្ខខណ្ឌអំណោយផលសម្រាប់គម្រោងវិនិយោគ ពាក់ព័ន្ធនឹងដៃគូហូឡង់។”
វេទិកាធុរកិច្ចនេះ បានប្រមូលផ្តុំក្រុមហ៊ុនមកពីប្រទេសកាហ្សាក់ស្ថាន លើវិស័យកសិអាហារ ការកែច្នៃម្ហូបអាហារ និងភស្តុភារកម្ម។ អ្នកចូលរួមបានបង្ហាញពីសក្តានុពលនៃការនាំចេញរបស់ខ្លួន ហើយបានរៀបចំកិច្ចប្រជុំតុមូល ជាបន្តបន្ទាប់ជាមួយដៃគូហូឡង់។
នៅក្នុងពិធីនេះ គណៈប្រតិភូកាហ្សាក់ស្ថាន ក៏បានជួបពិភាក្សាជាមួយអង្គការរដ្ឋ និងឯកជនរបស់ប្រទេសហូឡង់ផងដែរ។ ប្រធានបទសំខាន់ៗ អំពីគំរូត្រួតពិនិត្យរបស់ហូឡង់ ដោយផ្អែកលើកិច្ចសហប្រតិបត្តិការរវាងរដ្ឋ និងអង្គការឧស្សាហកម្ម ដែលមានការទទួលស្គាល់ ជាអន្តរជាតិ ដើម្បីគាំទ្រដល់សុវត្ថិភាពផលិតផល និងនីតិវិធីនាំចេញបានឆាប់រហ័សជាពេលមុន។
កិច្ចពិភាក្សាទាំងនេះ បានផ្តោតលើកិច្ចសហប្រតិបត្តិការលើការផលិតពូជ ការបញ្ជាក់ និងការត្រួតពិនិត្យគុណភាពផលិតផលកសិកម្ម ព្រមទាំងពិភាក្សាអំពីការផ្លាស់ប្តូរបទពិសោធន៍ក្នុងការណែនាំប្រព័ន្ធតាមដានបែបទំនើប និងការផ្ទៀងផ្ទាត់អនុលោមភាពស្របតាមតម្រូវការអន្តរជាតិ។
ចំណែកវិស័យដឹកជញ្ជូន និងភស្តុភារកម្ម ក៏ស្ថិតក្នុងរបៀបវារៈផងដែរ ដោយផ្តោតសំខាន់លើការពង្រីកកិច្ចសហប្រតិបត្តិការទ្វេភាគី ក្នុងវិស័យដឹកជញ្ជូនអន្តរជាតិ ការបញ្ចូលផលិតផលកាហ្សាក់ស្ថាន ទៅក្នុងខ្សែសង្វាក់ភស្តុភារកម្មអឺរ៉ុប និងការប្រើប្រាស់តួនាទីរបស់កំពង់ផែរបស់ប្រទេសហូឡង់ ជាមជ្ឈមណ្ឌលដែនសមុទ្រដ៏ធំបំផុតរបស់អឺរ៉ុប ដើម្បីគាំទ្រដល់ការនាំចេញ។
ភាគីទាំងពីរក៏បានពិភាក្សាអំពីការអភិវឌ្ឍបន្ថែមទៀត អំពីការដឹកជញ្ជូនតាមផ្លូវទឹកអន្តរជាតិតាមសមុទ្រកាសព្យែន (Trans-Caspian International Transport Route) ឬច្រករបៀងមជ្ឈិមបូព៌ា (Middle Corridor) ដោយកត់សម្គាល់ពីតួនាទី ដែលកំពុងតែរីកចម្រើនក្នុងការដឹកជញ្ជូនទំនិញរវាងទ្វីបអាស៊ី និងទ្វីបអឺរ៉ុប ចំពេលមានការផ្លាស់ប្តូរខ្សែសង្វាក់ភស្តុភារកម្មសកល ដោយសារសង្គ្រាមអ៊ីរ៉ង់៕ (ផាន់ អាណា)
