ដោយ រស្មី
ខេត្តសៀមរាប៖ ការផ្លាស់ប្តូរទម្លាប់របស់កសិករមួយចំនួនពីការធ្វើកសិកម្មតាមបែបប្រពៃណី មកពឹងផ្អែកលើបច្ចេកវិទ្យា និងទិន្នន័យអាកាសធាតុ គឺជាវិធីសាស្រ្តដ៏មានប្រសិទ្ធភាពមួយ ដើម្បីបង្កើនទិន្នផល កាត់បន្ថយការខូចខាត និងធានាបាននូវការផ្គត់ផ្គង់ទីផ្សារ។
កសិករបាននិងកំពុងធ្វើទំនើបកម្មការដាំដុះបន្លែរបស់ខ្លួនតាមរយៈមធ្យោបាយសំខាន់ៗ ដូចជាចេះមើលអាកាសធាតុតាមរយៈការមើលអែប (APP) នៃការព្យាករណ៍អាកាសធាតុ ឬសូម្បីតែការណែនាំអំពីការដាំដុះនោះបានជួយកសិករឱ្យធ្វើកសិកម្មមិនប្រឈមបញ្ហាដូចមុនទៀត។
លោក ឈុត វិឈាន មន្រ្តីកសិកម្មសង្កាត់ក្របីរៀល ខេត្តសៀមរាប បានបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះប្រជាពលរដ្ឋរស់នៅក្នុងសង្កាត់របស់លោកបានអនុវត្តតាមបច្ចេកវិទ្យាថ្មី ជាពិសេសតែងតែស្វែងយល់ពីការមើលអែប ទាំងទៅលើ ការធ្វើដំណាំកសិកម្មក្នុងនេះ មានទាំងការដាំបន្លែ និងចិញ្ចឹមសត្វទទួលបានលទ្ធផលល្អ។
មន្រ្តីជំនាញកសិកម្មរូបនេះ បានបញ្ជាក់ប្រាប់ទៀតថា ក្នុងចំណោមនេះ អែបកសិឧតុនិយមបានប្រាប់ទៅលើកម្រិតទឹកភ្លៀង ការបំផ្លាញពីសត្វល្អិត និងអ្វីផ្សេងៗទៀតដែលទាំងអស់នេះហើយបានជួយឱ្យកសិករមិនចាំបាច់ប្រឈមនឹងការដាំដុះបន្តទៀត។ ពិសេសនៅសង្កាត់របស់លោកដែលប្រជាកសិកចូលចិត្តដាំបន្លែស្លឹកសម្រាប់លក់ក្នុងនេះដូចជាស្ពៃ សាលាដ ស្ពៃក្រញាញ់ និងស្ពៃចង្កឹះជាដើម។
ដោយឡែកនៅសង្កាត់របស់លោកដោយសារតែមានផ្សារម្ល៉ោះហើយកសិករក៏អាចយកកសិផលរបស់គាត់លក់ និងក្រៅពីនេះក៏អាចយកកសិផលលក់ទៅកាន់ទីផ្សារខេត្តផ្សេងៗទៀតបានដោយឥតជួបបញ្ហាលំបាកដូចមុនទៀតឡើយ។
លោក ឈាត់ ប្រែក រស់នៅភូមិគោកដូង ឃុំក្របីរៀល ក្រុងសៀមរាប ខេត្តសៀមរាបដែលជាដាំបន្លែលក់ជិត១០ឆ្នាំមកនេះ មិនសូវទទួលជោគជ័យប៉ុន្មានទេពោលគឺបានត្រឹមតែអាចរកថវិការ គ្រាន់ដោះស្រាយជីពីព្រោះត្រូវប្រឈមនឹងសត្វល្អិតបំផ្លាញ និងគ្រោះរាំងស្ងួតធ្វើឱ្យដំណាំទទួលរងខូចខាត និងពេលខ្លះទៀតខាតដើមព្រោះតែដំណាំមិនល្អ។
ទោះបីយ៉ាងណាក្នុងរយៈពេលមួយទៅពីរឆ្នាំមកនេះ លោកចាប់ផ្តើមដាំដំណាំដោយប្រកាន់យកបច្ចេកទេស និងវិទ្យាសាស្រ្តថ្មីរួមផ្សំ ជាពិសេសការមើលអែប កសិឧតុនិយម ដែលបង្កើតឡើងដោយក្រសួងឧតុនិយម រួមទាំងដៃគូ ជាពិសេសក្រសួងកសិកម្ម រុក្ខាប្រមាញ់ និងនេសាទ បានជួយទាំងការមើលអាកាសធាតុ និងសត្វល្អិតតាមតំបន់នីមួយៗធ្វើឱ្យការដាំដុះទទួលបានលទ្ធផលល្អ។
មានផ្ទៃដីដាំដុះប្រមាណបីហិកតា មានកូនបីនាក់ក្នុងបន្ទុក លោក ឈាត់ ប្រែក បានប្រាប់បន្ថែមថា ការដាំដុះបើមិនគិតគូរដល់ផ្នែកបច្ចេកទេស ការចេះមើលអាកាសធាតុ និងជាពិសេសការស្វែងយល់តាមរយៈអែប ដែលតែងតែបញ្ជាក់ប្រាប់ពីអាកាសធាតុ និងការបង្រៀនពីការដាំដុះដំណាំរបស់គម្រោងអង្គការក្រៅរដ្ឋាភិបាល ហើយរួមទាំងក្រសួងកសិកម្ម នឹងជួយឱ្យការដាំដុះទទួលលទ្ធផលល្អ មិនសូវប្រឈមដូចកាលពីមុន ដែលជាការដាំដុះបែបប្រពៃណីឡើយ។
ជាអ្នកធ្វើកសិកម្មដាំបន្លែ ហើយបានប្រកាន់យកការដាំដុះបែបសម័យថ្មីតាមលក្ខណៈបច្ចេកវិទ្យា, អ្នកស្រី តឹក ប៉ាយ ជាកសិកររស់នៅភូមិប្រម៉ា ឃុំក្របីរៀល ក្រុងសៀមរាប ខេត្តសៀមរាប បានប្រាប់ថា មកដល់ពេលនេះ អ្នកស្រីបានយល់ជ្រួតជ្រាបច្បាស់អំពីការដាំដុះបែបថ្មី ហើយអ្វីដែលសំខាន់ត្រូវចេះមើលអាកាសធាតុ បញ្ហារាំងស្ងួត ព្យុះភ្លើង កម្តៅព្រះអាទិត្យ ពីព្រោះថា វានឹងជួយដល់ការដាំដុះបន្លែបានត្រូវតាមពេលវេលា និងផ្តល់ទិន្នផលខ្ពស់។
ក្រៅពីនេះការបង្រៀនតាមប្រព័ន្ធអែប ដែលបង្កើតឡើងដោយក្រសួងកសិកម្ម និងភាគីពាក់ព័ន្ធ គឺជាជម្រើសដ៏ល្អបំផុតសម្រាប់កសិករដូចរូបអ្នកស្រី។ ជារៀងរាល់ថ្ងៃអ្នកស្រីតែងតែតាមដានមើលអែបចំនួនពីរជាទៀងទាត់ គឺអែបក្រសួងធនធានទឹក និងឧតុនិយម ដើម្បីមើលការព្យាករណ៍អំពីអាកាសធាតុ និងអែបពីគម្រោងគជ់ ដែលជាស្ថានីយកសិឧតុនិយមប្រចាំតាមខេត្តនីមួយៗជាដើម។
ជាកូនកសិករ រហូតមកដល់ពេលនេះ អ្នកស្រីនៅតែជាអ្នកធ្វើស្រែ និងដាំបន្លែលក់ជាអាជីព អ្នកស្រី តឹក ប៉ាយ បានចាត់ទុកថា ការធ្វើកសិកម្ម ពិតជាមុខរបរមួយរឹងមាំណាស់ពីព្រោះអ្នកស្រីពឹងផ្អែកទាំងស្រុងលើដំណាំកសិកម្ម និងចិញ្ចឹមសត្វ អាចចិញ្ចឹមគ្រួសារដោយស្រួល។ ដោយអ្នកស្រីអាចចិញ្ចឹមកូនៗដោយដាំដំណាំកសិកម្ម ធ្វើស្រែ ចិញ្ចឹមសត្វ ធ្វើឱ្យអ្នកស្រីអាចរកចំណូលបានគ្រប់គ្រាន់សម្រាប់ចិញ្ចឹមគ្រួសារ៕
