សានទុង៖ កំពង់ផែធំៗជាច្រើនរបស់ប្រទេសចិន បានបើកដំណើរការដឹកជញ្ជូនតាមផ្លូវទឹកត្រង់ជាមួយបណ្តាប្រទេសក្នុងទ្វីបអាហ្វ្រិក ស្របពេលទំនាក់ទំនងពាណិជ្ជកម្មរវាងចិន និងអាហ្វ្រិកកាន់តែស៊ីជម្រៅ ដោយវិធានការពន្ធសូន្យសម្រាប់ប្រទេសអាហ្វ្រិកចំនួន៥៣ ដែលមានទំនាក់ទំនងការទូតជាមួយប្រទេសចិន បានចូលជាធរមាន នៅថ្ងៃទី១ ខែឧសភា ឆ្នាំ២០២៦នេះ។
អ្នកវិភាគបាននិយាយថា ការដាក់ឱ្យដំណើរការផ្លូវដឹកជញ្ជូនត្រង់បន្ថែមទៀត នឹងជំរុញពាណិជ្ជកម្មទ្វេភាគីបន្ថែមទៀត ដោយផ្តល់ឱកាសកាន់តែច្រើនសម្រាប់ប្រទេសពាក់ព័ន្ធ។
កាលពីដើមខែកឧសភានេះ នៅចំណតកំពង់ផែ ឈីងតាវ (Qingdao) ខេត្តសានទុង (Shandong) ភាគខាងកើតប្រទេសចិន នាវាផ្ទុកទំនិញផលិតនៅប្រទេសចិន រួមមានគ្រឿងបន្លាស់រថយន្ត សំបកកង់ និងបន្ទះសូឡា បានបញ្ចប់ការផ្ទុកទំនិញរបស់ខ្លួន ហើយបានចេញដំណើរទៅកាន់កំពង់ផែសំខាន់ៗ នៅអាហ្វ្រិកខាងលិច។
ផ្លូវនេះមាននាវាធ្វើដំណើរទៅមកចំនួន១៣គ្រឿង និងចេញដំណើរតាមកាលវិភាគថេរប្រចាំសប្តាហ៍។ ក្នុងនាមជាកំពង់ផែដ៏សំខាន់មួយនៅភាគខាងជើងប្រទេសចិន កំពង់ផែឈីងតាវ ផ្តល់ការតភ្ជាប់ដោយផ្ទាល់ទៅកាន់មជ្ឈមណ្ឌលពាណិជ្ជកម្មសំខាន់ៗនៅអាហ្វ្រិកខាងលិច ដែលធ្វើឱ្យពេលវេលាដឹកជញ្ជូនរវាងខេត្តសានទុង និងតំបន់ដីគោក និងរវាងតំបន់អាហ្វ្រិកខាងលិចកាន់តែខ្លី។
នៅក្នុងត្រីមាសទី១ នៃឆ្នាំ២០២៦ ការនាំចេញសរុបពីកំពង់ផែ ឈីងតាវ ទៅកាន់ទ្វីបអាហ្រ្វិក ទទួលបានប្រាក់ចំណូលពី៤៣,៥៦ពាន់លានយន់ ឬស្មើនឹង៦,៣៧ពាន់លានដុល្លារ កើនឡើង២៦,៣ភាគរយពីមួយឆ្នាំទៅមួយឆ្នាំ។ ក្នុងនេះដែរ ការនាំចេញផលិតផលមេកានិច និងអគ្គិសនី បានកើនឡើង៣៧,៤ភាគរយ និងផលិតផលបច្ចេកវិទ្យាខ្ពស់ បានកើនឡើង២៥,៧ភាគរយ។
ដូចគ្នានេះផងដែរ នៅក្នុងខេត្ត សានទុង ក៏មានកំពង់ផែផ្សេងទៀត បានបង្កើនតួនាទីរបស់ខ្លួនក្នុងការតភ្ជាប់ជាមួយបណ្តាប្រទេសអាហ្វ្រិក។ ចាប់តាំងពីដើមឆ្នាំ២០២៦នេះមក កំពង់ផែបានបើកដំណើរការផ្លូវថ្មីចំនួនបី ទៅកាន់ប្រទេសអាល់ហ្សេរី ណាមីប៊ី និងទិសដៅផ្សេងទៀត។
យោងតាមទិន្នន័យរបស់កំពង់ផែ បានឱ្យដឹងថា បរិមាណទំនិញនៅត្រីមាសទីមួយ នៅលើផ្លូវដឹកជញ្ជូនរវាងចិន និងអាហ្វ្រិក មានបរិមាណលើសពីពីរលានតោន កើនឡើង៣១,៩ភាគរយ ពីមួយឆ្នាំទៅមួយឆ្នាំ។ ដំបូងឡើយ តួលេខប្រចាំត្រីមាសបានកើនលើសពីពីរលានតោន ដែលបង្ហាញពីសន្ទុះដ៏រឹងមាំនៃ “ច្រករបៀងដឹកជញ្ជូនផ្លូវមាសភ្លោះ” រវាងចិន និងអាហ្វ្រិក។
មិនយូរប៉ុន្មាន កំពង់ផែធានជីន (Tianjin Port) ដែលជាកំពង់ផែដ៏ធំមួយនៅភាគខាងជើងប្រទេសចិន បានបើកដំណើរការសេវាកម្មដឹកកុងតឺន័រថ្មី ដោយតភ្ជាប់ផ្ទាល់ទៅអាហ្វ្រិកខាងត្បូង ដែលបំពេញចន្លោះប្រហោងក្នុងផ្លូវដឹកជញ្ជូនត្រង់រវាងកំពង់ផែធានជីន និងអាហ្វ្រិកខាងត្បូង និងបន្ថែមបណ្តាញដឹកជញ្ជូនថ្មីដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-អាហ្វ្រិក។
ផ្លូវទឹកនេះភាគច្រើនពាក់ព័ន្ធនឹងការនាំចេញដែកថែប សម្ភារៈសំណង់ សារធាតុគីមី រថយន្ត និងផលិតផលផ្សេងទៀតទៅកាន់អាហ្វ្រិកខាងត្បូង ដោយមាននាវាចេញដំណើរទៅមកចំនួន១២គ្រឿង ដែលមានសមត្ថភាពដឹកចាប់ពី៥,៧០០ ទៅ១១,០០០កុងតឺន័រ ហើយដំណើរការតាមកាលវិភាគប្រចាំសប្តាហ៍។ ការធ្វើដំណើរចំណាយពេលត្រឹមតែ៤០ថ្ងៃ ខ្លីជាងមុន១០ថ្ងៃ ដែលអនុញ្ញាតឱ្យទំនិញក្នុងដីទទួលបានអត្ថប្រយោជន៍ពីសេវាកម្មដឹកជញ្ជូនផ្ទាល់ដ៏ងាយស្រួលទៅកាន់អាហ្វ្រិកខាងត្បូង កាត់បន្ថយថ្លៃដឹកជញ្ជូនយ៉ាងច្រើន និងបង្កើនប្រសិទ្ធភាពដឹកជញ្ជូន។
ទន្ទឹមនឹងនេះ ផលិតផលរ៉ែដ៏មានគុណភាពខ្ពស់ពីអាហ្វ្រិកខាងត្បូងអាចត្រូវបានដឹកជញ្ជូនកាន់តែលឿនទៅកាន់តំបន់ប៉េកាំង ខេត្តធានជីង ខេត្តហឺប៉ី ដែលផ្តល់នូវការផ្គត់ផ្គង់វត្ថុធាតុដើមប្រកបដោយស្ថិរភាពសម្រាប់ផលិតកម្មឧស្សាហកម្មក្នុងតំបន់នេះ។
ការពង្រីកវិសាលភាពនៃការបើកដំណើរការផ្លូវដឹកជញ្ជូនកុងតឺន័រថ្មីនេះ ត្រូវបានអនុវត្តពេញលេញនៃគោលនយោបាយពន្ធសូន្យសម្រាប់ប្រទេសអាហ្វ្រិកចំនួន៥៣ ដែលប្រទេសចិនមានទំនាក់ទំនងការទូត នឹងចូលជាធរមានជាផ្លូវការនៅថ្ងៃទី១ ខែឧសភា។
កាសែត People’s Daily បានរាយការណ៍ថា ក្រៅពីការដាក់ចេញគោលនយោបាយពន្ធគយសូន្យ ប្រទេសចិនកំពុងបន្តជំរុញការចរចា និងការចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចសម្រាប់ការអភិវឌ្ឍរួមគ្នា និងការពង្រីកលទ្ធភាពចូលទៅកាន់ទីផ្សារបន្ថែមទៀតសម្រាប់ការនាំចេញរបស់អាហ្វ្រិកទៅកាន់ប្រទេសចិន តាមរយៈវិធានការធ្វើឱ្យប្រសើរឡើងវិញនូវ “បណ្តាញបៃតង”។
ចាប់តាំងពីថ្ងៃទី១ ខែធ្នូ ឆ្នាំ២០២៤ ប្រទេសចិនបានអនុវត្តពន្ធគយសូន្យ១០០ភាគរយ នៃបន្ទាត់ពន្ធគយដល់ប្រទេសអភិវឌ្ឍន៍តិចតួចទាំងអស់ ដែលមានទំនាក់ទំនងការទូត រួមទាំងប្រទេសអាហ្វ្រិកចំនួន៣៣ផងដែរ។
សាស្ត្រាចារ្យនៅវិទ្យាស្ថានផ្លូវសូត្រសមុទ្រនៃសាកលវិទ្យាល័យ ហួចៀវ (Huaqiao) បានមានប្រសាសន៍ថា វិធានការពន្ធសូន្យរបស់ចិនសម្រាប់ប្រទេសអាហ្រ្វិក ដែលខ្លួនមានទំនាក់ទំនងការទូតជាមួយ កំពុងត្រូវបានដំឡើងជាបន្តបន្ទាប់ ដែលជាជំហានថ្មីមួយក្នុងការស្វែងរកការបើកចំហស្តង់ដារខ្ពស់របស់ចិន ហើយអាចធ្វើឱ្យចិនក្លាយជាប្រទេសមានសេដ្ឋកិច្ចធំដំបូងគេ នៅលើពិភពលោក ដែលអនុវត្តពន្ធសូន្យគ្របដណ្តប់ពេញលេញសម្រាប់ប្រទេសអាហ្រ្វិកទាំងអស់ ដែលមានទំនាក់ទំនងការទូត។
ចំំណែកអ្នកស្រាវជ្រាវជាន់ខ្ពស់នៃបណ្ឌិត្យសភាពាណិជ្ជកម្មអន្តរជាតិ និងកិច្ចសហប្រតិបត្តិការសេដ្ឋកិច្ចចិន បានមានប្រសាសន៍ថា និន្នាការនេះនឹងមិនត្រឹមតែជួយផលិតផល ដែលមានគុណភាពខ្ពស់របស់ចិន ដូចជា គ្រឿងម៉ាស៊ីន គ្រឿងអេឡិចត្រូនិក និងរបស់របរប្រើប្រាស់ប្រចាំថ្ងៃឱ្យទៅដល់ទ្វីបអាហ្វ្រិកប្រកបដោយប្រសិទ្ធភាពប៉ុណ្ណោះទេ ប៉ុន្តែថែមទាំងផ្តល់នូវបណ្តាញ និងវេទិកាកាន់តែងាយស្រួលសម្រាប់ផលិតផលកសិកម្មអាហ្វ្រិក និងទំនិញមានគុណភាពខ្ពស់ផ្សេងទៀត ដើម្បីចូលទៅក្នុងទីផ្សារប្រទេសចិន៕ (ផាន់ អាណា)
