ស្រុកអង្គស្នួល,ខេត្តកណ្តាល៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងជាប្រធានសមាគមបណ្តាញកសិករតេជោ នារសៀលថ្ងៃទី២៥ ខែឧសភា ឆ្នាំ២០២៦នេះ បានអញ្ជើញជួបសំណេះសំណាល និងសួរសុខទុក្ខប្រជាកសិករស្ថិតនៅស្រុកអង្គស្នួល ខេត្តកណ្តាល។
នៅក្នុងពិធីនេះក៏មានការអញ្ជើញចូលរួមពីឯកឧត្តម ខុន សេរីរដ្ឋា អភិបាលរងនៃគណៈអភិបាលខេត្តកណ្តាល ជាតំណាងដ៏ខ្ពង់ខ្ពស់ឯកឧត្តម គួច ចំរើនអភិបាលខេត្ត, លោក នូ សុវណ្ណរិទ្ធ អភិបាលនៃគណៈអភិបាលស្រុកអង្គស្នួល ប្រធាន អនុប្រធាន និងមន្ត្រីការិយាល័យកសិកម្ម ធនធានធម្មជាតិ និងបរិស្ថាន,មន្ត្រីកសិកម្មមកពីឃុំមួយចំនួន លោកមេឃុំ មេភូមិ ព្រមទាំងប្រជាកសិករ សរុបចំនួន៤៥៩នាក់។
ក្នុងឱកាសនេះ ឯកឧត្តមបណ្ឌិត កៅ ថាច បានបញ្ជាក់ជូនកសិករថា កម្មវិធីមកជួបជុំនៅស្រុកអង្គស្នួលថ្ងៃនេះមានគោលបំណង ដើម្បីជូនព័ត៌មានថ្មីៗ និងស្តាប់ពីកង្វល់របស់បងប្អូន លើវិស័យកសិកម្ម ទោះបីជាស្រុកអង្គស្នួលមានសេដ្ឋកិច្ចរីកចម្រើនផ្នែកឧស្សាហកម្ម និងសេវាកម្ម ប៉ុន្តែក៏មិនភ្លេចកសិកម្មទេ ដែលត្រូវការដាំដុះឲ្យបានកាន់តែច្រើនសម្រាប់បង្កើនជីវភាពប្រជាកសិករ និងការរស់នៅប្រចាំថ្ងៃ។
ឯកឧត្តមបណ្ឌិត កៅ ថាច បានលើកឡើងជាទស្សនទានមួយចំនួន ដែលខ្មែរខ្លាំងផ្នែកកសិកម្មថា បើក្រឡេកមើលសម័យមុនអង្គរ និងត្រឹមសម័យអង្គរ គឺ កាលនោះការធ្វើកសិកម្មរបស់ខ្មែរយើង គឺ១០០ភាគរយផ្តោតលើវិស័យកសិកម្ម ដែលធ្វើឲ្យសេដ្ឋកិច្ចខ្មែរយើងកាលនោះខ្លាំង ជាពិសេស មានភស្តុតាង ដូចជាបារាយណ៍ទឹកនៅតំបន់អង្គរ និងរូបចម្លាក់នៅលើប្រាង្គប្រាសាទមួយចំនួនទៀត ដែលបង្ហាញយ៉ាងច្បាស់ថា ខ្មែរយើងក្លាយជាអាណាចក្រកសិកម្មចាប់ពីពេលនោះមក ដោយសារស្នាដៃដ៏អស្ចារ្យរបស់បុព្វបុរសខ្មែរយើងតែម្តង។
លើសពីនេះឯកឧត្ដមបណ្ឌិតប្រតិភូបានលើកឡើងថា សព្វថ្ងៃនេះវិស័យកសិកម្មនៅតែជាវិស័យមួយ ក្នុងចំណោមសសរស្តម្ភទាំងបី ជាចន្ទល់សេដ្ឋកិច្ចរួមមាន វិស័យវាយនភណ្ឌ វិស័យទេសចរណ៍ និងសេវាកម្ម ក្នុងនោះ គឺវិស័យកសិកម្ម ដែលដើរស្របទៅនឹងគោលនយោបាយដ៏ត្រឹមត្រូវរបស់សម្តេចតេជោ ហ៊ុន សែន អតីតនាយករដ្ឋមន្ត្រី បានដាក់ចេញដោយប្រែក្លាយកម្ពុជាពីប្រទេសទទួលជំនួយជាអង្ករទៅជាប្រទេសនាំចេញអង្ករ នៅឆ្នាំ២០១១ ហើយក៏បានដាក់ចេញនូវគោលនយោបាយ ឆ្នាំ២០១០ ដើម្បីនាំចេញអង្ករទៅកាន់ទីផ្សារពិភពលោកឱ្យបានមួយលានតោន។
លើសពីនេះផលិតកម្មស្រូវក្រោយមកក៏បានបន្តកើនឡើងជាបន្តបន្ទាប់ ដែលជាក់ស្តែងកាលពីឆ្នាំ២០២៥ កម្ពុជាយើងនាំចេញអង្ករចូលទីផ្សារអន្តរជាតិបានជាង៩៤ម៉ឺនតោន ទៅកាន់គោលដៅជាង៦០ ហើយនេះបញ្ជាក់ថា ខ្មែរយើងមានឈាមជ័រផ្នែកកសិកម្ម គឺទៅណាមិនឆ្ងាយពីកសិកម្មនោះឡើយ ដូចជាការចិញ្ចឹមសត្វ ធ្វើស្រែ និងការកែច្នៃ ហើយបានជួយជំរុញសេដ្ឋកិច្ចក្នុងស្រុកផងដែរ។
បន្ថែមពីនេះ ឯកឧត្តមបណ្ឌិតប្រតិភូបានអំពាវនាវដល់កសិករនៅស្រុកអង្គស្នួល និងកសិករផ្សេងទៀត ត្រូវចេះគិតពីថ្លៃដើមផលិត ដោយចេះសន្សំថ្លៃដើមចំណាយ ទើបធ្វើកសិកម្មមិនខាត ស្របពេលការឡើងថ្លៃប្រេងឥន្ធន:លើពិភពលោក និងជីគីមី បានជំរុញការចំណាយលើកសិកម្មកាន់តែខ្ពស់ ដូច្នេះកសិករត្រូវងាកមករួមគ្នាផលិតជីធម្មជាតិ ដើម្បីកាត់បន្ថយការចំណាយថ្លៃដើម។
ចុងក្រោយបងប្អូនប្រជាកសិករអាចពិចារណាចូលរួមជាមួយសមាគមបណ្តាញកសិករតេជោបាន គឺទី១ ជាស្ពានស្វែងរកប្រភពហិរញ្ញវត្ថុ, ការទទួលបាននូវបច្ចេកទេស និងព័ត៌មានថ្មីៗ, ចម្លងសំឡេង និងក្តីបារម្ភពីប្រជាកសិករជូនថ្នាក់ដឹកនាំ និងជាស្ពានតភ្ជាប់ទៅកាន់ឱកាសផ្សេងទៀត និងទី២ ជាឆ័ត្រ ឬខែល សម្រាប់កសិករជ្រក ពោលគឺចូលរួមការពារភាពត្រឹមត្រូវ ឬស្របច្បាប់របស់កសិករ ឬការពារពីការរំលោភបំពានគៃចំណេញលើកសិករ៕
