គណៈកម្មការអឺរ៉ុបបានបញ្ជាក់ថា សាច់គោ និងផលិតផលសាច់សត្វផ្សេងទៀតរបស់ប្រេស៊ីល នឹងត្រូវហាមឃាត់មិនឱ្យនាំចូលទីផ្សារសហភាពអឺរ៉ុប ចាប់ពីថ្ងៃទី៣ ខែកញ្ញាតទៅ លើកលែងតែប្រេស៊ីលគោរពតាមច្បាប់របស់សហភាពអឺរ៉ុប ស្តីពីការប្រើប្រាស់ថ្នាំអង់ទីប៊ីយោទិចលើសត្វគោ។
អ្នកនាំពាក្យគណៈកម្មការអឺរ៉ុន បាននិយាយនៅក្នុងសេចក្តីថ្លែងការណ៍មួយថា “គណៈកម្មការសូមបញ្ជាក់ថា ប្រទេសប្រេស៊ីលមិនត្រូវបានរាប់បញ្ចូលក្នុងបញ្ជី [នៃប្រទេសគោរពតាមវិធានសហភាពអឺរ៉ុប] ដែលមានន័យថា ប្រេស៊ីលមិនអាចនាំចេញសាច់គោទៅកាន់សហភាពអឺរ៉ុបបានទៀតទេ (រាប់ទាំងអាហារ ដែលផលិតសត្វរស់ និងផលិតផល ដែលបានមកពីសត្វ) មានដូចជា ជ្រូក សេះ បក្សី ស៊ុត វារីវប្បកម្ម ទឹកឃ្មុំ និងសំបកសាច់ក្រក ដោយមានប្រសិទ្ធភាពចាប់ពីថ្ងៃទី៣ ខែកញ្ញា ឆ្នាំ២០២៦។”
សមាគមកសិករអៀរឡង់បានស្វាគមន៍ចំពោះវិធានការនេះ ដោយចាត់ទុកថាជា “ជំហានដ៏សំខាន់មួយ”។
ប្រធានសមាគមកសិករអៀរឡង់ បាននិយាយថា “នៅទីបំផុតគណៈកម្មការកំពុងទទួលយកការគំរាមកំហែងប្រឆាំងនឹងថ្នាំអង់ទីប៊ីយោទិច ថ្នាំប្រឆាំងមីក្រុប ដែលបង្កឡើងដោយផលិតកម្មសាច់គោប្រេស៊ីលយ៉ាងធ្ងន់ធ្ងរ។”
លោកបាននិយាយថា “នេះធ្វើតាមការស៊ើបអង្កេតរបស់សមាគមកសិករអៀរឡង់ អំពីការប្រើប្រាស់ថ្នាំអង់ទីប៊ីយោទិចគ្រប់កម្រិតដោយគ្មានការគ្រប់គ្រងនៅក្នុងប្រទេសប្រេស៊ីល។”
លោកបាននិយាយទៀតថា នៅទូទាំងរដ្ឋប្រេស៊ីលចំនួនបួន ការត្រួតពិនិត្យលើការប្រើប្រាស់ថ្នាំអង់ទីប៊ីយោទិចនៅតាមកសិដ្ឋានចិញ្ចឹមសត្វមានភាពធូររលុងខ្លាំងណាស់ ដោយអ្នកស៊ើបអង្កេតអាចទិញថ្នាំអង់ទីប៊ីយោទិចប៉ុន្មានក៏បានដែរ ដោយមានការត្រួតពិនិត្យ ឬសួរដេញដោលតិចតួច។
គណៈកម្មការអឺរ៉ុបបាននិយាយថា ក្រោមវិធានរបស់សហភាពអឺរ៉ុប ដែលបានអនុវត្តនៅក្នុងប្លុក ចាប់តាំងពីឆ្នាំ២០២២ ការប្រើប្រាស់ថ្នាំអង់ទីប៊ីយោទិច ដើម្បីជំរុញការលូតលាស់ ឬបង្កើនទិន្នផលនៅក្នុងសត្វចិញ្ចឹម មិនត្រូវបានអនុញ្ញាតទេ “មិនគួរយកថ្នាំអង់ទីប៊ីយោទិច ដែលទុកសម្រាប់ព្យាបាលមនុស្ស ទៅប្រើដើម្បីព្យាបាលសត្វទេ”។
សេចក្តីថ្លែងការណ៍បានបន្ថែមថា “វិធានទាំងនេះ គឺជាផ្នែកដ៏សំខាន់មួយនៃរបៀបវារៈ “សុខភាពតែមួយ” របស់សហភាពអឺរ៉ុប ដើម្បីប្រយុទ្ធប្រឆាំងនឹងភាពស៊ាំនឹងថ្នាំប្រឆាំងមេរោគ ដែលជាការគំរាមកំហែងសុខភាពសាធារណៈដ៏ធំបំផុតនៅសម័យកាលនេះ។”
គណៈកម្មការបាននិយាយថា ចាប់ពីថ្ងៃទី៣ ខែកញ្ញា ឆ្នាំ២០២៦តតៅ ការនាំចូលទាំងអស់ទៅកាន់សហភាពអឺរ៉ុបនូវសត្វ ឬផលិតផលសត្វសម្រាប់មនុស្សបរិភោគ ក៏ត្រូវតែគោរពតាមវិធានទាំងនេះផងដែរ ហើយមានតែប្រទេសទីបីប៉ុណ្ណោះ ដែលបានធានានូវអនុលោមភាពទើបអនុញ្ញាតឱ្យនាំចូលផលិតផលបែបនេះមកកាន់សហភាពអឺរ៉ុប។
មន្ត្រីមកពីរដ្ឋជាសមាជិក ដែលបង្កើតគណៈកម្មាធិការអចិន្ត្រៃយ៍ ស្តីពីរុក្ខជាតិ សត្វ អាហារ និងចំណី បានយល់ព្រមលើបញ្ជីបច្ចុប្បន្នភាពនៃប្រទេស ដែលគណៈកម្មការយល់ថា អនុលោមតាម។
បញ្ជីនេះរួមមានប្រទេសថ្មីចំនួន២១ និងប្រទេសបានចុះបញ្ជីពីមុនចំនួន៥។ ប៉ុន្តែប្រទេសប្រេស៊ីលត្រូវបានលុបឈ្មោះចេញពីបញ្ជី។
លោកស្រីអ្នកនាំពាក្យសហភាពអឺរ៉ុបបាននិយាយថា “ដើម្បីបានបញ្ចូលឈ្មោះក្នុងបញ្ជីប្រទេសទីបី ដែលត្រូវបានអនុញ្ញាតឱ្យនាំចូលមកកាន់សហភាពអឺរ៉ុប ប្រទេសប្រេស៊ីលត្រូវតែធានាឱ្យបាននូវអនុលោមភាព ស្របតាមតម្រូវការរបស់សហភាពអឺរ៉ុប លើការប្រើប្រាស់ថ្នាំសម្លាប់មេរោគលើជីវិតរបស់សត្វ ដែលផលិតផលនាំចេញត្រូវមានប្រភពដើម។”
លោកស្រីបានបន្ថែមថា “យើងបានសហការយ៉ាងជិតស្និទ្ធជាមួយអាជ្ញាធរប្រេស៊ីលលើបញ្ហានេះ ហើយនឹងបន្តទំនាក់ទំនងដើម្បីធ្វើការឆ្ពោះទៅរកអនុលោមភាព ស្របតាមតម្រូវការទាំងនេះ។ នៅពេលអនុលោមភាពត្រូវបានបង្ហាញ សហភាពអឺរ៉ុបនឹងអាចផ្តល់សិទ្ធិដល់ការនាំចូលឡើងវិញ”៕
