ម៉ានីល៖ ក្រសួងកសិកម្មសហរដ្ឋអាម៉េរិកនឹងដឹកនាំបេសកកម្មពាណិជ្ជកម្មទៅកាន់ប្រទេសហ្វីលីពីន នៅខែមេសា ឆ្នាំ២០២៦នេះ ដើម្បីពង្រីកលទ្ធភាពនាំចូលទៅកាន់ទីផ្សារហ្វីលីពីនសម្រាប់កសិករ អ្នកចិញ្ចឹមសត្វ និងអ្នកផលិតជនជាតិអាម៉េរិក រួមទាំងមន្ត្រីក្រសួងកសិកម្មសរុបយ៉ាងហោចណាស់៥៨នាក់ ដើម្បីស្វែងយល់ពីសក្តានុពលទីផ្សារហ្វីលីពីន។
ក្រសួងកសិកម្មសហរដ្ឋអាម៉េរិកបានកត់សម្គាល់ថា ប្រទេសហ្វីលីពីន គឺជាទីផ្សារធំជាងគេទី១០ សម្រាប់ផលិតផលកសិកម្ម និងម្ហូបអាហាររបស់សហរដ្ឋអាម៉េរិក ដែលជាមធ្យមមានតម្លៃ៣,៤ពាន់លានដុល្លារក្នុងការនាំចេញប្រចាំឆ្នាំ ក្នុងរយៈពេលប្រាំឆ្នាំកន្លងមកនេះ។
ក្រសួងបាននិយាយកាលពីថ្ងៃទី៣០ ខែមីនាថា បេសកកម្មដែលនឹងត្រូវធ្វើឡើង ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៦ គឺដើម្បីអនុវត្តតាមកិច្ចព្រមព្រៀងពាណិជ្ជកម្មដ៏សំខាន់មួយ ដែលបានចរចាដោយប្រធានាធិបតីអាម៉េរិក លោក ដូណាល់ ត្រាំ (Donald Trump) កាលពីខែកក្កដា ឆ្នាំ២០២៥ ដោយបានបើកឱកាសថ្មីសម្រាប់ការនាំចេញផលិតផលកសិកម្មរបស់សហរដ្ឋអាម៉េរិកទៅកាន់ប្រទេសហ្វីលីពីន។
ស្ថានទូតអាម៉េរិកនៅទីក្រុងម៉ានីល កាលពីថ្ងៃទី១ ខែមេសា បានផ្សព្វផ្សាយបន្តនូវសេចក្តីប្រកាសរបស់ក្រសួងកសិកម្មសហរដ្ឋអាម៉េរិក អំពីផែនការបំពេញទស្សនកិច្ចនេះ។
អនុរដ្ឋមន្ត្រីអាម៉េរិកទទួលបន្ទុកកិច្ចការពាណិជ្ជកម្ម និងកសិកម្មបរទេស លោកស្រី មីសែល បេគើរីង (Michelle Bekkering) នឹងដឹកនាំគណៈប្រតិភូធុរកិច្ចកសិកម្ម សមាគមពាណិជ្ជកម្ម និងតំណាងមកពីក្រសួងកសិកម្មអាម៉េរិកសរុបចំនួន៥៨នាក់ ដើម្បីស្វែងសក្តានុពលទីផ្សារកសិផលរបស់ប្រទេសហ្វីលីពីន។
លោកស្រីបានលើកឡើងនៅក្នុងសេចក្តីថ្លែងការណ៍ថា ក្រសួងកសិកម្មសហរដ្ឋអាម៉េរិកប្តេជ្ញាធ្វើឱ្យកសិករ អ្នកចិញ្ចឹមសត្វ និងកសិពាណិជ្ជករអាម៉េរិកទទួលបានទីផ្សាររឹងមាំ និងឱកាសសមស្របនៅបរទេស។
លោកស្រីបានមានប្រសាសន៍ទៀតថា ចាប់តាំងពីប្រទេសហ្វីលីពីនក្លាយជាទីផ្សារមួយក្នុងចំណោមទីផ្សារ ដែលរីកចម្រើនលឿនបំផុតនៅអាស៊ី បេសកកម្មនេះនឹងតភ្ជាប់អ្នកនាំចេញរបស់សហរដ្ឋអាម៉េរិកដោយផ្ទាល់ជាមួយអ្នកទិញ ដែលអាចទុកចិត្តបាន ព្រមទាំងពង្រឹងទំនាក់ទំនងពាណិជ្ជកម្មរបស់យើង និងជួយរក្សាកសិកម្មអាម៉េរិកឱ្យមានការប្រកួតប្រជែងជាសកល។
ក្រសួងកសិកម្មសហរដ្ឋអាម៉េរិកបានបន្ថែមថា ក្នុងចំណោមប្រជាជនហ្វីលីពីនចំនួន១១៨លាននាក់ ប្រជាជនវណ្ណៈកណ្តាលកំពុងតែរីកចម្រើនយ៉ាងឆាប់រហ័ស និងមានចំណង់ចំណូលចិត្តអ្នកប្រើប្រាស់ ផលិតផលរបស់សហរដ្ឋអាម៉េរិក ដូច្នេះប្រទេសហ្វីលីពីនផ្តល់ឱកាសក្នុងការពង្រីកទីផ្សារដ៏សំខាន់សម្រាប់ពាណិជ្ជករអាម៉េរិក។
ក្នុងអំឡុងពេលទស្សនកិច្ចនេះ បុគ្គលិកផ្នែកសេវាកម្មកសិកម្មបរទេសរបស់ក្រសួងកសិកម្មសហរដ្ឋអាម៉េរិក និងអ្នកជំនាញក្នុងតំបន់ នឹងរៀបចំសន្និសីទព័ត៌មានទីផ្សារ ទស្សនកិច្ចសិក្សា និងជំនួបរវាងពាណិជ្ជករ និងអ្នកទទួលទិញនៅក្នុងប្រទេសហ្វីលីពីន។
ក្នុងដំណើរទស្សនកិច្ចនេះ មន្ត្រីដឹកនាំជាន់ខ្ពស់ផ្នែកកសិកម្មមកពីរដ្ឋ អាដាហូ (Idaho) រដ្ឋ កាន់សាស (Kansas) រដ្ឋ នេប្រាកាស (Nebraska) និងមកពីរដ្ឋ វីសខុនស៊ីន (Wisconsin) នឹងចូលរួមបេសកកម្មជាមួយសមាគមកសិពាណិជ្ជកម្ម និងពាណិជ្ជកម្ម ដែលមានគ្នាសរុបទាំងអស់៥៨នាក់៕
