ក្រុងកូតា បារូ៖ គម្រោងដាំមើមខ្ទឹមបារាំងដោយកសិករ ក្នុងរដ្ឋ កេឡាន់តាន់ (Kelantan) របស់ប្រទេសម៉ាឡេស៊ី ក្រោមការគាំទ្រពីភ្នាក់ងាររដ្ឋាភិបាល ត្រូវបានគេរំពឹងថា នឹងអាចកាត់បន្ថយការនាំចូលមើមខ្ទឹមបារាំងរហូតដល់៣០ភាគរយ នៅត្រឹឆ្នាំ២០៣០ និងអាចជួយពង្រឹងសន្តិសុខស្បៀងរបស់ប្រទេសថែមទៀត។
លោក ឡុកម៉ាន អះម៉ាដ (Luqman Ahmad) អគ្គលេខាធិការរងនៃក្រសួងកសិកម្ម និងសន្តិសុខស្បៀង ម៉ាឡេស៊ី បានឱ្យដឹងថា បច្ចុប្បន្នប្រទេសម៉ាឡេស៊ីនៅតែនាំចូលមើមខ្ទឹមបារាំងមកផ្គត់ផ្គង់តម្រូវការនៅក្នុងស្រុកស្ទើរតែ១០០ភាគរយ ក្នុងតម្លៃទឹកនាំចូលស្មើនឹង២១០លានដុល្លារក្នុងមួយឆ្នាំ។
លោកបានបន្តថា ក្រៅពីមើមខ្ទឹមបារាំង ប្រទេសម៉ាឡេស៊ីក៏ប្រឈមនឹងបញ្ហានៃការពឹងផ្អែកលើការនាំចូលផលិតផលពោត និងសាច់ផងដែរ។ ដូច្នេះកិច្ចខិតខំប្រឹងប្រែងដើម្បីពង្រឹងផលិតកម្មក្នុងស្រុកត្រូវតែធ្វើជាដំណាក់កាល និងរៀបចំឱ្យបានល្អដើម្បីកាត់បន្ថយហានិភ័យនៃការរំខានដល់ការផ្គត់ផ្គង់ស្បៀងអាហារ។
លោកបានបន្ថែមទៀតថា លោកបានទៅពិនិត្យមើលកសិដ្ឋានដាំមើមខ្ទឹមបារាំង ដើម្បីធ្វើជាសាក្សីក្នុងកម្មវិធី គំនិតផ្តួចផ្តើមរបស់រដ្ឋាភិបាលក្នុងការណែនាំឱ្យកសិករដំាមើមខ្ទឹមបារាំង ដែលមានសក្តានុពលខ្ពស់។ ក្នុងឱកាសនោះ លោកបានថ្លែងថា ពេលនេះយើងពឹងផ្អែកទាំងស្រុងលើការនាំចូល ប៉ុន្តែជំហានបន្ទាប់ យើងនឹងការកាត់បន្ថយការនាំចូល និងការបង្កើនសន្តិសុខស្បៀងរបស់យើង។
បើតាមលោក ឡុកម៉ាន អះម៉ាដ ការដាំដំណាំខ្ទឹមបារាំងត្រូវចំណាយពេលប្រហែលពីរខែទើបអាចប្រមូលផលបាន។ ដូច្នេះវាផ្តល់ផលតបស្នងយ៉ាងឆាប់រហ័សដល់កសិករ។ ផ្អែកលើគម្រោងសាកល្បង កសិដ្ឋានទំហំ០,៨ហិកតា អាចបង្កើតចំណូលប្រហែល៩ ០០០ដុល្លារ ក្នុងរដូវប្រមូលផល ដែលនេះបង្ហាញថាដំណាំប្រភេទនេះអាចដាំដុះបាន និងមានសក្តានុពលក្នុងការអភិវឌ្ឍជាលក្ខណៈពាណិជ្ជកម្ម។
លោកថ្លែងទៀតថា «ប្រសិនបើក្នុងរយៈពេលពីរខែ កសិករអាចរកចំណូលបានរហូតដល់៩ ០០០ដុល្លារ នេះគឺជាដំណាំមានផលិតភាពខ្ពស់។ វាមិនត្រឹមតែជួយរដ្ឋាភិបាលកាត់បន្ថយការនាំចូលប៉ុណ្ណោះទេ ប៉ុន្តែថែមទាំងផ្តល់នូវប្រភពចំណូល ដែលមានការធានាបន្ថែមទៀតសម្រាប់កសិករផងដែរ»។
លោកសង្កត់ធ្ងន់ទៀតថា ការដាំខ្ទឹមបារាំងក៏កំពុងត្រូវបានអនុវត្តនៅរដ្ឋ សាបះ (Sabah) នៅលើផ្ទៃដីប្រហែលប្រាំបីហិកតា និងមានដាំនៅរដ្ឋ ប៉ាហាំង (Pahang) ជាជំហានដំបូង មុនពេលនឹងពង្រីកទៅកាន់រដ្ឋផ្សេងទៀត អាស្រ័យលើភាពសមស្របនៃដី និងការផ្គត់ផ្គង់គ្រាប់ពូជបានល្អ។
លោក ឡុកម៉ាន អះម៉ាដ បានបន្ថែមថា គម្រោងសាកល្បងដាំខ្ទឹមបារាំងនៅក្នុងកេឡាន់តាន់ នឹងសន្សំបានគ្រាប់ពូជ ដើម្បីចែកចាយដល់កសិករផ្សេងទៀត ដោយមានការគាំទ្រផ្នែកស្រាវជ្រាវ និងការផ្ទេរបច្ចេកវិទ្យា ដោយវិទ្យាស្ថានស្រាវជ្រាវ និងអភិវឌ្ឍន៍កសិកម្ម ម៉ាឡេស៊ី ខណៈភ្នាក់ងារអនុវត្តដូចជានាយកដ្ឋានកសិកម្ម និងអង្គការកសិករ នឹងពង្រីកការអនុវត្តក្នុងវិស័យនេះ ដើម្បីធានាថា គំនិតផ្តួចផ្តើមនេះផ្តល់អត្ថប្រយោជន៍ដល់វិស័យកសិចំណីអាហាររបស់ប្រទេសម៉ាឡេស៊ី៕
