យ៉ាឡៃ៖ ជម្លោះក្បាត់កិច្ចសន្យារវាងអ្នកដាំ និងអ្នកទិញ នៅតំបន់ខ្ពង់រាបកណ្តាលប្រទេសវៀតណាម បានធ្វើឱ្យផ្លែឪឡឹកជាង២០០តោន និងមានតម្លៃជាទឹកប្រាក់ជាង៣៣ម៉ឺនដុល្លារ ត្រូវទុកចោលឱ្យស្អុយរលួយនៅតាមចម្ការ ដោយសារភាគីទាំងពីរផ្លាស់ប្តូរចិត្តក្នុងរដូវលក់ដាច់បំផុត នាឱកាសបុណ្យចូលឆ្នាំវៀតណាម។
ផ្លែឪឡឹកដាំដុះលើផ្ទៃដីជួលទំហំជិត២៥ហិកតា នៅខេត្តយ៉ាឡៃ (Gia Lai) ភាគកណ្តាលវៀតណាម ដែលមានព្រំប្រទល់ជាប់ខេត្តរតនគិរីរបស់កម្ពុជា ត្រូវបានគេរំពឹងថា នឹងផ្តល់ទិន្នផលប្រហែល១ ២៥០តោន និងអាចលក់បានប្រាក់ប្រហែល៨,៥ពាន់លានដុង ឬស្មើនឹង៣៣៦ ០០០ដុល្លារ ក្រោមកិច្ចសន្យាលក់ទិញ ដែលត្រូវបានចុះហត្ថលេខានៅក្នុងខែធ្នូ ឆ្នាំ២០២៥។
ប៉ុន្តែការខ្វែងគំនិតគ្នា លើទិន្នផលផ្លែឪឡឹកជាក់ស្តែងធៀបនឹងអ្វីដែលអ្នកដាំបានសន្យា បានឈានដល់ផ្ទុះវិវាទលុបចោលកិច្ចសន្យាលក់ទិញទៅវិញ ហើយនៅពេលផ្លែឪឡឹកល្មមប្រមូលផល នៅក្នុងខែមករា ឆ្នាំ២០២៦នេះ បែរជាភាគីទាំងពីរទុកចោលឱ្យរលួយស្អុយទៅវិញ។
គិតត្រឹមថ្ងៃទី២៥ ខែកុម្ភៈ ឆ្នាំ២០២៦នេះ ផ្លែឪឡឹកទុំមានទម្ងន់ពីបួន ទៅប្រាំមួយគីឡូក្រាម ចាប់ផ្តើមប្រេះបែក និងរលួយនៅពាសពេញចម្ការ បន្ទាប់ផ្ទុះជម្លោះរវាងទិន្នផលរំពឹងទុក និងទិន្នផលជាក់ស្តែងរបស់ដំណាំឪឡឹក។
ប្រធានក្រុមកសិករដាំឪឡឹកតាមកិច្ចសន្យា បាននិយាយថា គាត់ និងសាច់ញាតិ បានឯកភាពជួលដីធ្វើចម្ការឪឡឹកទំហំ២៥ហិកតា នៅខែវិច្ឆិកា ឆ្នាំ២០២៥ ក្នុងតម្លៃលក់ម៉ៅ២១លានដុង ក្នុងមួយហិកតា ឬស្មើនឹង៨០៤,៧៥ដុល្លារ ដើម្បីដាំឪឡឹកសម្រាប់លក់ផ្គត់ផ្គង់ទីផ្សារក្នុងឱកាសបុណ្យចូលឆ្នាំវៀតណាម ដែលជាវេលារកប្រាក់ចំណូលបានច្រើន។
នៅថ្ងៃទី១៣ ខែធ្នូ ឆ្នាំ២០២៥ ក្រុមឈ្មួញ ដែលបានយល់ព្រមទិញផ្លែឪឡឹកទាំងអស់ក្នុងតម្លៃម៉ៅ១៧លានដុង ឬស្មើនឹង៦៥១ដុល្លារ ក្នុងផ្ទៃដីទំហំ៥០០ម៉ែត្រការ៉េ ក្នុងតម្លៃសរុបប្រហែល៨,៥ពាន់លានដុង ឬស្មើនឹង៣២៤ ៧៣១ដុល្លារ ហើយបានប្រគល់ប្រាក់កក់ចំនួន៧,៥ពាន់លានដុង ឬស្មើនឹង២៩៦ ០០០ដុល្លារ ឱ្យទៅអ្នកដាំ។
នៅក្នុងកិច្ចសន្យាបានបញ្ជាក់ថា ទិន្នផលផ្លែឪឡឹកនឹងទទួលបានក្នុងបរិមាណ២,៥តោន ក្នុងផ្ទៃដីទំហំ៥០០ម៉ែត្រការ៉េ។ ប៉ុន្តែប្រហែលមួយខែក្រោយមក ឈ្មួញបាននិយាយថា ទិន្នផលជាក់ស្តែងមានត្រឹមតែប្រហែល៥០០គីឡូក្រាមប៉ុណ្ណោះ ក្នុងផ្ទៃដីទំហំ៥០០ម៉ែត្រការ៉េ គឺខុសគ្នាមួយភាគប្រាំពីកិច្ចសន្យា ហើយបានសុំប្តូរពីកិច្ចព្រមព្រៀងទិញលក់ម៉ៅ ទៅជាការទូទាត់គិតជាទម្ងន់វិញ ដោយតម្លៃ៥ ០០០ដុង ឬប្រហែល០,១៩ដុល្លារ ក្នុងមួយគីឡូក្រាម។ ប៉ុន្តែការទិញឪឡឹកគិតជាគីឡូក្រាមនេះ ត្រូវភាគីកសិករប្រកែកមិនឯកភាព។
តំណាងកសិករដាំឪឡឹកបាននិយាយថា “យើងបានវិនិយោគអស់ប្រាក់ប្រហែល៤ ០០០លានដុល្លារ ឬស្មើនឹង១៥៨ ០០០ដុល្លារ ទៅលើការជួលដី ទិញគ្រាប់ពូជ និងកម្លាំងពលកម្មថែទាំជាងបីខែ។ យើងចង់អនវុត្តតាមកិច្ចព្រមព្រៀងដែលបានចុះហត្ថលេខា”។
ចំណែកភាគអ្នកទិញវិញ បានឆ្លើយតបទៅវិញថា ការសន្យាចំពោះទិន្នផលផ្លែឪឡឹកត្រូវបានធ្វើឡើងនៅពេលដើមឪឡឹកទើបតែចាប់ផ្តើមដុះពន្លក ដែលមិនទាន់ដល់ពេលទិន្នផលជាក់ស្តែង។
អ្នកទិញរូបនេះបាននិយាយដូច្នេះថា “យើងបានទាក់ទងអ្នកដាំជាច្រើនដងដើម្បីចរចាតម្លៃ ប៉ុន្តែពួកគេបានបដិសេធមិនព្រមសហការ”។
បញ្ហាបម្រូងចម្រាសនេះបានអូសបន្លាយពេលហួសថ្ងៃឈប់សម្រាកបុណ្យចូលឆ្នាំថ្មីវៀតណាម ដែលចាប់ផ្តើមពីថ្ងៃទី១៤ ដល់ថ្ងៃទី២២ ខែកុម្ភៈ ឆ្នាំ២០២៦ និងជារដូវមមាញឹកសម្រាប់លក់ផ្លែឪឡឹកនៅប្រទេសវៀតណាម ព្រោះមានតម្រូវការច្រើន និងមានតម្លៃខ្ពស់។ ប៉ុន្តែភាគីអ្នកដាំ និងភាគីអ្នកទិញ រវល់តែឈ្លោះគ្នា ធ្វើឱ្យផ្លែឪឡឹកទុំស្អុយរលួយពេញចម្ការ។
អាជ្ញាធរមូលដ្ឋានក្នុងខេត្ត យ៉ាឡៃ បាននិយាយថា ពួកគេបានព្យាយាមសម្របសម្រួលជាច្រើនដង ចាប់តាំងពីថ្ងៃទី២៨ ខែមករារហូតមក ប៉ុន្តែអ្នកទិញមិនចូលរួម។ ដោយសារទំហំនៃជម្លោះផ្នែកហិរញ្ញវត្ថុ និងបញ្ហានៅក្នុងកិច្ចសន្យាពាក់ព័ន្ធ មន្ត្រីមូលដ្ឋានបានណែនាំភាគីទាំងពីរឱ្យដាក់ពាក្យបណ្តឹងចូលទៅតុលាការ ដើម្បីជំនុំជម្រះរកខុសត្រូវតាមច្បាប់កំណត់៕
