ដោយ ឡុង សារេត
ភ្នំពេញ៖ ដោយមាននិស្ស័យស្រលាញ់វិស័យកសិកម្មលើការដាំបន្លែតាំងពីក្មេង លោក នៃ ច័ន្ទត្រា បុគ្គលិកបម្រើការនៅអង្គការអន្តរជាតិមួយ ដែលបានសាកល្បងរៀបចំដីដាំបន្លែនៅលើដំបូលផ្ទះរបស់ខ្លួន ទុកគ្រាន់ជាការកម្សាន្ត សម្រាប់បំបាត់ការអផ្សុកក្រោយពីសម្រាកពីការងារ ពេលនេះបានក្លាយខ្លួនជាអ្នកដាំបន្លែលើទឹកម្នាក់ មានសមត្ថភាពអាចផ្គត់ផ្គង់ទៅលើទីផ្សារបានជិតមួយតោននៅក្នុងមួយខែ។
អតីតបុគ្គលិកនៃអង្គការអន្តរជាតិខាងលើបានឱ្យដឹងថា ការដាំបន្លែសាកល្បង នៅលើដំបូលផ្ទះអស់រយៈពេលច្រើនឆ្នាំកន្លងមក គ្មានគោលបំណងធំដុំអ្វីជាក់លាក់នោះទេ គឺដាំគ្រាន់តែចង់ទុកជាកម្សាន្តបំបាត់ការអផ្សុកតែប៉ុណ្ណោះ។ ប៉ុន្តែនៅពេលមួយ លោកបានឃើញការផ្សព្វផ្សាយនៅតាមទូរទស្សន៍អំពីការដាំបន្លែលើទឹកមានភាពងាយស្រួលជាងការដាំបន្លែលើដី ហើយលោកចាប់អារម្មណ៍ចង់ចេះចង់ដឹង ទើបលោកបានចំណាយថវិកាអស់២៥ដុលា្លរ ចូលរៀនវគ្គខ្លី អំពីការដាំបន្លែលើទឹក។
លោកបានបន្តទៀតថា ក្រោយពីឆ្លងកាត់ការបណ្តុះបណ្តាលវគ្គខ្លី និងបានសាកល្បងដាំបន្លែលើកេះស្នោបានមួយរយៈពេលឃើញថា ការសាកល្បងដាំបន្លែរបស់ខ្លួនមានការលូតលាស់បានល្អហើយ លោកបានបោះបង់ការដាំបន្លែរៀបជារងនៅលើដំបូលផ្ទះចេញ ដោយជំនួសមកវិញនូវការរៀបចំជាថ្នើរ ដាំបន្លែក្នុងកេះស្នោអស់រយៈពេលជាច្រើនឆ្នាំ ទើបឈានទៅពង្រីក និងផ្លាស់ប្តូរទៅដាំបន្លែលើទឹក ឬហៅថា Hydroponicដែលបច្ចុប្បន្នមានចំនួន២៤រង។
បើតាមលោក នៃ ច័ន្ទត្រា, ផ្អែកលើការប្រមូលផលបន្លែជាមធ្យមពីរថ្ងៃម្តង បើគិតជារួមនៅក្នុងមួយខែ លោកអាចផ្គត់ផ្គង់បន្លែរបស់ខ្លួនទៅលើទីផ្សារបានចន្លោះពី៥០០ ទៅ៧០០គីឡូក្រាម ហើយនៅខែខ្លះបានជិតមួយតោន។
លោកគូសបញ្ជាក់ថា “តម្លៃបន្លែដែលខ្ញុំដាំនៅលើទឹកសព្វថ្ងៃនេះ វាមិនទាន់ពេញចិត្តយើងចង់បាន១០០ភាគរយទេ។ ប៉ុន្តែតម្លៃនេះយើងអាចទទួលយកបាន បើប្រៀបធៀបទៅនិងកសិករដាំបន្លែនៅតាមទីវាល ទោះបីការដាំបន្លែលើទឹកចុះទុនច្រើនបនិ្តចក្តី តែការចំណាយលើកំម្លាំងពលកម្មប្រចាំថ្ងៃ ប្រចាំខែ អស់ប្រាក់តិចជាងអ្នកដាំបន្លែលើដី។ ដូច្នេះតម្លៃបន្លែ ដែលយើងទទួលបានសព្វថ្ងៃនេះ គឺអាចកាត់រំលស់ដើមទុនបាន អាចផ្គត់ផ្គង់គ្រួសារបានក្រោយពីកាត់ចំណាយហើយ”។
សូមជម្រាបជូនថា ការដាំបន្លែលើទឹកនេះ គិតចាប់ពីដំបូងរហូតមកដល់បច្ចុប្បន្ននេះ លោក នៃ ច័ន្ទត្រា ចំណាយដើមទុនអស់ប្រាក់ប្រហែល២៥ ០០០ដុល្លារ លើការទិញសម្ភារៈ និងសាងសង់ផ្ទះសំណាញ់ផងដែរ៕
