វ៉ាស៊ីនតោន៖ ប្រធានាធិបតីឥណ្ឌូណេស៊ី បានមកសហរដ្ឋអាម៉េរិក ដើម្បៅចូលរួមកិច្ចប្រជុំលើកដំបូងនៃ “ក្រុមប្រឹក្សាសន្តិភាព” ដែលដឹកនាំដោយប្រធានាធិបតីអាម៉េរិក ហើយរដ្ឋាភិបាលឥណ្ឌូណេស៊ី បាននិយាយថា ពួកគេបានបញ្ចប់កិច្ចព្រមព្រៀងដើម្បីកាត់បន្ថយពន្ធរបស់សហរដ្ឋអាម៉េរិកមពី៣២ភាគរយ មកនៅត្រឹម១៩ភាគរយ។
មន្ត្រីសេតវិមានបាននិយាយកាលពីថ្ងៃព្រហស្បតិ៍ថា ប្រទេសឥណ្ឌូណេស៊ីនឹងកាត់បន្ថយរបាំងពាណិជ្ជកម្មលើការនាំចូលរបស់សហរដ្ឋអាម៉េរិកជាង៩៩ភាគរយ និងជួយសម្រួលដល់ការទិញទំនិញអាម៉េរិកជាង៣០ពាន់លានដុល្លារ។
រដ្ឋាភិបាលក្រុងទីក្រុងវ៉ាស៊ីនតោនបាននិយាយថា ខ្លួនបានលើកលែងពន្ធលើទំនិញឥណ្ឌូណេស៊ីមួយចំនួន រួមទាំងសម្លៀកបំពាក់ និងគ្រឿងវាយនភ័ណ្ឌផលិតពីកប្បាស និងធ្វើពីវត្ថុធាតុដើមផ្សេងទៀត។
លោក ជេមីសុន ហ្គ្រា (Jamieson Greer) តំណាងពាណិជ្ជករអាម៉េរិក បាននិយាយថា កិច្ចព្រមព្រៀងនេះនឹងបំបែករបាំងពាណិជ្ជកម្ម ហើយជួយលើកកម្ពស់ផលប្រយោជន៍របស់ប្រជាជនអាម៉េរិក។
កិច្ចព្រមព្រៀងនេះបានកើតឡើងក្នុងអំឡុងពេលដំណើរទស្សនកិច្ចមកកាន់ទីក្រុងវ៉ាស៊ីនតោន ដោយប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ានតូ (Prabowo Subianto) ដើម្បីចូលរួមកិច្ចប្រជុំលើកដំបូងនៃក្រុមប្រឹក្សាសន្តិភាព (Board of Peace) ដែលផកតួចផកតើមដឹកនាំដោយប្រធានាធិបតីអាម៉េរិក លោក ដូណាល់ ត្រាំ (Donald Trum) ដើម្បីពិភាក្សាអំពីការកសាងឡើងវិញនូវតំបន់ហ្គាហ្សា។
រដ្ឋមន្ត្រីសម្របសម្រួលកិច្ចការសេដ្ឋកិច្ចរបស់ឥណ្ឌូណេស៊ី លោក អ៊ាឡាងហ្គា ហាតាតូ (Airlangga Hartarto) បានលើកឡើងថា កិច្ចព្រមព្រៀងនេះ គឺមានអត្ថប្រយោជន៍ទាំងសងខាង ហើយនឹងទាក់ទាញការវិនិយោគកាន់តែច្រើននៅក្នុងប្រទេសឥណ្ឌូណេស៊ី។
លោកបានមានប្រសាសន៍ថា ប្រហែល៩០ភាគរយនៃសំណើរបស់ឥណ្ឌូណេស៊ីលើលក្ខខណ្ឌពន្ធនាំចូលត្រូវបានទទួលយកដោយសហរដ្ឋអាម៉េរិក។
លោកបានប្រាប់អ្នកយកព័ត៌មាននៅទីក្រុងវ៉ាស៊ីនតោនថា “ចក្ខុវិស័យនៃកិច្ចព្រមព្រៀងនេះ គឺដើម្បីវិបុលភាពសេដ្ឋកិច្ចទៅវិញទៅមក ខ្សែសង្វាក់ផ្គត់ផ្គង់ដ៏រឹងមាំ និងការគោរពអធិបតេយ្យភាពរបស់ប្រទេសនីមួយៗ” ស្របពេលផ្នែកមួយនៃកិច្ចព្រមព្រៀងនេះ ឥណ្ឌូណេស៊ីទទួលបានការលើកលែងពន្ធនាំចូលលើទំនិញជាង១៧០០មុខ រួមមានកាហ្វេ គ្រឿងទេស សូកូឡា ជ័រធម្មជាតិ និងជាពិសេសប្រេងដូង ដែលជាផលិតផលនាំចេញធំជាងគេរបស់ឥណ្ឌូណេស៊ី។
មន្ត្រីសេតវិមានបាននិយាយថា កិច្ចព្រមព្រៀងនេះ គឺជាថ្នូរនឹងប្រទេសឥណ្ឌូណេស៊ីបើកទីផ្សាររបស់ខ្លួនចំពោះផលិតផលអាម៉េរិក ដូចជាការទទួលយកស្តង់ដាររបស់សហរដ្ឋអាម៉េរិក ស្តីពីសុវត្ថិភាពរថយន្ត ការបំភាយឧស្ម័ន ឧបករណ៍វេជ្ជសាស្ត្រ និងឱសថ។ ចំណែកប្រទេសឥណ្ឌូណេស៊ីនឹងលុបចោលរបាំងពាណិជ្ជកម្មលើការនាំចូលរបស់អាម៉ឹរិក រួមទាំងផលិតកសិកម្ម ការថែទាំសុខភាព អាហារសមុទ្រ បច្ចេកវិទ្យា និងផលិតផលទាក់ទងនឹងរថយន្ត។
គួរបញ្ជាក់ថា ឥណ្ឌូណេស៊ីក៏បានប្តេជ្ញាផងដែរថា នឹងទិញទំនិញពីសហរដ្ឋអាម៉េរិក ដែលមានតម្លៃជាទឹកប្រាក់រាប់ពាន់លានដុល្លារ រួមមានសំឡីកប្បាស សណ្តែកសៀង សាច់គោ យន្តហោះ និងថាមពល។ ក្នុងនេះដែរ ប្រទេសឥណ្ឌូណេស៊ីនឹងជួយសម្រួលដល់ក្រុមហ៊ុនអាម៉េរិកក្នុងការរុករលរ៉ែកម្រក្នុងប្រទេសឥណ្ឌូណេស៊ី ដែលនឹងជួយរដ្ឋាភិបាលទីក្រុងវ៉ាស៊ីនតោន ពង្រីកការផ្គត់ផ្គង់រ៉ែសំខាន់ៗ។
លោក អ៊ាលីងហ្គា ហាតាតូ បានមាមប្រសាសន៍ទៀតថា កិច្ចព្រមព្រៀងនេះនឹងចូលជាធរមានក្នុងរយៈពេល៩០ថ្ងៃ ហើយការផ្លាស់ប្តូរនៅតែអាចធ្វើឡើងតាមលក្ខខណ្ឌណាមួយ ប្រសិនបើប្រទេសទាំងពីរយល់ព្រម។
កាលពីសប្តាហ៍មុន ក្រុមហ៊ុនឥណ្ឌូណេស៊ី និងសហរដ្ឋអាម៉េរិក បានចុះហត្ថលេខាលើកិច្ចព្រមព្រៀងជាច្រើនដែលមានតម្លៃជាទឹកប្រាក់ធ្វើពាណិជ្ជកម្មចំនួន៣៨,៤ពាន់លានដុល្លារ សម្រាប់ភាពជាដៃគូក្នុងវិស័យរ៉ែ បច្ចេកវិទ្យា វាយនភ័ណ្ឌ និងឧស្សាហកម្មផ្សេងៗទៀត។
លោកប្រធានាធិបតីឥណ្ឌូណេស៊ី បានបញ្ជាក់ថា កិច្ចព្រមព្រៀងទាំងនេះ គឺជាផ្នែកមួយនៃកិច្ចព្រមព្រៀងពន្ធគយ ហើយវានឹងជួយឥណ្ឌូណេស៊ីក្នុងការកាត់បន្ថយអតិរេកពាណិជ្ជកម្មរបស់ខ្លួនជាមួយសហរដ្ឋអាម៉េរិក ដោយលោកបានមានប្រសាសន៍ថា “ខ្ញុំមានសុទិដ្ឋិនិយមខ្លាំងណាស់អំពីអនាគតនៃទំនាក់ទំនងរបស់យើង”៕
