ដោយ នៅ ស៊ីវុត្ថា
កំពង់ធំ៖ ដោយមើលឃើញពីឱកាស និងសក្តានុពលនៃឃុំផាត់សណ្តាយ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី សមាជិកគណៈអចិន្រ្តៃយ៍នៃគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ធំ បានលើកទឹកចិត្តដល់បងប្អូនប្រជាពលរដ្ឋនៅក្នុងឃុំផាត់សណ្តាយ នៃខេត្តកំពង់ធំ ឱ្យងាកមកចិញ្ចឹមត្រី ដែលជាមុខរបរបន្ថែមថ្មី។
ឯកឧត្តមបានលើកទឹកចិត្តបែបនេះ ក្នុងពេលអញ្ជើញចុះសាកសួរសុខទុក្ខប្រជាពលរដ្ឋ និងសម្ពោធដាក់ឱ្យប្រើប្រាស់អគារសហគមន៍ឃុំផាត់សណ្ដាយ ស្ថិតក្នុងស្រុកកំពង់ស្វាយ ខេត្តកំពង់ធំ កាលពីពេលថ្មីៗនេះ។ ឯកឧត្តមបានជំរុញក្រុមការងាររបស់ឯកឧត្តម និងអាជ្ញាធរខេត្ត ជួយរៀបចំផែនការអភិវឌ្ឍការចិញ្ចឹមត្រីនៅឃុំផាត់សណ្ដាយ ដោយរួមទាំងការដាំបន្លែផងដែរ។
ឯកឧត្តម វង្សី វិស្សុត បានបន្ថែមថា ទន្ទឹមនេះ ក្រុមការងារក៏នឹងជួយរៀបចំផែនការអភិវឌ្ឍសហគមន៍ទេសចរណ៍ផាត់សណ្តាយ ដើម្បីទាក់ទាញភៀវទេសចរណ៍ជាតិ និងអន្តរជាតិ ឱ្យមកទស្សនាឃុំផាត់សណ្តាយឱ្យបានច្រើន ដើម្បីបង្កើតមុខរបរថ្មី និងប្រាក់ចំណូលបន្ថែម ព្រោះការប្រកបមុខរបរនេសាទត្រីតែមួយមុខមិនអាចជួយធ្វើឱ្យបងប្អូនមានជីវភាពកាន់តែធូរធារបានឡើយ។
ជាមួយគ្នានេះ ដើម្បីសម្រួលដល់ការធ្វើដំណើររបស់ភ្ញៀវទេសចរណ៍ ឯកឧត្តមឧបនាយករដ្ឋមន្ត្រីក៏បានទទួលយកនូវសំណូមពរក្នុងការដោះស្រាយកន្លែងគោករាក់នៅរដូវប្រាំងចំនួនពីរទីតាំង ស្ថិតនៅតាមបណ្តោយផ្លូវនាវាចរពីឃុំផាត់សណ្តាយ ទៅចំណុចកំពង់គោ ក្រុងស្ទឹងសែន ដោយធ្វើការសិក្សាលើទិដ្ឋភាពបច្ចេកទេស និងច្បាប់ជាមុនសិន។
ឯកឧត្តម វង្សី វិស្សុត ក៏បានលើកឡើងផងដែរថា ក្នុងរយៈពេលពីរឆ្នាំកន្លងមកនេះ ក្រុមការងារចុះមូលដ្ឋានខេត្តកំពង់ បានខិតខំប្រឹងប្រែង ដោយទឹកចិត្តបរិសុទ្ធស្មោះត្រង់ និងតែងតែបានភ្ជាប់ការគិតគូរអំពីជីវភាពរបស់ប្រជាជន សេដ្ឋកិច្ច មុខរបរ និងប្រាក់ចំណូលរបស់ប្រជាជនខេត្តកំពង់ធំ ដោយរួមទាំងឃុំផាត់សណ្តាយផងដែរ។ ក្នុងគោលដៅលែងឱ្យខេត្តកំពង់ធំ ជាខេត្តទៅហួស មកហួសទៀត ទាំងគម្រោងអភិវឌ្ឍន៍ ការវិនិយោគ ពាណិជ្ជកម្ម និងទេសចរណ៍ និងប្រែក្លាយខេត្តកំពង់ធំទៅជាមូលដ្ឋានគាំទ្រដ៏រឹងមាំរបស់គណបក្សប្រជាជនកម្ពុជា ជាពិសេសចង់ឃើញសន្ទុះនៃកំណើនគាំទ្រ និងការជឿជាក់របស់បងប្អូន តាមរយៈការខិតខំ ការធ្វើអំពើល្អ និងលទ្ធផលការងារជាក់ស្តែង ដែលមានផលជះទៅលើជីវភាព និងការរស់នៅរបស់បងប្អូន។
ទោះជាយ៉ាងណាក៏ដោយ ឯកឧត្តម វង្សី វិស្សុត បានបញ្ជាក់ថា ដំណោះស្រាយដ៏សមស្របបំផុត ដើម្បីដោះស្រាយបញ្ហាប្រឈមរបស់បងប្អូនប្រជាពលរដ្ឋឃុំផាត់សណ្តាយ ដែលប្រមាណ៩០ភាគរយប្រកបមុខរបរនេសាទត្រីជាលក្ខណៈប្រពៃណីរាប់រយឆ្នាំមកហើយនោះ គឺមានតែដែននេសាទរបស់សហគមន៍ផាត់សណ្តាយ គឺសម្រាប់តែសហគមន៍ផាត់សណ្តាយ ព្រោះនេះជាមុខរបរចិញ្ចឹមជីវិតអ្នកផាត់សណ្តាយតាំងពីដូនតារបស់គាត់យូរលង់ណាស់មកហើយ និងម្យ៉ាងទៀត អ្នកមកពីខាងក្រៅ ដែលមកដណ្តើមមុខរបរអ្នកផាត់សណ្តាយ ច្រើនតែប្រើប្រាស់ឧបករណ៍នេសាទខុសច្បាប់ ដែលជាការបំផ្លិចបំផ្លាញជីវភាពរស់នៅជាប្រពៃណីរបស់សហគមន៍ឃុំផាត់សណ្តាយ។
ឯកឧត្តមបានបន្តថា ដោយផ្អែកលើសក្តានុពលរបស់ខេត្តកំពង់ធំ ដែលជាខេត្តមានផ្ទៃដីធំជាងគេនៅកម្ពុជា និងមានប្រជាជនប្រមាណ៧៣ភាគរយ ប្រកបរបរកសិកម្ម យើងអាចនិយាយបានថា គឺមានតែកសិកម្មនេះឯង ដែលអាចធ្វើឱ្យសេដ្ឋកិច្ចខេត្តកំពង់ធំរីកចម្រើន ហើយធ្វើឱ្យបងប្អូនមានជីវភាពធូរធារ មានមុខរបរ និងប្រាក់ចំណូលល្អជាងមុន។ តែវិស័យកសិកម្មនេះ មិនមែនសំដៅតែទៅលើការធ្វើស្រែ ធ្វើចម្ការតែមួយមុខនោះទេ។
ឯកឧត្តមបានបន្ថែមថា ដូច្នេះ យើងត្រូវដោះស្រាយបញ្ហាការអភិវឌ្ឍកសិកម្មនៅក្នុងខេត្តកំពង់ធំ ដើម្បីម្ខាងបង្កើតការងារ មុខរបរ និងប្រាក់ចំណូលដល់ប្រជាជន និងម្ខាងទៀតបង្កើន និងបង្កើតចន្ទល់សេដ្ឋកិច្ចរបស់ខេត្ត និងរបស់ប្រទេសជាតិទាំងមូល។ ក៏ប៉ុន្តែទាល់តែមានការងារ និងមុខរបរ ទើបអាចមានប្រាក់ចំណូលបាន។ ដូច្នេះពួកគាត់អាចបង្កើនប្រាក់ចំណូល តាមរយៈការបង្កើតមុខរបរថ្មី និងការបង្កើតមុខរបរបន្ថែមលើមុខរបរមានស្រាប់ ព្រមទាំងពង្រីកមុខរបរមានស្រាប់ឱ្យកាន់តែរីកចម្រើន និងទទួលបានប្រាក់ចំណេញ៕
