ភ្នំពេញ៖ ធនាគារអភិវឌ្ឍន៍ជនបទ និងកសិកម្ម (ARDB)និងសហគមន៍តាសីសាមគ្គី កាលពីពេលថ្មីៗកន្លងមកនេះ បានចាប់ដៃគូជាមួយវិនិយោគិនកូរ៉េ ដើម្បីលើកកម្ពស់បច្ចេកវិទ្យាកសិកម្មខ្មែរ សម្រាប់បោះជំហានថ្មីមួយទៀតក្នុងវិស័យកសិកម្មឆ្លាតវៃ និងកសិកម្មឌីជីថល។
គណៈប្រតិភូវិនិយោគិនកូរ៉េចំនួនប្រាំបួនរូប ដឹកនាំដោយលោក ម៉េងហូ ស៊ីន (Maengho Shin) ប្រធានអង្គការ យូនីដូ អាយធីភីអូ កូរ៉េ (UNIDO ITPO KOREA) ចាប់ពីថ្ងៃទី១០ ដល់ថ្ងៃទី១២ ខែកុម្ភៈ ឆ្នាំ២០២៦ បានអញ្ជើញមកបំពេញទស្សនកិច្ច ដើម្បីផ្ទេរបច្ចេកវិទ្យា និងពង្រឹងសមត្ថភាពកសិកម្មនៅកម្ពុជា។
ទន្ទឹមនេះដែរ ដោយមានការគាំទ្រពីធនាគារ ARDB គណៈប្រតិភូទទួលបានការស្វាគមន៍ និងការគាំទ្រយ៉ាងពេញទំហឹងពីធនាគារ ARDB ក្រោមការដឹកនាំរបស់ ឯកឧត្តមបណ្ឌិត កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម។
សម្រាប់ លោក ណុប នុន ប្រធានក្រុមប្រឹក្សាសហគមន៍ ដែលបាននាំមកនូវភាពរីករាយ និងទំនុកចិត្តខ្ពស់ដល់វិនិយោគិនកូរ៉េ ហើយខាងសហគមន៍កសិកម្មតាសីសាមគ្គី បានធ្វើបង្គោលចរនៃបច្ចេកវិទ្យា និងការទទួលបដិសណ្ឋារកិច្ចនៅមូលដ្ឋានផងដែរ។
បន្ទាប់មកទៀត លោកបានលើកឡើងទៀតថា គណៈប្រតិភូបានទស្សនាកសិដ្ឋានម៉ូដែលមួយហិចតា និងមជ្ឈមណ្ឌលបណ្តុះបណ្តាលបច្ចេកទេសរបស់សហគមន៍ ដែលធ្វើឱ្យអ្នកវិនិយោគកូរ៉េ កាន់តែមានជំនឿចិត្ត និងសន្យាផ្តល់ឧបករណ៍បច្ចេកវិទ្យាបន្ថែមទៀត ដើម្បីលើកកម្ពស់ការបណ្តុះបណ្តាលឱ្យកាន់តែប្រសើរ។
លោកប្រធានសហគមន៍ បានលើកឡើងថា សមិទ្ធផលសំខាន់ៗនៃដំណើរទស្សនកិច្ចការផ្ទេរបច្ចេកវិទ្យា ក្រុមហ៊ុន FreshUs ក៏បានចុះអនុស្សរណៈនៃការយោគយល់គ្នា ដើម្បីផ្តល់បន្ទប់ត្រជាក់ពិសោធន៍ចំនួនបួនគ្រឿង និងឧបករណ៍តេស្តគុណភាព និងថវិកាមួយចំនួន ដល់សមាគមបណ្តាញកសិករតេជោ ដើម្បីធានាគុណភាពនាំចេញឱ្យបាន ១០០ភាគរយ។
លោកឡែក លោក ណុប នុន លើកឡើងថា ការកាត់បន្ថយថ្លៃដើម បច្ចេកវិទ្យាថ្នាំលាបកាត់បន្ថយកម្ដៅពីក្រុមហ៊ុន SINA ENS ដែលជួយកសិករចំណេញថវិកាច្រើនលើការកាត់បន្ថយកម្ដៅឃ្លាំងស្តុក។ ការពិនិត្យសង្វាក់ផលិតកម្ម ក្រោមការដឹកនាំរបស់ឯកឧត្តម ជាត ស៊ីវុត្ថា គណៈប្រតិភូបានចុះសិក្សានៅរោងចក្រ Mirath Agri Tech និងក្រុមហ៊ុនកែច្នៃស្វាយចន្ទី នៅខេត្តកំពង់ធំ។
ដំណើរទស្សនកិច្ចនេះ មិនត្រឹមតែនាំមកនូវបច្ចេកវិទ្យាទំនើបប៉ុណ្ណោះទេ ប៉ុន្តែថែមទាំងបង្ហាញពីសក្តានុពលនៃសហគមន៍កសិកម្មខ្មែរ ក្នុងការឈានទៅរកការកែច្នៃ និងនាំចេញប្រកបដោយស្តង់ដារអន្តរជាតិ៕
