សេអ៊ូល៖ ក្រសួងកសិកម្ម ស្បៀងអាហារ និងកិច្ចការជនបទ កូរ៉េខាងត្បូង បាននិយាយថា រដ្ឋាភិបាលនឹងចាត់វិធានការ នាំចេញខ្ទឹមបារាំង ដែលរដ្ឋាភិបាលបានទិញស្តុកទុក ដោយបញ្ចុះលក់រាយក្នុងរយៈពេលខ្លី ដើម្បីលើកទឹកចិត្តដល់ការប្រើប្រាស់ និងនាំចេញទៅកាន់ទីផ្សារនៅក្នុងតំបន់អាស៊ីអាគ្នេយ៍។
យោងតាមក្រសួង បានឱ្យដឹងទៀតថា តម្លៃលក់ដុំសម្រាប់ខ្ទឹមបារាំង ដែលរក្សាទុកតាមស្តង់ដារ នៅចុងខែមករា ឆ្នាំ២០២៦នេះ ជាមធ្យមមានតម្លៃត្រឹម១០ ២២វ៉ុន ឬស្មើនឹង០,៧៦ដុល្លារ ក្នុងមួយគីឡូក្រាម គឺការធ្លាក់ចុះរៀងរាល់ឆ្នាំរហូតដល់២៧,៦ភាគរយ និងទាបជាងមធ្យមភាគនៃឆ្នាំមុនៗ ចំនួន២៣,៣ភាគរយ។ ទោះបីជាតម្លៃលក់ដុំសម្រាប់ខ្ទឹមបារាំង ដែលរក្សាទុកជាធម្មតា អាចកើនឡើងនៅចន្លោះខែមករា និងខែមីនា មុនការប្រមូលផលថ្មីក៏ដោយ ក៏ស្តុកខ្ទឹមបារាំងសល់នៅក្នុងឆ្នាំ២០២៥ រួមទាំងទុនបម្រុងរបស់រដ្ឋាភិបាល ត្រូវបានប៉ាន់ប្រមាណថា មានចំនួន៨,៧ភាគរយ ខ្ពស់ជាងឆ្នាំមុន។
ក្រសួងកសិកម្ម ស្បៀងអាហារ និងកិច្ចការជនបទ បានសន្មតថា សម្ពាធតម្លៃដោយសារតម្រូវការខ្សោយ និងការកើនឡើងនៃការដឹកជញ្ជូនខ្ទឹមបារាំង ដែលមានគុណភាពទាបសម្រាប់ទីផ្សារ។ មន្ត្រីក្រសួង បាននិយាយថា ប្រសិនបើតម្លៃនៅតែទាបដូចបច្ចុប្បន្ននេះ រហូតដល់ខែកុម្ភៈ និងខែមីនា ឆ្នាំ២០២៦នេះ វាអាចមានផលប៉ះពាល់ដល់ការប្រមូលផល និងការផ្គត់ផ្គង់ ព្រមទាំងពិបាកកំណត់តម្លៃខ្ទឹមបារាំងទើបប្រមូលថ្មី ដូច្នេះឱ្យមានអន្តរាគមន៍ជាមិនបន្តាន់ពីរដ្ឋាភិបាល។
ដើម្បីជាការឆ្លើយតប រដ្ឋាភិបាលកូរ៉េខាងត្បូងគ្រោងនឹងនាំចេញខ្ទឹមបារាំងចំនួន១៥ ០០០តោន នៃខ្ទឹមបារាំងក្នុងស្តុកសរុបចំនួន២៥ ០០០តោន ដោយនាំចេញទៅកាន់ប្រទេសវៀតណាម តៃវ៉ាន់ ជប៉ុន ម៉ាឡេស៊ី និងទីផ្សារផ្សេងទៀត។ ចំណែកខ្ទឹមបារាំងនៅសល់នឹងត្រូវទុកប្រើប្រាស់ក្នុងស្រុក ប្រសិនបើមានការរំខានដល់ការផ្គត់ផ្គង់ណាមួយ ដូចជាការកើនឡើងតម្លៃ បន្ទាប់ពីខ្ទឹមបារាំងប្រមូលថ្មីត្រូវចាប់ផ្តើមនៅចុងខែមីនា ឆ្នាំ២០២៦នេះ។
ដើម្បីជំរុញដល់ការប្រើប្រាស់ក្នុងស្រុក ក្រសួងកសិកម្ម ស្បៀងអាហារ និងកិច្ចការជនបទនឹងបញ្ចុះតម្លៃរហូតដល់៤០ភាគករយ នៅតាមផ្សារទំនើបធំៗ និងផ្សារតូចតាច និងផ្សារប្រពៃណី រហូតដល់ថ្ងៃទី១៦ ខែកុម្ភៈនេះ។ យុទ្ធនាការផ្សព្វផ្សាយបន្ថែម និងកម្មវិធីបញ្ចុះតម្លៃខ្ទឹមបារាំង ដែលផលិតក្នុងស្រុក ក៏គ្រោងធ្វើផងដែរ ដោយសហការជាមួយក្រុមហ៊ុនកសិធុរកិច្ច និងមូលនិធិខ្ទឹមបារាំង។
ក្រសួងក៏បាននិយាយផងដែរថា ខ្លួននឹងរឹតបន្តឹងការផ្គូរផ្គងគុណភាពនៅតាមបណ្តាទីផ្សារលក់ដុំ ដោតរួមមានការពង្រឹងកិច្ចព្រមព្រៀងចែកចាយរវាងក្រុមហ៊ុន និងក្រុមអ្នកផលិត ដើម្បីកំណត់ការដឹកជញ្ជូនខ្ទឹមបារាំង ដែលធ្វើឱ្យមានការធ្លាក់តម្លៃនៅលើទីផ្សារ។ រហូតដល់ខ្ទឹមបារាំងចាប់ផ្តើមប្រមូលផលថ្មីនៅដើមខែមីនាខាងមុខនេះ កិច្ចសហប្រតិបត្តិការជាមួយភ្នាក់ងារផ្សេងៗ មានដូចជា គយ និងក្រសួងសុវត្ថិភាពចំណីអាហារ និងឱសថ ក៏នឹងត្រូវពង្រឹងផងដែរ ដើម្បីគ្រប់គ្រងការនាំចូលខ្ទឹមបារាំងដោយខុសច្បាប់ និងធានាបាននូវការត្រួតពិនិត្យលើសំណល់ថ្នាំពុលសម្លាប់សត្វល្អិត។
អគ្គនាយកផ្នែកចែកចាយ និងគោលនយោបាយអ្នកប្រើប្រាស់ នៃក្រសួងកសិកម្ម ស្បៀងអាហារ និងកិច្ចការជនបទ បានមានប្រសាសន៍ថា “វិធានការគ្រប់គ្រងការផ្គត់ផ្គង់ និងតម្រូវការខ្ទឹមបារាំងនេះ គឺលើសពីការឆ្លើយតបចំពោះតម្លៃក្នុងរយៈពេលខ្លី ហើយត្រូវបានអនុវត្តជាជំហានដំបូង ដើម្បីធានាបាននូវស្ថិរភាពផ្គត់ផ្គង់ និងតម្រូវខ្ទឹមបារាំងនៅឆ្នាំ២០២៦នេះ”។
លោកបានបន្ថែមថា រដ្ឋាភិបាលកូរ៉េខាងត្បូងនឹងបន្តតាមដានស្ថានភាពទីផ្សារទាំងការកើនឡើង និងការធ្លាក់ចុះតម្លៃ ហើយនឹងចាត់វិធានការឆ្លើយតបណាមួយនៅពេលចាំបាច់៕
