ញូវដេលី៖ សមាគមស្វាយចន្ទីឥណ្ឌា បានលើកឡើងពីការនាំចូលគ្រាប់ស្វាយចន្ទីខុសច្បាប់កាន់តែច្រើន ជាពិសេសការនាំចូលពីប្រទេសវៀតណាម និងពីប្រទេសក្នុងទ្វីបអាហ្វ្រិក ដោយប្រកាសពន្ធជាផលិតផលមិនមែនគ្រាប់ស្វាយចន្ទី ដើម្បីគេចវេសពីបម្រាមរបស់ប្រទេសឥណ្ឌា។
សមាគមនបានចោទថា ការនាំចូលទាំងនេះកំពុងបំផ្លាញឧស្សាហកម្មស្វាយចន្ទីក្នុងស្រុក តាមរយៈការបំភាន់ភ្នែកអ្នកប្រើប្រាស់ និងគំរាមកំហែងដល់ជីវភាពរស់នៅរបស់ស្ត្រីកម្មករជាងមួយសែននាក់។
សមាគមបានជំរុញឱ្យក្រសួងពាណិជ្ជកម្មឥណ្ឌា ចាត់វិធានការជាបន្ទាន់ដើម្បីទប់ស្កាត់ការធ្វើពាណិជ្ជកម្មនាំចូលផលិតផលខុសច្បាប់ ដើម្បីការពារអ្នកកែច្នៃក្នុងស្រុក។
ទីផ្សារក្នុងប្រទេសឥណ្ឌាឥឡូវនេះកំពុងជោរជន់ដោយគ្រាប់ស្វាយចន្ទីនាំចូលពីប្រទេសវៀតណាម និងនាំចូលពីបណ្តាប្រទេសក្នុងទ្វីបអាហ្វ្រិក ចំណែកតំបន់សេដ្ឋកិច្ចពិសេស ក៏ត្រូវបានប្រើប្រាស់ខុសគោលដៅផងដែរ ដើម្បីបម្រើការនាំចូលផលិតស្វាយចន្ទីខុសច្បាប់។
ដោយពិនិត្យពីការក្លែងបន្លំនាំចូលគ្រាប់ស្វាយចន្ទីពីបរទេស សមាគមស្វាយចន្ទីឥណ្ឌាទាំងអស់បានជំរុញឱ្យក្រសួងពាណិជ្ជកម្មធ្វើអន្តរាគមន៍ភ្លាមៗ និងចាត់វិធានការដើម្បីការពារវិស័យកែច្នៃស្វាយចន្ទីក្នុងស្រុក ព្រោះសកម្មភាពនាំចូលគ្រាប់ស្វាយចន្ទីខុសច្បាប់កំពុងតែមានសន្ទុះខ្លាំងឡើងៗ។
ក្នុងលិខិតផ្ញើជូនរដ្ឋមន្ត្រីក្រសួងពាណិជ្ជកម្មឥណ្ឌា លោក រ៉ាម៉ាគ្មឹស្នាន់ (M. Ramakrishnan) លេខាធិការសមាគម បានឱ្យដឹងថា ឧស្សាហកម្មស្វាយចន្ទីឥណ្ឌាកំពុងស្ថិតក្រោមភាពតានតឹងយ៉ាងខ្លាំង ដោយសារតម្លៃស្វាយចន្ទីឡើងខ្ពស់ខុសប្រក្រតី ខណៈតម្រូវការគ្រាប់ស្វាយចន្ទីក្នុងស្រុកនៅតែមានភាពយឺតយ៉ាវ ដែលធ្វើឱ្យការកែច្នៃស្វាយចន្ទីមានលក្ខណៈត្បិតត្បៀតសម្រាប់អង្គភាពមួយចំនួនធំនៅទូទាំងប្រទេសឥណ្ឌា។
លោកលេខាសមាគមបានលើកឡើងទៀតថា កត្តាចម្បងនៅពីក្រោយទីផ្សារក្នុងស្រុកចុះខ្សោយ គឺការនាំចូលគ្រាប់ស្វាយចន្ទីខុសច្បាប់ក្នុងទ្រង់ទ្រាយធំចូលមកប្រទេសឥណ្ឌា។ ការនាំចូលទាំងនេះ តាមរយៈការប្រកាសលេខកូដថា HSN ដោយប្រកាសគ្រាប់ស្វាយចន្ទីបន្លំជាចំណីសត្វ ជាសំបកស្វាយចន្ទី ឬជាផលិតផលផ្សេងៗ។ ថ្មីៗនេះ ទើបលេចចេញវិធីសាស្ត្រថ្មីមួយបែបទៀត ដែលគ្រាប់ស្វាយចន្ទីឆៅ ត្រូវបានគេប្រកាសដោយកុហក់ថា ជាស្វាយចន្ទីលីងឆ្អិនទៅវិញ។
លោកបានមានប្រសាសន៍ថា ទីផ្សារក្នុងស្រុកឥឡូវនេះកំពុងជោរជន់ដោយគ្រាប់ស្វាយចន្ទីស្រស់នាំចូលពីប្រទេសវៀតណាម និងនាំចូលមកពីបណ្តាប្រទេសក្នុងទ្វីបអាហ្វ្រិក ចំណែកតំបន់សេដ្ឋកិច្ចពិសេសរបស់ប្រទេសឥណ្ឌា ក៏ត្រូវបានគេប្រើក្នុងគោលបំណងអាក្រក់ ដើម្បីធ្វើជាបណ្តាញលាងគ្រាប់ស្វាយចន្ទីខុសច្បាប់។
យោងតាមលោក រ៉ាម៉ាគ្មឹស្នាន់ បានឱ្យដឹងទៀតថា ការនាំចូលខុសច្បាប់ទាំងនេះបានបោកបញ្ឆោតអ្នកប្រើប្រាស់ក្នុងស្រុក ដោយដាក់តាំងលក់ថា ជាផលិតផលគ្រាប់ស្វាយចន្ទីរបស់ឥណ្ឌា ដែលបង្កឱ្យមានការព្រួយបារម្ភអំពីសុវត្ថិភាពចំណីអាហារ និងធ្វើឱ្យខូចឈ្មោះផលិតផលក្នុងស្រុក។ ផលិតផលគ្រាប់ស្វាយចន្ទីនាំចូលនេះមិនត្រឹមតែមានតម្លៃថោកប៉ុណ្ណោះទេ ប៉ុន្តែក៏មានគុណភាពអន់ផងដែរ បើប្រៀបធៀបទៅនឹងផលិតផលគ្រាប់ស្វាយចន្ទីរបស់ឥណ្ឌា។
លោកបានបន្តថា ស្ថានភាពបែបនេះប្រឈមនឹងការបិទរោងចក្រកែច្នៃផ្នែកវិស័យកសិឧស្សាហកម្ម ដែលពឹងផ្អែកយ៉ាងខ្លាំងលើកម្លាំងពលកម្មក្នុងស្រុក និងបង្កការគំរាមកំហែងដល់ជីវភាពរស់នៅរបស់ស្ត្រីកម្មករជាងមួយសែននាក់ នៅទូទាំងប្រទេសឥណ្ឌា។
សមាគមស្វាយចន្ទីឥណ្ឌា បានជំរុញឱ្យក្រសួងពាណិជ្ជកម្មធានាឱ្យបាននូវការផ្ទៀងផ្ទាត់លេខកូដឈ្មោះ HSN ឱ្យបានតឹងរ៉ឹងបំផុត ដើម្បីបង្កើនការផ្ទៀងផ្ទាត់ជាមួយភ្នាក់ងារគយនៅកំពង់ផែ និងការពារការប្រើតំបន់សេដ្ឋកិច្ចពិសេសជាបណ្តាញលាងគ្រាប់ស្វាយចន្ទីខុសច្បាប់។ ជំហានបន្ទាប់ៗទៀត គួរអនុវត្តឱ្យបានម៉ឺងម៉ាត់ ដើម្បីការពារអ្នកប្រើប្រាស់ឱ្យរួចផុតពីផលិតផលបន្លំឈ្មោះ និងមិនមានគុណភាពអន់ ដោយធានាបាននូវការធ្វើពាណិជ្ជកម្មដោយយុត្តិធម៌ ដើម្បីការពារអ្នកកែច្នៃនៅក្នុងប្រទេសឥណ្ឌា៕
