រដ្ឋឃ្វីនឡែន៖ គ្រោះទឹកជំនន់ដ៏ធ្ងន់ធ្ងរបំផុតបានវាយប្រហារលើស្ថានីយចិញ្ចឹមសត្វធំៗ ស្ថិតនៅក្នុងរដ្ឋឃ្វីនឡែន ភាគខាងជើងប្រទេសអូស្ត្រាលី ដោយបានសម្លាប់ហ្វូងគោរាប់ម៉ឺនក្បាល ចំណែកហ្វូងគោរាប់ពាន់ក្បាលទៀត កំពុងបាត់ខ្លួននៅក្នុងផ្ទៃទឹកល្ហល្ហាចធំដាច់កន្ទុយភ្នែក។
យោងតាមតួលេខរបស់នាយកដ្ឋានឧស្សាហកម្មចម្បង នៅរដ្ឋឃ្វីនឡែន បានឱ្យដឹងកាលពីពាក់កណ្តាលសប្តាហ៍មុនថា ទឹកជំនន់បាននិងកំពុងជន់លិចផ្ទៃដីរាប់លានហិកតាអស់រយៈពេលជិតពីរសប្តាហ៍មកហើយ ដោយគេប៉ាន់ប្រមាណថា យ៉ាងហោចណាស់មានសត្វគោប្រមាណ២៩ ២៤០ក្បាល បានងាប់ និងបាត់ខ្លួននៅក្នុងទឹក។
ប៉ុន្តែ អ្នកជំនាញខាងវិភាគសាច់បសុសត្វ និងជាអ្នកប្រឹក្សាយោបល់ នៅក្នុងប្រទេសអូស្ត្រាលី បាននិយាយថា តួលេខគោងាប់ ឬបាត់ខ្លួន អាចឈានដល់ជិត៥០ ០០០ក្បាល ដែលផលប៉ះពាល់ពិតប្រាកដនឹងច្បាស់នៅពេលទឹកស្រកទៅវិញ។ រដ្ឋឃ្វីនឡែន ដែលជាតំបន់បង្កាត់ពូជគោ ដូច្នេះកូនគោអាចឈឺងាប់ដោយសារជំងឺ។
ចំណែកក្រុមហ៊ុនកសិកម្មអូស្ត្រាលី (Australia Agricultural Company-AACo.) ដែលជាក្រុមហ៊ុនគ្រប់គ្រងផ្ទៃដីដ៏ធំល្វឹងល្វើយ និងចិញ្ចឹមគោច្រើងជាងគេបំផុត នៅក្នុងប្រទេសអូស្ត្រាលី បាននិយាយថា ក្រុមហ៊ុនកំពុងតាមដានគ្រប់ស្ថានីយ៍ប្រមូលផ្តុំគោទាំងបីកន្លែង និងចាត់វិធានការចាំបាច់ ដើម្បីដោះស្រាយស្ថានការណ៍ដ៏លំបាកនេះ។
ក្រុមហ៊ុនបានបញ្ជាក់ថា បុគ្គលិកទាំងអស់ និងក្រុមគ្រួសាររបស់ពួកគេ ដែលរស់នៅក្នុងតំបន់ជន់លិចខាងលើនេះ ត្រូវបានចល័តទៅកាន់កន្លែងមានសុវត្ថិភាព ប៉ុន្តែនៅពេលនេះមិនមានមធ្យោបាយណាមួយ ដើម្បីវាយតម្លៃឱ្យច្បាស់លាស់អំពីផលប៉ះពាល់លើសត្វចិញ្ចឹម និងហេដ្ឋារចនាសម្ព័ន្ធ នៅក្នុងតំបន់នេះឡើយ។
ក្រុមហ៊ុន បាននិយាយថា «សុវត្ថិភាពរបស់ប្រជាជន និងសុខុមាលភាពសត្វ ក៏ដូចជាការគាំទ្រដល់សហគមន៍មូលដ្ឋានរបស់យើង គឺជាការងារអាទិភាពខ្ពស់បំផុត»។
ក្រុមហ៊ុនកសិកម្មអូស្ត្រាលី (AACo.) គឺជាក្រុមហ៊ុនចុះបញ្ជីជាសាធារណៈ ដែលគិតត្រឹមឆ្នាំ២០១៨ ក្រុមហ៊ុននេះបានកាន់កាប់ដីធ្លី និងគ្រប់គ្រង់កសិដ្ឋានចិញ្ចឹមសត្វ គ្របដណ្តប់លើផ្ទៃដីប្រហែល១៧លានហិកតា នៅក្នុងរដ្ឋឃ្វីនឡែន និងនៅក្នុងរដ្ឋណរឌឿន ធើរីតធើរី (Northern Territory) ឬមានទំហំស្មើនឹងមួយភាគរយនៃផ្ទៃដីរបស់ប្រទេសអូស្ត្រាលីទាំងមូល។
កាលពីចុងខែមករា រហូតដល់ដើមខែកុម្ភៈ ឆ្នាំ២០១៩ ទឹកជំនន់នៅក្នុងរដ្ឋឃ្វីនឡែន និងរដ្ឋណរឌឿន ធើរីតធើរី បានសម្លាប់គោអស់ប្រមាណ៤៥៧ ០០០ក្បាល ចៀម៤៣ ០០០ក្បាល សេះ៧១០ក្បាល និងពពែអស់៣ ០០០ក្បាល នៅលើផ្ទៃដី១១,៤លានហិកតា ស្ថិតនៅភាគពាយ័ព្យរដ្ឋឃ្វីនឡែន ដោយខាតបង់អស់ទឹកប្រាក់ប្រមាណ៤៧លានដុល្លារ។
សម្រាប់ស្ថានីយចិញ្ចឹមគោទាំងបីកន្លែងរបស់ក្រុមហ៊ុន ដែលកំពុងរងផលប៉ះពាល់ដោយទឹកជំនន់ ឆ្នាំ២០២៥-២០២៦នេះ មានចិញ្ចឹមគោសរុបប្រមាណ៥៥ ០០០ក្បាល ដែលតិចជាងកាលទឹកជំនន់ឆ្នាំ២០១៩ ដែលបានសម្លាប់គោជាង៦០ ០០០ក្បាល នៅទូទាំងរដ្ឋឃ្វីនឡែន។
ចំណែកអាកាសធាតុនៅភាគនិរតីនៃរដ្ឋឃ្វីនឡែន និងរដ្ឋណរឌឿន ធើរីតធើរី ដែលមានស្ថានីយ៍ចិញ្ចឹមសត្វចំនួន២៧កន្លែង និងគោចំនួន៤៥៦ ០០០ក្បាល មិនបានរងផលប៉ះពាល់ធ្ងន់ធ្ងរឡើយ។
នៅតាមវាលភក់ល្បាប់ដ៏ធំល្វើងល្វើយដាច់កន្ទុយភ្នែក នាភាគពាយ័ព្យនៃរដ្ឋឃ្វីនឡែន ក្លិនស្អុយពីសាកសពគោងាប់ប្រហែល១ ៥០០ក្បាល នៅស្ថានីយ៍ចិញ្ចឹមគោកមួយកន្លែង កំពុងជះក្លិនស្អុយរាប់សិបគីឡូម៉ែត្រ។ តំបន់នេះមានព្យុះភ្លៀងធ្លាក់យ៉ាងខ្លាំងរហូតកម្រិត៧៤២មីល្លីម៉ែត្រ ចាប់ថ្ងៃទី១៨ ខែធ្នូ ឆ្នាំ២០២៤ រហូតដល់ថ្ងៃទី៧ ខែមករា ឆ្នាំ២០២៦។
ស្ត្រីកសិករចិញ្ចឹមគោម្នាក់ បាននិយាយថា «ខ្ញុំមានពាក្យតែមួយម៉ាត់គត់ ដែលអាចបង្ហាញពីអារម្មណ៍របស់ខ្ញុំ គឺសោកស្តាយខ្លាំងណាស់។ ទឹកជំនន់បានបំផ្លាញហ្វូងគោអស់ច្រើនណាស់។ ទឹកលេចអស់ហើយ ហើយយើងមិនអាចទៅណាបានទេ។ ៨០ភាគរយនៃផ្ទៃដីកសិដ្ឋានរបស់យើង ត្រូវទឹកលិចអស់ ឬមិនអាចចូលបាន។ ធុំក្លិនតែសាកសពសត្វគោងាប់នៅគ្រប់ទីកន្លែង»។
លោកស្រីបានមានប្រសាសន៍ថា គោមិនទាន់ឈប់ងាប់នៅឡើយទេ។ មនុស្សគ្រប់គ្នាគិតថា ទឹកជំនាន់ឆ្នាំ២០១៩ គឺជាទឹកជំនន់កើតឡើងម្តងក្នុងរយៈពេល១០០ឆ្នាំ ហើយឥឡូវមិនទាន់ដល់ប្រាំពីរឆ្នាំផង ទឹកជំនន់កើតឡើងម្តងទៀត៕
