ហាណូយ៖ ការធ្លាក់ចុះយ៉ាងច្រើននូវការព្រមានរបស់សហភាពអឺរ៉ុប ក្នុងឆ្នាំ២០២៥ បញ្ជាក់ឱ្យឃើញនូវសញ្ញាវិជ្ជមានសម្រាប់ការនាំចេញផលិតផលកសិកម្មរបស់វៀតណាម នាពេលអនាគត។
បើតាមការចុះផ្សាយរបស់ព័ត៌មានក្នុងស្រុកវៀតណាម បានឱ្យដឹងថា ចំនួននៃការព្រមានដែលចេញដោយសហភាពអឺរ៉ុប ប្រឆាំងនឹងផលិតផលកសិកម្ម និងម្ហូបអាហារវៀតណាម បានធ្លាក់ចុះជិតពាក់កណ្តាល នៅឆ្នាំ២០២៥។ ពីការព្រមានចំនួន១១៤ ក្នុងឆ្នាំ២០២៤ សហភាពអឺរ៉ុបបានចេញការព្រមានត្រឹមតែ៦០ប៉ុណ្ណោះ នៅឆ្នាំ២០២៥ គឺធ្លាក់ចុះ៤៨ភាគរយ។
សម្រាប់ទីផ្សារមួយ ដែលល្បីល្បាញដោយសារតម្រូវការសុវត្ថិភាពចំណីអាហារ អនាម័យ និងភូតគាមអនាម័យ យ៉ាងតឹងរ៉ឹង។ តួលេខនេះឆ្លុះបញ្ចាំងពីភាពល្អប្រសើរឡើងវិញ គួរឱ្យកត់សម្គាល់នៃគុណភាពផលិតផលកសិកម្មវៀតណាម និងកម្រិតនៃការអនុលោមតាមច្បាប់របស់អឺរ៉ុប។
អនុប្រធានការិយាល័យសុវត្ថិភាពចំណីអាហារ អនាម័យ និងភូតគាមអនាម័យវៀតណាម លោកវេជ្ជបណ្ឌិត ង៉ូ សួនណាំ (Ngo Xuan Nam) បានលើកឡើងថា ការថយចុះនៃការព្រមានរបស់សហភាពអឺរ៉ុបបង្ហាញថា ការធ្វើអាជីវកម្ម និងប្រជាជនក្នុងមូលដ្ឋានបានចាប់ផ្តើមអនុវត្តវិធីសាស្រ្តសល្អជាងមុន ចំពោះការនាំចេញ ដោយធានាការអនុលោមតាមច្បាប់ចាប់ពីដំណាក់កាលផលិតកម្ម ដោយមិនពិបាដោះស្រាយបញ្ហាបន្ទាប់ពីផលិតផលបានចូលដល់ទីផ្សាររួចហើយ។
សហភាពអឺរ៉ុប គឺជាទីផ្សារមួយ ដែលតែងតែផ្លាស់ប្តូរបទប្បញ្ញត្តិលើសំណល់ថ្នាំសម្លាប់សត្វល្អិត ថ្នាំអង់ទីប៊ីយោទិច សារធាតុបន្ថែម និងការតាមដានផលិតផល។ សូម្បីតែការកែតម្រូវតិចតួចនៃកម្រិតបច្ចេកទេសក៏អាចបង្កឱ្យមានហានិភ័យនៃការព្រមានភ្លាមៗដែរ។
យោងតាមរបាយការណ៍ ចុងឆ្នាំ២០២៥ របស់ការិយាល័យសុវត្ថិភាពចំណីអាហារ អនាម័យ និងភូតគាមអនាម័យវៀតណាម បានឱ្យដឹងថា ក្នុងរយៈពេល១១ខែដំបូងនៃឆ្នាំ២០២៥ ការិយាល័យបានព្រាងច្បាប់ថ្មីចំនួន៥៧៨ និងច្បាប់ចំនួន៣៩០ ត្រូវបានប្រកាសឱ្យប្រើរួចហើយ ដែលចេញដោយសមាជិកអង្គការពាណិជ្ជកម្មពិភពលោក ជាប់ទាក់ទងដោយផ្ទាល់ទៅនឹងសុវត្ថិភាពចំណីអាហារ អនាម័យ និងភូតគាមអនាម័យ វៀតណាម។ ព័ត៌មានមួយចំនួនធំនេះត្រូវបានបញ្ជូនបន្តទៅភ្នាក់ងារជំនាញ តាមមូលដ្ឋាន និងអាជីវកម្មនានាសម្រាប់ការពិនិត្យឡើងវិញ ការផ្តល់មតិកែលម្អ និងការកែតម្រូវដំណើរការផលិតកម្មទាន់ពេលវេលា។
ស្របនឹងការទទួលបានការជូនដំណឹងពីខាងក្រៅ ប្រទេសវៀតណាមក៏បានជូនដំណឹងអំពីវិធានរបស់អឺរ៉ុប ទៅដល់ការិយាល័យសុវត្ថិភាពចំណីអាហារ អនាម័យ និងភូតគាមអនាម័យ ក្នុងស្រុកចំនួន១២របស់វៀតណាម ដោយដាក់ជូនលេខាធិការដ្ឋានសុវត្ថិភាពចំណីអាហារ អនាម័យ និងភូតគាមអនាម័យ និងអង្គការពាណិជ្ជកម្មពិភពលោក ព្រមទាំងប្រមូលមតិយោបល់ពីសមាជិកមកវិញ ឱ្យស្របតាមនីតិវិធី។ វិធីសាស្រ្តនេះជួយកាត់បន្ថយហានិភ័យនៃជម្លោះបច្ចេកទេស ខណៈពេលបង្កើនតម្លាភាពផ្នែកពាណិជ្ជកម្ម។
ការធ្លាក់ចុះនៃការព្រមានរបស់សហភាពអឺរ៉ុប ត្រូវបានចាត់ទុកថា ជា “ការសាកល្បង” ដ៏សំខាន់មួយនៃការអនុវត្តតាមអនុលោមភាពនៃផលិតផលកសិកម្មវៀតណាម។ ចំណែកទីផ្សារធ្វើបច្ចុប្បន្នភាពជាបន្តបន្ទាប់នូវបទប្បញ្ញត្តិ ស្តីពីកម្រិតសំណល់អតិបរមា តម្រូវការដាក់ស្លាក ផលិតផលលាយ និងការតាមដានផលិតផល។
ដោយអនុវត្តការណែនាំរបស់ឧបនាយករដ្ឋមន្ត្រីវៀតណាម លោក ចាន ហុងហា (Tran Hong Ha) និងអនុរដ្ឋមន្ត្រីក្រសួងកសិកម្ម និងបរិស្ថាន លោក ចាន ថាញ់ណាំ (Tran Thanh Nam)ការិយាល័យសុវត្ថិភាពចំណីអាហារ អនាម័យ និងភូតគាមអនាម័យ វៀតណាម បានសម្របសម្រួលជាមួយភ្នាក់ងារពាក់ព័ន្ធ ដើម្បីរៀបចំសន្និសីទអនឡាញទូទាំងប្រទេស កាលពីខែកុម្ភៈ ឆ្នាំ២០២៥ ដោយផ្តោតលើការធ្វើបច្ចុប្បន្នភាពជាបន្ទាន់នូវបទប្បញ្ញត្តិថ្មីស្តីពីសុវត្ថិភាពចំណីអាហារ អនាម័យ និងភូតគាមអនាម័យ របស់សហភាពអឺរ៉ុប និងណែនាំអាជីវកម្ម និងតាមមូលដ្ឋានលើចំណុចសំខាន់ៗដែលត្រូវកត់សម្គាល់។
និន្នាការធ្លាក់ចុះយ៉ាងច្រើននៃការព្រមានរបស់សហភាពអឺរ៉ុប ត្រូវបានចាត់ទុកថា ជាសញ្ញាវិជ្ជមានសម្រាប់ការតម្រង់ទិសនៃការនាំចេញផលិតផលកសិកម្ម។
លោក ចាន ថាញ់ណាំ បានមានប្រសាសន៍ថា គោលបំណងមិនត្រឹមតែកាត់បន្ថយចំនួននៃការព្រមានប៉ុណ្ណោះទេ ប៉ុន្តែថែមទាំងកសាងសមត្ថភាពអនុវត្តតាមអនុលោមភាពប្រកបដោយចីរភាព ដើម្បីឱ្យផលិតផលកសិកម្មវៀតណាមអាចចូលទៅក្នុងទីផ្សារ ដែលមានតម្រូវការខ្ពស់។
នៅឆ្នាំ២០២៦នេះ ការិយាល័យសុវត្ថិភាពចំណីអាហារ អនាម័យ និងភូតគាមអនាម័យ វៀតណាម មានគម្រោងបញ្ចប់ប្រព័ន្ធព្រមានជាមុន និងធ្វើបច្ចុប្បន្នភាពសៀវភៅណែនាំអំពីសុវត្ថិភាពចំណីអាហារ អនាម័យ និងភូតគាមអនាម័យ សម្រាប់ទីផ្សារសំខាន់ៗ និងពង្រឹងទំនាក់ទំនងជាមួយអ្នកធ្វើអាជីវកម្ម និងនៅតាមមូលដ្ឋាន។ នៅពេលគុណភាព និងការអនុលោមតាមច្បាប់ក្លាយជាមូលដ្ឋានគ្រឹះ ការពង្រីកទីផ្សារនឹងមានហានិភ័យទាប និងប្រកបដោយនិរន្តរភាព៕
