ម៉ានីល៖ ការនាំចូលអង្កររបស់ហ្វីលីពីន នឹងធ្លាក់ចុះ៥,៤ភាគរយ ទាបជាងការរំពឹងទុកដំបូងនៅឆ្នាំនេះ បន្ទាប់ពីរដ្ឋាភិបាលបានហាមឃាត់បណ្តោះអាសន្ន កាលខែកញ្ញា ឆ្នាំ២០២៥។
នៅក្នុងរបាយការណ៍របស់ក្រសួងកសិកម្មសហរដ្ឋអាមេរិក បានការព្យាករណ៍ការនាំចូលអង្កររបស់ប្រទេសហ្វីលីពីន ពីបរទេសនៅក្នុងឆ្នាំ២០២៥ មកនៅត្រឹម៣,៥លានតោន គឺធ្លាក់ចុះពីចំនួន៣,៧លានតោន កាលពីឆ្នាំមុន។
សម្រាប់ឆ្នាំទីផ្សារអង្ករពីឆ្នាំ២០២៥ ដល់ឆ្នាំ២០២៦ ក្រសួងកសិកម្មសហរដ្ឋអាមេរិក បានកំណត់ការនាំចូលអង្កររបស់ប្រទេសហ្វីលីពីន នឹងមកនៅត្រឹម៥,៥លានតោន។ ឆ្នាំទីផ្សារនៅក្នុងប្រទេសហ្វីលីពីន ត្រូវចាប់ផ្តើមនៅខែកក្កដា ហើយបញ្ចប់នៅខែកក្កដានៃឆ្នាំបន្ទាប់។
ប្រធានាធិបតីហ្វីលីពីន បានបន្តហាមឃាត់នាំចូលរហូតដល់ថ្ងៃទី៣១ ខែធ្នូ ឆ្នាំ២០២៥ ដើម្បីការពារកសិករក្នុងស្រុកពីសម្ពាធ្លាក់ចុះតម្លៃអង្ករ ដែលបណ្តាលមកពីអង្ករនាំចូលពីបរទេស។
ចំណែកក្រសួងកសិកម្មហ្វីលីពីនធ្លាប់បានរាយការណ៍ថា តម្លៃស្រូវសើមក្នុងស្រុកបានធ្លាក់ចុះមកត្រឹម៨ប៉េសូ ឬស្មើឹនឹង០,១៤ដុល្លារ ក្នុងមួយគីឡូក្រាម ដោយសារអង្ករនាំចូលមានតម្លៃថោកជាងអង្ករក្នុងស្រុក។
រដ្ឋាភិបាលហ្វីលីពីន បានដាក់ចេញនូវបទបញ្ជាផ្អាកការនាំចូលអង្ករនេះ ដំបូងឡើយនៅថ្ងៃទី១ ខែកញ្ញា ដោយគ្របដណ្តប់លើអង្ករធម្មតា ដោយមិនរាប់បញ្ចូលពូជអង្ករប្រណីត ដែលកសិករក្នុងស្រុកមិនសូវផលិត មានដូចជាអង្ករជប៉ុន អង្ករខ្មៅ និងអង្ករបាសម៉ាទីរបស់ឥណ្ឌា។
ក្រសួងកសិកម្មមុននេះបាននិយាយថា រដ្ឋាភិបាលនឹងបន្តហាមនាំចូលអង្កររយៈពេលបួនខែ នៅដើមខែមករា ឆ្នាំ២០២៦ ឬប្រហែលមួយខែមុនពេលរដូវប្រមូលផល ចាប់ផ្តើមនៅខែកុម្ភៈ ឆ្នាំ២០២៦។
នៅក្នុងរបាយការណ៍ដាច់ដោយឡែកមួយ ក្រសួងកសិកម្មសហរដ្ឋអាមេរិក បាននិយាយថា ផលិតកម្មអង្ករក្នុងប្រទេសហ្វីលីពីន អាចថយចុះមួយភាគរយ មកនៅសល់ត្រឹម១២,៣លានតោន សម្រាប់ឆ្នាំ២០២៥-២០២៦ ដោយសារមានព្យុះបំផ្លាញនៅតំបន់បង្កបង្កើនផលស្រូវ។
របាយការណ៍បានលើកឡើថា នៅដើមរដូវដាំដុះស្រូវរបស់ប្រទេសហ្វីលីពីន មានការប៉ាន់ស្មានថា ទិន្នផលស្រូវនឹងល្អល្មម ប៉ុន្តែក្រោយមក ដោយព្យុះជាបន្តបន្ទាប់ បានធ្វើឱ្យភ្លៀងចាប់ផ្តើមធ្លាក់មិនទៀងទាត់ តាំងពីដើមខែ រហូតដល់ពាក់កណ្តាលខែវិច្ឆិកា ឆ្នាំ២០២៥។
ភ្លៀងធ្លាក់ខ្លាំងពេកបានបង្កជាទឹកជំនន់នៅក្នុងខេត្តផលិតស្រូវសំខាន់ៗជាងគេ ស្ថិតនៅភាគខាងជើងប្រទេសហ្វីលីពីន។ ចំណែកក្រសួងកសិកម្មហ្វីលីពីនវិញ បានប៉ាន់ស្មានថា ការប្រមូលផលស្រូវឆ្នាំ២០២៥ នេះ នឹងធ្លាក់មកត្រឹមចន្លោះពី១៩,៦១លានតោន ទៅ១៩,៨៩លានតោនប៉ុណ្ណោះ ព្រោះខូចខាតច្រើនដោយសារបញ្ហាអាកាសធាតុ។
ក្រសួងបានការប៉ាន់ស្មានដំបូងថា ទិន្នផលស្រូវហ្វីលីពីន នៅក្នុងរដូវប្រមូលផលខាងមុខ អាចទទួលបានទិន្នផលពី២០,២លានតោន ទៅ២០,៥លានតោន នៃផែនការរបស់ក្រសួងកសិកម្មចំនួន២០,៤៦លានតោន។
យោងតាមទិន្នន័យពីការិយាល័យឧស្សាហកម្មដាំដំណាំ បានបង្ហាញថា នៅឆ្នាំ២០២៥នេះ ប្រទេសហ្វីលីពីនបាននាំចូលអង្ករចំនួន៣,៣៤លានតោន ដោយគិតត្រឹមថ្ងៃទី៤ ខែធ្នូ ដោយប្រទេសវៀតណាមមានចំណែកនាំចូលធំបំផុតរហូតដល់៨១,២ភាគរយ ក្នុងបរិមាណអង្ករចំនួន២,៧១លានតោន៕
