ហាណូយ៖ ធនាគារអភិវឌ្ឍន៍អាស៊ី និងធនាគារវិនិយោគ និងអភិវឌ្ឍន៍វៀតណាម បានចុះហត្ថលេខាលើកញ្ចប់ហិរញ្ញប្បទានចំនួន២៥០លានដុល្លារ ដើម្បីគាំទ្រដល់វិស័យកសិកម្ម ដែលធន់នឹងអាកាសធាតុ និងពង្រីកការទទួលបានឥណទានសម្រាប់សហគ្រាស ដែលគ្រប់គ្រងដោយស្ត្រី នៅក្នុងប្រទេសវៀតណាម។
កញ្ចប់ថវិកានេះរួមមាន១០០លានដុល្លារ បានពីធនធានមូលធនធម្មតារបស់ធនាគារអភិវឌ្ឍន៍អាស៊ីុ, ថវិកាចំនួន២០លានដុល្លារ បានពីមូលនិធិអាកាសធាតុ និងធម្មជាតិកាណាដា សម្រាប់វិស័យឯកជននៅអាស៊ី, ប្រាក់កម្ចីស្របគ្នាចំនួន៥០លានដុល្លារ បានពីទីភ្នាក់ងារសហប្រតិបត្តិការអន្តរជាតិជប៉ុន និងប្រាក់កម្ចីសម្រាប់ពាណិជ្ជកម្មរួមគ្នាចំនួន៨០លានដុល្លារ បានពីធនាគារ កាថេ យូណាយធីត (CATHAY UNITED), សាខាធនាគារ ស៊ីធីប៊ីស៊ី (CTBC) របស់សិង្ហបុរី និងធនាគារពាណិជ្ជកម្មតៃប៉ិ ហ្វូប៉ុន (FUBON) របស់កោះតៃវ៉ាន់។
ធនាគារអភិវឌ្ឍន៍អាស៊ីបានដើរតួនាំមុខគេជាស្ថាប័នរៀបចំចាត់ចែងកម្ចី និងគ្រប់គ្រងបញ្ជីឈ្មោះអ្នកផ្តល់កម្ចី ដោយរៀបចំឥណទានសហកម្ម ដើម្បីកៀរគរដើមទុនពីឯកជនទៅក្នុងវិស័យសហគ្រាសធុនតូច និងមធ្យមរបស់វៀតណាម។
លោក សានតានូ ចក្រាបូទី (Shantanu Chakraborty) នាយកធនាគារអភិវឌ្ឍន៍អាស៊ី ប្រចាំប្រទេសវៀតណាម បានមានប្រសាសន៍ថា «ប្រតិបត្តិការនេះ គឺជាព្រឹត្តិការណ៍ដ៏សំខាន់មួយនៅក្នុងភាពជាដៃគូរបស់ធនាគារអភិវឌ្ឍន៍អាស៊ី សហការជាមួយធនាគារវិនិយោគ និងអភិវឌ្ឍន៍វៀតណាម ក្នុងការលើកកម្ពស់កំណើនប្រកបដោយភាពវៃឆ្លាត និងប្រកបដោយបរិយាបន្នក្នុងវិស័យកសិកម្មរបស់វៀតណាម»។
លោកបានមានប្រសាសន៍បន្ថែមថា ការផ្តល់ហិរញ្ញប្បទាន និងជំនួយបច្ចេកទេសចម្រុះនឹងពង្រឹងសមត្ថភាពរបស់ធនាគារវិនិយោគ និងអភិវឌ្ឍន៍វៀតណាម ក្នុងការបម្រើកសិករ កសិពាណិជ្ជកម្ម និងសហគ្រិនស្ត្រី ដោយគាំទ្រដល់សេដ្ឋកិច្ចបៃតង និងមានភាពធន់ជាងមុន។
វិស័យកសិកម្ម បានចូលរួមផ្តល់ការងារប្រហែល៤៥ភាគរយនៃកម្លាំងពលកម្មវៀតណាម ប៉ុន្តែវិស័យនេះនៅមានការប្រឈមពីការបែកខ្វែកក្នុងផ្នែកផលិតកម្ម ការទទួលយកបច្ចេកវិទ្យាថ្មីនៅមានកម្រិត និងការកើនឡើងនៃហានិភ័យអាកាសធាតុ។ ដូច្នេះ ដើម្បីសម្រេចបាននូវគោលដៅរបស់ខ្លួនក្នុងការក្លាយជាអ្នកនាំចេញផលិតផលកសិកម្ម នាំមុខគេក្នុងចំណោមប្រទេសនាំចេញទាំង១៥ នៅលើពិភពលោក នាឆ្នាំ២០៣០ វិស័យកសិកម្មវឿតណាមត្រូវការទុនវិនិយោគប្រមាណជិត១០០ពាន់លានដុល្លារ ដើម្បីបង្កើតភាពធន់ កាត់បន្ថយការបំភាយឧស្ម័ន និងរក្សាបាននូវការប្រកួតប្រជែង។
ស្ថាប័នហិរញ្ញវត្ថុខាងលើនេះនឹងផ្តល់ប្រាក់កម្ចីបន្តដល់កសិពាណិជ្ជកម្ម ដែលពាក់ព័ន្ធនឹងផលិតកម្មប្រកបដោយចីរភាព ការសម្របខ្លួនទៅនឹងការប្រែប្រួលអាកាសធាតុ និងប្រសិទ្ធភាពធនធាន។ ធនាគារអភិវឌ្ឍន៍អាស៊ី ក៏នឹងគាំទ្រដល់ធនាគារវិនិយោគ និងអភិវឌ្ឍន៍វៀតណាម ក្នុងការអភិវឌ្ឍផលិតផលហិរញ្ញវត្ថុបៃតង និងប្រកបដោយបរិយាបន្ន ការកែលម្អលើការវាយតម្លៃឥណទានកសិកម្ម និងពង្រីកការទទួលបាននូវហិរញ្ញប្បទានសម្រាប់សហគ្រាស ដែលគ្រប់គ្រងដោយស្ត្រីនៅតាមតំបន់ជនបទ។
លោកស្រី ផាម វូធៀនង៉ា (Pham Vu Thien Nga) អនុប្រធាននាយកប្រតិបត្តិធនាគារវិនិយោគ និងអភិវឌ្ឍន៍វៀតណាម បានមានប្រសាសន៍ថា ភាពជាដៃគូនេះនឹងជួយធនាគារគាំទ្រអតិថិជនក្នុងការអភិវឌ្ឍគំរូកសិកម្មប្រកបដោយចីរភាព ខណៈពេលពង្រីកលទ្ធភាពទទួលបានហិរញ្ញប្បទានសម្រាប់ស្ត្រី និងអាជីវកម្មនៅតាមជនបទ ដែលរួមចំណែកដល់កំណើនសេដ្ឋកិច្ចប្រកបដោយបរិយាបន្ន និងមានភាពធន់។
ហិរញ្ញប្បទាននេះត្រូវបានអមដោយជំនួយបច្ចេកទេស ដើម្បីពង្រឹងសមត្ថភាពគ្រប់គ្រងបរិស្ថាន និងហានិភ័យរបស់ធនាគារវិនិយោគ និងអភិវឌ្ឍន៍វៀតណាម។ ការងារនេះនឹងបង្កើនជំនាញក្នុងចំណោមបុគ្គលិក និងអតិថិជន រួមទាំងសហគ្រាស ដែលគ្រប់គ្រងដោយស្ត្រី និងលើកកម្ពស់ការយល់ដឹងអំពីហិរញ្ញប្បទានកសិកម្មប្រកបដោយចីរភាព។ ការគាំទ្រពីគំនិតផ្តួចផ្តើមហិរញ្ញវត្ថុសហគ្រិនស្ត្រីនឹងជួយអភិវឌ្ឍផលិតផលហិរញ្ញវត្ថុ ដែលឆ្លើយតបទៅនឹងយេនឌ័រ ណែនាំប្រព័ន្ធទិន្នន័យបែងចែកតាមភេទ និងវាយតម្លៃគោលនយោបាយ និងសេវាកម្មសាជីវកម្មរបស់ធនាគារវិនិយោគ និងអភិវឌ្ឍន៍វៀតណាម៕
