វ៉ាស៊ីងតោន៖ កសិករអាម៉េរិកកំពុងហែលឆ្លងកាត់ពេលវេលាដ៏លំបាក ដោយសារសង្រ្គាមពាណិជ្ជកម្មរបស់ប្រធានាធិបតី លោក ដូណាល ត្រាំ (Donald Trump) ដែលប្រភពបាននិយាយថា ឥឡូវនេះសេតវិមានកំពុងរៀបចំឱ្យសង្គ្រាមនេះបន្លាយតទៅទៀត ដោយបញ្ចេញថវិកាសង្គ្រោះរាប់ពាន់លានដុល្លារកសិករ។
ទូរទស្សន៍ ស៊ីអិនអិន បានចេញថា ដោយដកស្រង់ប្រភពមិនបញ្ចេញឈ្មោះ ដែលបានលើកឡើងអំពីការឡើងថ្លៃដើមផលិត និងការសងសឹកពីបរទេស ចំពោះអត្រាពន្ធគយថ្មីបានធ្វើឱ្យប៉ះពាល់ដល់ឧស្សាហកម្មកសិកម្មរបស់សហរដ្ឋអាម៉េរិក ដូចជាកង្វះកម្លាំងពលកម្ម និងតម្លៃទំនិញធ្លាក់ចុះ។
យោងតាមក្រសួងកសិកម្មអាម៉េរិក បានឱ្យដឹងថា ការចំណាយលើផលិតកម្មកសិកម្មត្រូវបានគេប៉ាន់ប្រមាណថា នឹងកើនឡើងដល់ជាង៤៦៧ពាន់លានដុល្លារ ក្នុងឆ្នាំ២០២៥ គឺកើនឡើងចំនួន១២ពាន់លានដុល្លារ បើធៀបជាមួយនឹងឆ្នាំ២០២៤។
ចំណែកទិន្នន័យរបស់តុលាការសហរដ្ឋអាម៉េរិក បានបង្ហាញថា ការក្ស័យធនរបស់កសិដ្ឋានបានកើនឡើងនៅក្នុងឆមាសទីមួយនៃឆ្នាំ២០២៥នេះ បានកើនឡើងដល់កម្រិតខ្ពស់បំផុត ចាប់តាំងពីឆ្នាំ២០២១។
គោលនយោបាយរបស់លោក ដូណាល់ ត្រាំ បានធ្វើឱ្យសង្គ្រាមពាណិជ្ជកម្មកាន់តែធ្ងន់ធ្ងរឡើង ចាប់តាំងពីការនិរទេសកម្លាំងពលកម្មចំណាកស្រុក រហូតបង្កភាពតានតឹងផ្នែកពាណិជ្ជកម្មសារជាថ្មីរវាងសហរដ្ឋអាម៉េរិក និងប្រទេសចិន។ ចំណែកផលិតផលដំណាំប្រពៃណីរបស់អាម៉េរិក មានដូចជាសណ្តែកសៀង បានធ្លាក់ចូលក្នុងស្ថានភាពពិបាករកទីផ្សារ។
ជាការពិត ឧស្សាហកម្មសណ្តែកសៀងរបស់សហរដ្ឋអាម៉េរិក បានក្លាយទៅជាបញ្ហានៃសេដ្ឋកិច្ចកសិកម្ម តាំងពីក្នុងឆ្នាំដំបូងនៃអាណត្តិទីពីររបស់លោក ដូណាល់ ត្រាំ ហើយបញ្ហាខ្វះទីផ្សារកសិផលនេះ បានបង្កើនសម្ពាធលើរដ្ឋបាលរបស់លោក ដើម្បីរកដោះស្រាយជួយកសិករជាបន្ទាន់។
ប្រភពបាននិយាយថា ក្នុងរយៈពេលប៉ុន្មានសប្តាហ៍កន្លងមកនេះ សេតវិមានបានរៀបចំកិច្ចប្រជុំជាបន្តបន្ទាប់ជាមួយក្រសួងកសិកម្ម និងរតនាគារ ដោយព្យាយាមបញ្ចប់កញ្ចប់ថវិកាសង្គ្រោះសម្រាប់ជួយកសិករដាំសណ្តែកសៀងអាម៉េរិក។
កាលពីឆ្នាំ២០២៤ ក្រសួងកសិកម្មអាម៉េរិក បានបោះពុម្ពផ្សាយរបាយការណ៍សង្ខេបប្រចាំសប្តាហ៍អំពីការនាំចេញចុងថ្មីៗបំផុតនៃកសិផលរបស់ខ្លួនទៅកាន់ប្រទេសចិន ប៉ុន្តែ នាពេលថ្មីៗនេះ របាយការណ៍អំពីការលក់សណ្តែកសៀងទៅប្រទេសចិន លែងមានទៀតហើយ ព្រោះចិនឈប់ទិញសោះតែម្តង។
សណ្តែកសៀង គឺជាផលិតផលនាំចេញដ៏ធំបំផុតតែមួយមុខគត់របស់អាម៉េរិកទៅកាន់ប្រទេសចិន ដែលមានតម្លៃជាទឹកប្រាក់ជាង១២,៦ពាន់លានដុល្លារ កាលពីឆ្នាំ២០២៤។ ប៉ុន្តែនៅពេលរដូវប្រមូលផលចូលមកដល់នៅទូទាំងសហរដ្ឋអាម៉េរិក បែរជាប្រទេសចិនធ្លាប់តែទិញយ៉ាងហោចណាស់ចំនួន៥២ភាគរយនៃទិន្នផលសណ្តែកសៀងសរុប មិនឃើញបញ្ជាទិញអ្វីទាំងអស់ សូម្បីតែសណ្តែកសៀងមួយគ្រាប់ក៏គ្មានដែរ។
គិតចាប់ថ្ងៃទី១ ខែកញ្ញា ឆ្នាំ២០២៥ ដែលជាពេលត្រូវចាប់ផ្តើមបើកទីផ្សារថ្មីសម្រាប់សណ្តែកសៀងប្រចាំឆ្នាំ ដើម្បីកសិករអាម៉េរិកអាចលក់ចេញផលិតផលសណ្តែកសៀងរបស់ពួកគាត់ ប៉ុន្តែ ផ្ទុយទៅវិញ ចិនមិនបានទិញសណ្តែកសៀងអាម៉េរិកសោះតែម្តង។
មូលហេតុបង្កឡើងដោយសារពន្ធសងសឹករបស់ចិនបានដាក់លើសហរដ្ឋអាម៉េរិក ដែលធ្វើឱ្យតម្លៃសណ្តែកសៀងអាម៉េរិក មិនមានតម្លៃសម្រាប់អ្នកទិញនៅក្នុងប្រទេសចិនឡើយ។ ពេញមួយរដូវក្តៅ កសិករអាម៉េរិក បានសង្ឃឹមថា រដ្ឋបាលរបស់លោកប្រធានាធិបតី ដូណាល់ ត្រាំ និងប្រទេសចិន អាចចរចារឈានដល់បង្កើតកិច្ចព្រមព្រៀងពាណិជ្ជកម្ម ដោយទម្លាក់អត្រាពន្ធលើដំណាំរបស់ពួកគេ ប៉ុន្តែរហូតមកដល់ពេលនេះ មិនមានការធូរស្រាលណាមួយកើតឡើងនោះទេ។
ក្រសួងកសិកម្មសហរដ្ឋអាម៉េរិក បានឱ្យដឹងថា ប្រទេសផ្សេងទៀត មានដូចជាប្រទេសអេហ្ស៊ីប កោះតៃវ៉ាន់ និងប្រទេសបង់ក្លាដែស កំពុងតែទិញសណ្តែកសៀងពីសហរដ្ឋអាម៉េរិក ប៉ុន្តែការនាំចេញសណ្តែកសៀងសរុបបានធ្លាក់ចុះ២៣ភាគរយនៅឆ្នាំ២០២៥នេះ។ ចំណេកផលវិបាកកំពុងតែកើតឡើងចំពោះកសិករអាម៉េរិក។ កាលពីចុងកញ្ញា ឆ្នាំ២០២៥នេះ រដ្ឋបាលលោក ដូណាល់ ត្រាំ បានសន្យាគាំទ្រប្រទេសអាហ្សង់ទីន ខណៈប្រទេសនេះប្រឈមមុខនឹងភាពចលាចលផ្នែកសេដ្ឋកិច្ច។ នៅថ្ងៃដដែលនោះដែរ ប្រទេសអាហ្សង់ទីនបានលើកលែងពន្ធលើការនាំចេញកសិផលសំខាន់ៗមួយចំនួន រួមទាំងសណ្តែកសៀងផងដែរ។
របាយការណ៍របស់ក្រសួងកសិកម្មអាម៉េរិក បានឱ្យដឹងថា នៅ២០២៤ តម្លៃសណ្តែកសៀងរបស់ខ្លួនបានធ្លាក់ចុះមកនៅត្រឹមប្រហែល៣៦៧ដុល្លារប៉ុណ្ណោះក្នុងមួយតោន៕
