ម៉ានីល៖ តម្លៃនាំចេញអង្កររបស់វៀតណាម បានបន្តធ្លាក់ចុះយ៉ាងគំហុក បន្ទាប់ពីប្រទេសហ្វីលីពីន ដែលជាទីផ្សារដ៏ធំបំផុត បានបន្តការហាមឃាត់ការនាំចូលមួយខែទៀត ឬអាចបន្តហាមនាំចូលរហូតដល់ចុងឆ្នាំ២០២៥នេះ។
សារព័ត៌មានរបស់ហ្វីលីពីន បានចេញផ្សាយរបាយការណ៍របស់អង្គការស្បៀងអាហារ និងកសិកម្មរបស់អង្គការសហប្រជាជាតិ បានសង្កេតឃើញថា ការធ្លាក់ចុះនៃទីផ្សារអង្ករជាសកលនៅក្នុងខែកញ្ញា ឆ្នាំ២០២៥នេះ ដោយសារការផ្គត់ផ្គង់នៅតែមានបរិមាណច្រើនលើសតម្រូវការជាក់ស្តែង។
អង្គការស្បៀងអាហារ និងកសិកម្ម បាននិយាយនៅក្នុងរបាយការណ៍សង្ខេបស្តីអំពីទីផ្សារអង្ករប្រចាំខែរបស់ខ្លួនថា «តម្លៃអង្ករបានធ្លាក់ចុះខ្លាំងបំផុត នៅក្នុងប្រទេសវៀតណាម ដោយសារការផ្អាកនាំចូលរបស់ប្រទេសហ្វីលីពីន (ដែលដំបូងឡើុបានប្រកាសផ្អាករយៈពេល ៦០ថ្ងៃ ប៉ុន្តែឥឡូវបន្តហាមនាំចូលយ៉ាងហោចណាស់រហូតដល់ថ្ងៃទៀត)»។
ទិន្នន័យរបស់អង្គការស្បៀងអាហារ និងកសិកម្ម បានបញ្ជាក់ថា អង្ករវៀតណាមបាក់ប្រាំភាគរយ ជាមធ្យមមានតម្លៃ៣៧២ដុល្លារក្នុងមួយតោន កាលក្នុងខែកញ្ញា ឬប្រហែលចុះថោកបួនភាគរយទាបជាង ក្នុងខែសីហា ដែលមានតម្លៃ៣៨៩ ដុល្លារក្នុងមួយតោន។ សម្រាប់ប្រចាំឆ្នាំ តម្លៃអង្ករវៀតណាមបានធ្លាក់ចុះ៣២ភាគរយ ធៀបនឹងឆ្នាំ២០២៤ ដែលមានតម្លៃ៥៤៦,៥ ដុល្លារក្នុងមួយតោន។
ទិន្នន័យរបស់អង្គការស្បៀងអាហារ និងកសិកម្ម បានបង្ហាញទៀតថា តម្លៃអង្ករវៀតណាមបាក់ប្រាំភាគរយ គិតចាប់ពីខែមករា ដល់ខែកញ្ញា ឆ្នាំ២០២៥ មានតម្លៃជាមធ្យម៣៨៩,៣ដុល្លារក្នុងមួយតោន គឺចុះថោក៣២ភាគរយពីមួយឆ្នាំទៅមួយឆ្នាំ។
ការធ្លាក់ចុះតម្លៃអង្ករ គឺបណ្តាលមកពីការចាប់ផ្តើមនាំចេញឡើងវិញរបស់ឥណ្ឌាទៅកាន់ទីផ្សារពិភពលោក ក្នុងនាមជាប្រទេសនាំចេញអង្ករលំដាប់កំពូល។
ទោះបីជាយ៉ាងណាក៏ដោយ ស្ថានភាពធ្លាក់ថ្លៃកាន់តែថោកថែមទៀត ដោយសារប្រទេសហ្វីលីពីន បានប្រកាសដាក់បម្រាមការនាំចូលអង្ករជាបណ្តោះអាសន្ន ដែលបានចាប់ផ្តើមតាំងពីថ្ងៃទី១ ខែកញ្ញា ហើយគ្រោងបន្តហាមរហូតដល់ចុងខែតុលា ឆ្នាំ២០២៥។
រដ្ឋាភិបាលហ្វីលីពីនបានសម្រេចចិត្តដាក់បម្រាមនាំចូលអង្ករជាបណ្តោះអាសន្ន ដើម្បីរក្សាស្ថិរភាពតម្លៃអង្ករក្នុងស្រុក ដែលបានធ្លាក់ចុះកាន់តែទាប ដោយសារការនាំចូលអង្ករពីប្រទេសវៀតណាម។ ប្រទេសហ្វីលីពីន ធ្លាប់បាននាំចូលអង្ករជិត៣,៤លានតោន បើគិតត្រឹមថ្ងៃទី២៤ ខែកញ្ញា មានបរិមាណអង្ករនាំចូលចំនួន៤២៧,១៩៦តោន ដែលបានដឹកមកដល់ប្រទេសហ្វីលីពីន កាលពីក្នុងខែកញ្ញា ឆ្នាំ២០២៥។
ការហាមឃាត់នាំចូលអង្កររបស់ប្រទេសហ្វីលីពីន បានចូលជាធរមាននៅថ្ងៃទី១៥ ខែកញ្ញា ហើយត្រូវបានបន្តរហូតដល់ចុងខែវិច្ឆិកា ប៉ុន្តែរដ្ឋមន្ត្រីក្រសួងកសិកម្មហ្វីលីពីន បានបង្ហើបឱ្យដឹងថា បម្រាមនេះអាចអូសបន្លាយរហូតដល់ចុងឆ្នាំ២០២៥ ដើម្បីការពារកសិករក្នុងស្រុក។
ទិន្នន័យរបស់ការិយាល័យឧស្សាហកម្មហ្វីលីពីន បានបង្ហាញពីការធ្លាក់ចុះយ៉ាងខ្លាំងនៃ ការចេញវិញ្ញាបនបត្រអនុញ្ញាតនាំចូល និងបញ្ជាក់ភូតគាមអនាម័យសម្រាប់ផលិតផលអង្ករនាំចូល នៅក្នុងខែកញ្ញា។ ការបញ្ជាក់អំពីអនាម័យ និងភូតគាមអនាម័យ គឺជាឯកសារនាំចូល អង្ករ ដែលមានសុវត្ថិភាពសម្រាប់មនុស្សបរិភោគ។
ការិយាល័យឧស្សាហកម្ម បានចេញវិញ្ញាបនបត្រអនុញ្ញាតការនាំចូល និងភូតគាមអនាម័យ បានត្រឹមតែ៧៩ប៉ុណ្ណោះ កាលក្នុងខែកញ្ញា ដែលស្មើនឹងបរិមាណនាំចូលអង្ករជាង៣៦ ១៨៥តោន។
យោងតាមការសង្ខេបអំពីទីផ្សាររបស់វិទ្យាស្ថានស្រាវជ្រាវអង្ករអន្តរជាតិ បានឱ្យដឹងថា ស្ថានភាពទីផ្សារអង្ករពិភពលោក បាននាំឱ្យប្រទេសនាំចេញអង្ករ ដូចជាវៀតណាម និងថៃ នឹងទទួលបានប្រាក់ចំណេញស្តើងជាងមុន ដោយសារការហាមឃាត់នាំចូលរបស់ប្រទេសហ្វីលីពីន ដែលធ្លាប់ជាទីផ្សារនាំចូលអង្ករធំបំផុត៕
