ខេត្តហ៊ូប៉ី៖ យោងតាមរបាយការណ៍របស់ឧស្សាហកម្មដ្រូន បានឱ្យដឹងថា គិតត្រឹមខែមិថុនា ឆ្នាំ២០២៥ ដ្រូនកសិកម្មជាងប្រាំសែនគ្រឿង ត្រូវបានដាក់ពង្រាយនៅទូទាំងពិភពលោក ដែលអាចជួយសន្សំសំចៃទឹកបានប្រមាណ៣៣០លានតោន និងកាត់បន្ថយការបំភាយកាបូនបាន៤២,៥៨លានតោន។
របាយការណ៍នេះ ចេញផ្សាយដោយសារព័ត៌មានបណ្តាញកសិករ និងកសិកម្ម ដោយបានរៀបរាប់ពីនិន្នាការអភិវឌ្ឍកម្មវិធីបច្ចេកវិទ្យា និងការផ្លាស់ប្តូរបទប្បញ្ញត្តិថ្មីៗ ពាក់ព័ន្ធនឹងការប្រើប្រាស់ដ្រូនកសិកម្ម។
អ្នកបោះពុម្ពផ្សាយរបាយការណ៍បាននិយាយថា «ដ្រូនកសិកម្មកំពុងតែផ្លាស់ប្តូរគំរូផលិតកម្មបែបប្រពៃណីតាមរយៈការប្រើប្រាស់បច្ចេកវិទ្យាថ្មី ហើយក្លាយគ្រឿងយន្តថ្មីសម្រាប់ធានាសន្តិសុខស្បៀង»។
របាយការណ៍បញ្ជាក់ថា ក្នុងឆ្នាំ២០២៤ ដ្រូនកសិកម្មរបស់ប្រទេសចិន បានធ្វើការលើផ្ទៃដីជាង១៧៣លានហិកតា បង្កើតតម្លៃទីផ្សារប្រហែល១,៨ពាន់លានដុល្លារ និងបង្កើតការងារសម្រាប់មនុស្សជិត៥០០ ០០០នាក់។ ប្រតិបត្តិករជាស្ត្រីជាង១២ ០០០នាក់បានចូលរួមក្នុងសកម្មភាពការពាររុក្ខជាតិ ខណៈយុវជនកាន់តែច្រើនបានវិលត្រឡប់ទៅកាន់តំបន់ជនបទដើម្បីបង្កើតអាជីវកម្មក្នុងវិស័យកសិកម្ម។
កម្មវិធីប្រើប្រាស់ដ្រូនកសិកម្ម បានពង្រីកលើសពីការបាញ់ថ្នាំដំណាំ ដើម្បីរួមបញ្ចូលមុខងារបន្ថែមទៀត ដូចជាការដឹកជញ្ជូន ការសាបព្រួស ការបង្កាត់ពូជ និងការត្រួតពិនិត្យដំណាំ។ នៅតំបន់ជឺគួយ (Zigui) ខេត្តហ៊ូប៉ី (Hubei) ដ្រូនប្រភេទ DJI T100 អាចបានដឹកជញ្ជូនផ្លែក្រូចបាន៨៥គីឡូក្រាមក្នុងរយៈពេលពីរនាទី។ ចំណែកនៅខេត្តយូណាន ប្រព័ន្ធដឹកជញ្ជូនផ្លែចេក បានជួយកាត់បន្ថយចំណាយលើការដឹកជញ្ជូនពី៣០ភាគរយ មកនៅសល់តិចជាងប្រាំភាគរយ។ រីឯនៅខេត្តស៊ីឈួន ពេលនេះដ្រូនត្រូវបានប្រើប្រាស់ដើម្បីដឹកជញ្ជូនដើមឫស្សីនៅតាមតំបន់ភ្នំ។
របាយការណ៍បាននិយាយទៀតថា នៅតាមចម្ការពោតក្នុងម៉ុងហ្គោលី គេប្រើប្រាស់ដ្រូនសម្រាប់ការសម្អាតស្មៅ និងការគ្រប់គ្រងដំណាំ ដោយបានបង្កើនទិន្នផលច្រើនជាង១០ភាគរយ។
នៅក្នុងប្រទេសចិន បទប្បញ្ញត្តិផ្សេងៗត្រូវបានកែប្រែជាបន្តបន្ទាប់ ដើម្បីគាំទ្រដល់ប្រតិបត្តិការដ្រូនលើវិស័យកសិកម្ម ខណៈការគាំទ្រថ្នាក់ជាតិសម្រាប់សេដ្ឋកិច្ច ដែលមានកម្រិតទាប បានកំណត់ទីតាំងដ្រូនជាឧបករណ៍យុទ្ធសាស្ត្រ។ នៅក្នុងឯកសារថ្នាក់មជ្ឈឹម របស់បក្សកម្មុយនីស្តចិន លេខ១ ឆ្នាំ២០២៥ បានរាប់បញ្ចូលជាលើកដំបូងនូវការប្រើប្រាស់បច្ចេកវិទ្យាហោះរយៈកម្ពស់ទាប បញ្ជាដោយបញ្ញាសិប្បនិម្មិត និងរក្សាទិន្នន័យធំ។
ប្រទេសផ្សេងៗទៀតនៅលើពិភពលោកក៏ចាប់ផ្តើមបង្កើតច្បាប់សម្រាប់ប្រើប្រាស់ដ្រូនផងដែរ។ អាជ្ញាធរអាកាសចរណ៍ស៊ីវិលរបស់ប្រទេសប្រេស៊ីលវិញ បានសម្រួលការចុះឈ្មោះ ខណៈសហភាពអឺរ៉ុប បានអនុម័តស្តង់ដារបាញ់ថ្នាំអន្តរជាតិ រីឯរដ្ឋបាលអាកាសចរណ៍សហព័ន្ធសហរដ្ឋអាម៉េរិកបានដាក់បន្ថែមម៉ូដែល DJI មួយចំនួន ទៅក្នុងបញ្ជីលើកលែងរបស់ខ្លួនចំពោះដ្រូន។ ចំណែកប្រទេសអូស្ត្រាលីវិញបានចេញគោលការណ៍ណែនាំសម្រាប់ការប្រើប្រាស់ដ្រូន ដែលអាចបត់បែនបាននៅលើដីឯកជន។
ប្រធានសមាគមយន្តការកសិកម្មចិន បាននិយាយថា បទប្បញ្ញត្តិពាក់ព័ន្ធនឹងដ្រូនត្រូវការការកែលម្អបន្ថែមទៀត។ លោកបានកត់សម្គាល់ថា «ច្បាប់ដែលមានស្រាប់ ដូចជារយៈកម្ពស់ហោះហើរអតិបរមា៣០ម៉ែត្រ អាចត្រូវបានធ្វើឱ្យមានភាពបត់បែនជាងមុន ដើម្បីសម្រួលដល់ទំហំ និងភាពខុសគ្នានៃកម្មវិធីរបស់ដ្រូនកសិកម្ម»៕
