ហ្សាការតា៖ រដ្ឋមន្ត្រីក្រសួងកសិកម្មឥណ្ឌូណេស៊ី បានប្រកាសថា ប្រទេសឥណ្ឌូណេស៊ីនឹងសហការគ្រប់គ្រង់ជាមួយប៉ាឡេស្ទីន លើផ្ទៃដីកសិកម្មទំហំ២០ ០០០ហិកតា ដើម្បីដាំស្រូវ និងដំណាំសាកវប្បកម្មផ្សេងទៀត សម្រាប់បញ្ជូនទៅកាន់ប្រទេសនៅក្នុងតំបន់មជ្ឈិមបូព៌ា។
យោងតាមសារព័ត៌មាន អង់តារ៉ា (ANTARA) របស់ឥណ្ឌូណេស៊ី បានឱ្យដឹងថា លោក អានឌី អាំរ៉ាន់ ស៊ូឡៃម៉ាន (Andi Amran Sulaiman) រដ្ខមន្ត្រីក្រសួងកសិកម្មឥណ្ឌូណេស៊ី បានមានប្រសាសន៍ដូច្នេះ នៅក្នុងសន្និសីទសារព័ត៌មាន បន្ទាប់ពីចុះហត្ថលេខាលើអនុស្សរណៈយោគយល់គ្នា ជាមួយរដ្ឋមន្ត្រីក្រសួងកសិកម្មប៉ាឡេស្ទីន កាលពីថ្ងៃទី៧ ខែកក្កដា ឆ្នាំ២០២៥ លោក រ៉េសបាសៀ សាលីមៀ (Rezq Basheer-Salimia) នៅទីក្រុងហ្សាកាតាថា «យើងកំពុងរៀបចំដីកសិកម្មទំហំពី១០ ០០០ ទៅ២០ ០០០ហិកតាសម្រាប់ដាំស្រូវ និងដាំប្លែ»។
លោករដ្ឋមន្ត្រីបានគូសបញ្ជាក់ថា ប្រជាជនប៉ាឡេស្ទីនពូកែខាងគ្រប់គ្រងទឹកដោយសារគុណសម្បត្តិភូមិសាស្ត្ររបស់ខ្លួន។ ជនជាតិប៉ាឡេស្ទីនមានជំនាញពិសេសក្នុងបច្ចេកវិជ្ជាប្រព័ន្ធធារាសាស្ត្រតំណក់ទឹក ដែលស័ក្តិសមសម្រាប់ការអភិវឌ្ឍផ្នែកសាកវប្បកម្ម។
ក្រោមកិច្ចសហការនេះ អ្នកជំនាញប៉ាឡេស្ទីននឹងធ្វើទស្សនកិច្ចនៅប្រទេសឥណ្ឌូណេស៊ី ដើម្បីណែនាំអំពីបច្ចេកវិទ្យាធារាសាស្ត្រ ដើម្បីបង្កើនគុណភាពដីកសិកម្ម ដែលប៉ាឡេស្ទីននឹងសហការគ្រប់គ្រងនៅក្នុងតំបន់ស៊ូម៉ាត្រាខាងត្បូង និងតំបន់កាលីម៉ាន់តាន់។
លោករដ្ឋមន្ត្រីក្រសួងកសិកម្ម បានជូនដំណឹងថា ទិន្នផលភាគច្រើន រួមទាំងទិន្នផលស្រូវ ដែលដាំដុះលើផ្ទៃដីទំហំ២០ ០០០ហិកតា គ្រោងនឹងដឹកជញ្ជូនទៅកាន់ដែនដីប៉ាឡេស្ទីន សម្រាប់គាំទ្រដល់ការទ្រទ្រង់ស្បៀងអាហាររយៈពេលវែង និងជាសាមគ្គីភាពផ្នែកមនុស្សធម៌ផងដែរ។
លោកបានបញ្ជាក់បន្ថែមដូច្នេះថា «នេះបង្ហាញពីការយកចិត្តទុកដាក់របស់ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាន់តូ (Prabowo Subianto) ចំពោះទុក្ខលំបាករបស់ប្រជាជនប៉ាឡេស្ទីនទាំងមូល»។
លោកបានបន្ថែមថា គម្រោងកិច្ចសហប្រតិបត្តិការនេះពាក់ព័ន្ធនឹងផ្នែកបច្ចេកវិទ្យា និងធនធាន ដោយប្រទេសឥណ្ឌូនេស៊ីទទួលបានអត្ថប្រយោជន៍ពីការផ្ទេរចំណេះដឹង ជាពិសេសក្នុងវិស័យធារាសាស្ត្រ និងការអភិវឌ្ឍវិស័យសាកវប្បកម្ម។
លោក អានឌី អាំរ៉ាន់ ស៊ូឡៃម៉ាន បានមានប្រសាសន៍ទៀតថា កិច្ចសហប្រតិបត្តិការនេះអាចនាំឱ្យផលិតកម្មស្រូវទទួលបានទិន្នផលខ្ពស់រហូតដល់២០០ពាន់តោនក្នុងមួយឆ្នាំ ព្រមទាំងដំណាំសាកវប្បកម្មដូចជា ផ្លែប៉េងប៉ោះ ផ្លែត្រសក់ និងមើមខ្ទឹមស នឹងផ្តល់ទិន្នផលខ្ពស់ផងដែរ។
លោកបានបន្ថែមថា គម្រោងនេះនឹងប្រកបដោយនិរន្តរភាព អាចភាពបត់បែនបាន និងបើកចំហសម្រាប់ការពង្រីកបន្ថែមទៀត ព្រោះក្នុងនេះក៏រួមបញ្ចូលគ្នានូវស្មារតីមនុស្សជាតិ ជាមួយនឹងចក្ខុវិស័យនៃអធិបតេយ្យភាពស្បៀងអាហារ ដែលផ្តល់ផលប្រយោជន៍ទៅវិញទៅមកសម្រាប់ប្រទេសទាំងពីរ។
ក្នុងឱកាសនេះដែរ រដ្ឋមន្ត្រីក្រសួងកសិកម្មប៉ាឡេស្ទីន លោក រ៉េសបាសៀ សាលីមៀ បានថ្លែងអំណរគុណចំពោះការយកចិត្តទុកដាក់ និងការគាំទ្រយ៉ាងខ្ជាប់ខ្ជួនរបស់រដ្ឋាភិបាលឥណ្ឌូណេស៊ីចំពោះប្រជាជនប៉ាឡេស្ទីន។
លោកបានមានប្រសាសន៍ដូច្នេះថា «ខ្ញុំសូមថ្លែងអំណរគុណយ៉ាងស្មោះស្ម័គ្រ និងដឹងគុណចំពោះរដ្ឋាភិបាលឥណ្ឌូណេស៊ី។ សូមអរគុណចំពោះការគាំទ្រដល់ប្រជាជនប៉ាឡេស្ទីនលើគ្រប់វិស័យ ជាពិសេសសម្រាប់ការគាំទ្រសិទ្ធិរបស់ប្រជាជនប៉ាឡេស្ទីន»។
ប្រទេសទាំងពីរ បានចុះហត្ថលេខាលើអនុស្សរណៈយោគយល់គ្នា ស្តីពីកិច្ចសហប្រតិបត្តិការលើវិស័យកសិកម្ម ដើម្បីពង្រឹងទំនាក់ទំនងជាយុទ្ធសាស្ត្រ និងផ្នែកមនុស្សធម៌។
អនុស្សរណៈយោគយល់គ្នានេះគ្របដណ្តប់លើកិច្ចសហប្រតិបត្តិការក្នុងការអភិវឌ្ឍផលិតផលកសិកម្ម និងការពង្រឹងសមត្ថភាពលើវិស័យផ្សេងៗក្នុងវិស័យកសិកម្ម មានដូចជា ឧស្សាហកម្មគ្រាប់ពូជ បច្ចេកវិទ្យាជីវសាស្រ្ត ការគ្រប់គ្រងកសិឧស្សាហកម្ម ឧបករណ៍ និងគ្រឿងយន្តកសិកម្ម និងទុនបម្រុងសម្រាប់ទ្រទ្រង់ស្បៀងអាហារជាដើម៕
