ខេត្តកណ្តាល៖ រមណីយដ្ឋានទេសចរណ៍ភ្នំឧដុង្គ មានចម្ងាយប្រមាណ៤០គីឡូម៉ែត្រពីរាជធានីភ្នំពេញ បច្ចុប្បន្នបាននិងកំពុងក្លាយជាទីតំាងកាន់តែសំខាន់បន្ថែម មួយកម្រិតទៀតសម្រាប់ពលរដ្ឋស្វែងរកប្រាក់ចំណូលផ្គត់ផ្គង់គ្រួសារ ក្រៅពីធ្វើកសិកម្ម ទំាងនៅក្នុងតំបន់ និងក្រៅតំបន់ តាមរយៈការប្រកបមុខរបរលក់ដូរម្ហូបអាហារ និងសម្ភារៈផ្សេងៗ នៅរៀងរាល់ចុងសប្តាហ៍។
អ្នកស្រី យឹម សុធា នៅភូមិភ្នំ ឃុំផ្សារដែក ស្រុកពញាឮ ខេត្តកណ្តាល ប្រកបមុខរបរលក់អាហារផ្អាប់ និងលក់បាយនៅជើងភ្នំឧដុង្គ បាននិយាយថា មុខរបរលក់ម្ហូបអាហារបែបប្រពៃណីខ្មែរនៅរមណីយដ្ឋានភ្នំឧដុង្គអស់រយៈពេលពីរឆ្នំាកន្លងមកនេះបានជួយឱ្យអ្នកស្រី អាចរកបានប្រាក់ចំណូលសម្រាប់ផ្គត់ផ្គង់គ្រួសារ និងផ្តល់ប្រាក់មួយចំនួនឱ្យកូនរៀនបន្តនៅក្រុងភ្នំពេញ បានរៀងរាល់សប្តាហ៍។ដូច្នេះ មុខរបរលក់ម្ហូបនៅរមណីយដ្ឋានទេសចរណ៍ភ្នំឧត្តុង្គ ពិតជាសំខាន់សម្រាប់គ្រួសារអ្នកស្រី។
បើតាមអ្នកស្រី យឹម សុធា ការប្រកបមុខរបរលក់បាយ និងអាហារផ្អាប់នៅថ្ងៃសៅរ៍ និងថ្ងៃអាទិត្យរយៈពេលពីរថ្ងៃក្នុងមួយសប្តាហ៍នេះ អាចរកចំណូលបានប្រមាណ៨០ម៉ឺនរៀលពីមុខម្ហូប ហហ្មុកសាច់ត្រី, ត្រីប្រម៉ាចំហុយសាច់ជ្រូកពងទា,ផ្អកជូរ និងលក់បាយប្រអប់។
អ្នកស្រីបញ្ជាក់ថា “បើគ្រួសារខ្ញុំមិនមានមុខរបរលក់ម្ហូបនៅទីនេះ សម្រាប់ពឹងផ្អែកនោះទេ ជីវភាពគ្រួសារអាចជួបការលំបាកខ្លំាង ហើយទីតំាងលក់នៅក្នុងតំបន់រមណីយដ្ឋានភ្នំឧដុង្គ ប្រៀបបីដូចជាដីស្រែ ឬជាថ្នាលផ្តល់ផលប្រយោជន៍ល្អសម្រាប់គ្រួសារខ្ញុំ”។
ស្រដៀងគ្នានេះផងដែរ, អ្នកស្រី ចេន ស្រីលក្ខ័ណ ប្រកបមុខរបរលក់កង្កែបបោក និងមាន់អាំងជារៀងរាល់ថ្ងៃនៅរមណីយដ្ឋានទេសចរណ៍ភ្នំឧដុង្គនេះ មានរយៈពេលប្រាំឆ្នាំ បានឱ្យដឹងថា នៅថ្ងៃសៅរ៍ និងថ្ងៃអាទិត្យ អ្នកស្រីលក់បានប្រាក់៥០ទៅ៦០ម៉ឺនរៀល ហើយក្រោយពីកាត់ចំណាយហើយ នៅសល់ប្រាក់ប្រមាណ១០មឺនរៀល ។ ប៉ុន្តែសម្រាប់ការលក់ដូរនៅថ្ងៃធម្មតា អាចរកបានប្រាក់ចំណេញតិចតួច។
បើតាមអ្នកស្រី ចេន ស្រីលក្ខ័ណ, ការលក់ដូរនៅតំបន់រមណីដ្ឋានទេសចរណ៍ភ្នំឧត្តុង្គនេះ គឺជាទីតាំងដ៏សំខាន់ណាស់សម្រាប់អ្នកស្រី ក៏ដូចជាអាជីវករប្រកបមុខរបរផ្សេងទៀត ដោយសារគ្រួសារពួកគាត់រស់នៅពឹងផ្អែកលើចំណូល ដែលបានមកពីភ្ញៀវជាតិ និងអន្តរជាតិចូលទស្សនានៅទីនេះ។
ចំណែកអ្នកស្រី មឹល មករា ប្រកបមុខរបរលក់ហហ្មុកសាច់ត្រី និងនំអាកោខ្ទិះ បានឱ្យដឹងថា ទីតាំងនៅទីនេះមានសារៈសំខាន់ ព្រោះមានភ្ញៀវទេសចរមកកម្សាន្តច្រើន ធ្វើឱ្យប្រជាពលរដ្ឋលក់ដូរដាច់ ហើយនៅទីនេះសំបូរបែបម្ហូបបែបស្រុកស្រែលក់ច្រើន។ តួយ៉ាងនៅថ្ងៃចុងសប្តាហ៍អ្នកស្រីលក់ហហ្មុកសាច់ត្រី និងនំអាកោខ្ទិះ បានប្រាក់៦០ម៉ឺនរៀល។
អ្នកស្រី ជា សារ៉ុម ជំទប់ទី១ នៃសាលាឃុំផ្សារដែក ស្រុកពញាឮ ខេត្តកណ្តាល បានឱ្យដឹងថា មុននៅពេលមិនទាន់មានការរៀបចំប្រព័ន្ធហេដ្ឋារចនាសម្ព័ន្ធ ភ្ញៀវជាតិ និង អន្តរជាតិចូលមកទស្សនានៅរមណីយដ្ឋានទេសចរណ៍ភ្នំឧដុង្គ មានចំនួនតិចតួច។ តែក្រោយពេលអាជ្ញាធរបានរៀបចំសង្គ្រាន្តនៅរមណីយដ្ឋានទេសចរណ៍ឧត្តុង្គ និងមានប្រព័ន្ធហេដ្ឋារចនាសម្ព័ន្ធមានផ្លូវបេតុងខ្វាត់ខ្វែង ផ្តល់ភាពងាយស្រួលដល់ប្រជាពលរដ្ឋប្រកបមុខរបរលក់ដូរបានធ្វើឱ្យរមណីយដ្ឋានភ្នំឧដុង្គចាប់ផ្តើម ទទួលបានភ្ញៀវមកច្រើនគួរសមចូលមកទស្សនានៅទីនេះ ហើយជីវភាពរស់នៅរបស់ពលរដ្ឋពីមួយថ្ងៃទៅមួយថ្ងៃ មានការរីកចម្រើន។
អ្នកស្រីបន្តថា “ក្រោយពីមានការយកចិត្តទុកដាក់របស់រាជរដ្ឋាភិបាលក៏ដូចថ្នាក់ខេត្ត និងថ្នាក់ស្រុក យើងបានអភិវឌ្ឍផ្លូវ កែលម្អបរិស្ថាន ក៏មានភ្ញៀវចូលមកទស្សនាច្រើន រីឯជីវភាពរបស់ប្រជាពលរដ្ឋបច្ចុប្បន្ន គាត់មានជីវភាពធូរធាច្រើន បានកាត់បន្ថយភាពក្រីក្របានច្រើន”។
ចំណែកលោក សុខ កុល ក្រុមប្រឹក្សាឃុំផ្សារដែក បានគូសបញ្ជាក់ថា “តាមការវាយតម្លៃសេដ្ឋកិច្ចរបស់ប្រជាពលរដ្ឋ ដែលគាត់មកចូលរួមប្រកបអាជីវកម្មនៅទីនេះ មានការកើនឡើងជារៀងរាល់ថ្ងៃ ព្រោះមានភ្ញៀងមកទស្សនាមិនថាថ្ងៃសៅរ៍ អាទិត្យនោះទេ ភ្ញៀវមករាល់ថ្ងៃ។ ដូច្នេះ គាត់អាចលក់ដូរដាច់រាល់ថ្ងៃដែរ ធ្វើឱ្យជីវភាពឡើងមួយកម្រិតទៀត”។
រមណីយដ្ឋានប្រវត្តិសាស្ត្រ ដែលនៅក្នុងឃុំផ្សារដែក ស្រុកពញាឮ ខេត្តកណ្តាល មានឈ្មោះបីយ៉ាងតាមការពេញនិយមហៅរបស់អ្នកស្រុក មានដូចជា ភ្នំឧដុង្គ ភ្នំអដ្ឋរស្ស និងភ្នំព្រះរាជទ្រព្យ៕
