ភ្នំពេញ៖ សហគមន៍កសិកម្មបាត់ដំបង និងក្រុមហ៊ុន អេមរុរ៉ាយស៍កំពុងតែវិវត្តឆ្ពោះទៅរកប្រភេទដំណាំស្រូវបំភាយកាបូនទាប តាមរយៈការផ្តល់វគ្គបណ្តុះបណ្តាលដល់កសិករនៃសហភាពសហគមន៍កសិកម្ម តាមបណ្តាខេត្តអំពីការដាំដុះស្រូវប្រកបប្រកបដោយស្តង់ដារនិរន្តរភាព។
ដើម្បីសម្រេចឱ្យបាននូវគោលការណ៍កសិកមម្មកកើតឡើងវិញ និងមាននិរន្តរភាពនេះ កាលពីថ្ងៃទី០៩ ដល់ថ្ងៃទី១៣ ខែឧសភា ឆ្នាំ២០២៥កន្លងទៅនេះ នៅខេត្តបាត់ដំបង ក្រុមហ៊ុនអេមរុរ៉ាយស៍ បានដឹកនាំកសិករចុះអនុវត្តផ្ទាល់អំពីបច្ចេកទេសរៀបចំដី ការអនុវត្តបច្ចេកទេសសើមស្ងួត និងការដាំដុះដំណាំគម្របដី ដែលជាផ្នែកដ៏សំខាន់នៃការអនុវត្តកសិកម្មឆ្ពោះទៅរកការផលិតស្រូវដែលមានកាបូនទាប ស្របតាមការអនុវត្តគោលការណ៍កសិកម្មកកើតឡើងវិញ និងនិរន្តរភាព។
កម្មវិធីនេះនឹងផ្តល់ផលដល់កសិករនៅក្នុងខេត្តបាត់ដំបង សៀមរាប និងខេត្តកំពង់ធំ សរុប៩៧៣នាក់ ក្នុងនោះស្រី៤០៩នាក់ មានផ្ទៃដីដាំដុះស្រូវ ទំហំ៣២១៥ហិកតា ផ្តល់ទិន្នផលពីប្រមាណ១៣ ០០០តោន ទៅ១៨ ០០០តោន ហើយទិន្នផលស្រូវ ដែលដាំដុះស្របតាមការអនុវត្តគោលការណ៍ នឹងអាចទទួលបានតម្លៃបុព្វលាភបន្ថែមលើតម្លៃទីផ្សារពីក្រុមហ៊ុន។ ជាក់ស្តែង ស្រូវសែនក្រអូបនឹងអាចទទួលបានបន្ថែមប្រមាណ៧២ ០០០រៀល ក្នុងមួយតោន។
ក្រុមហ៊ុនអេមរុរ៉ាយស៍ បានផ្តល់ឱ្យកសិករនូវចំណេះដឹងអនុវត្តដូចជា ការកៀរពង្រាបដី និងការរៀបចំផ្ទៃដីស្រែឱ្យស្អាតគ្មានស្មៅ និងរាបស្មើ ដើម្បងាយស្រួលក្នុងការគ្រប់គ្រងទឹក គ្រប់គ្រងស្មៅចង្រៃ និងការប្រើប្រាស់ជី ដែលមានប្រសិទ្ធភាពខ្ពស់។ ចំណែកឯការអនុវត្តបច្ចេកទេសវិញ បានផ្តល់ឱ្យកសិករយល់ដឹងអំពីរបៀបដំឡើងបំពង់សម្រាប់ពិនិត្យទឹកក្នុងស្រែ ការជ្រើសរើសទីតាំងដាក់បំពង់ពិនិត្យទឹកក្នុងស្រែ ការគ្រប់គ្រងទឹក ពេលវេលា និងកម្រិតទឹកត្រូវបញ្ជូល ឬបញ្ចេញទឹកពីស្រែ ដើម្បីបង្កើនទិន្នផល និងកាត់បន្ថយការបំភាយឧស្ម័នមេតាន។ មួយវវិញទៀត សម្រាប់ដំណាំគម្របដី ត្រូវបានប្រើប្រាស់ជាបច្ចេកទេសមួយក្នុងការគ្រប់គ្រងស្មៅ និងកែលម្អគុណភាពដី ដោយកសិករអាចពង្រោះស្រូវ និងដំណាំគម្របដីក្នុងពេលតែមួយ ឬពង្រោះដំណាំគម្របដីនៅពេលស្រូវជិតទុំច្រូតកាត់ ឬនៅមុនការដាំដុះស្រូវ ឬនៅពេលដីស្រែទំនេរ។
ក្រោយពីបានស្វែងយល់នៅវាលស្រែអំពីការអនុវត្តជាក់ស្ដែងនូវបច្ចេកទេសទាំងនេះ កសិករក៏ទទួលបានបំពង់សម្រាប់ពិនិត្យទឹកក្នុងស្រែ និងគ្រាប់ពូជដំណាំសង្រ្កងស្វាស្លឹកតូច ដើម្បីយកទៅអនុវត្តផ្ទាល់នៅលើដីរបស់ខ្លួនបន្ថែមទៀត។
ក្នុងឱកាសនេះដែរ ក្រុមហ៊ុនអេមរុរ៉ាយស៍ ក៏បានថ្លែងអំណរគុណដល់ដៃគូអភិវឌ្ឍន៍ មានដូចជា Carbon Farm, Wat4Cam, Cirad, Die Meas ដែលបានគាំទ្រក្នុងការផ្ដល់បច្ចេកទេស និងលទ្ធផលស្រាវជ្រាវ ដែលជាកត្ដាសំខាន់ក្នុងការអនុវត្តការងារបច្ចេកទេសទាំងអស់នេះ និងសូមលើកទឹកចិត្តឱ្យដៃគូអភិវឌ្ឍន៍ និងកសិករទាំងអស់បន្ដសកម្មភាពនេះទៅមុខទៀត ដើម្បីចូលរួមលើកកម្ពស់សមត្ថភាពបច្ចេកទេសដាំដុះ ការពារការប្រែប្រួលអាកាសធាតុ និងជាពិសេសចូលរួមចំណែកដល់ការអភិវឌ្ឍសេដ្ឋកិច្ចផងដែរ៕
