ប៉េកាំង៖ មុខម្ហូបសាច់គោរបស់ភោជនីយដ្ឋានមួយ ដែលកាលពីមុន សាច់គោសុទ្ធតែនាំចូលពីសហរដ្ឋអាម៉េរិកទាំងអស់ ប៉ុន្តែចាប់តាំងពីផ្ទុះសង្គ្រាមពាណិជ្ជកម្មមក សាច់គោនៅក្នុងហាងនេះ គឺនាំចូលពីប្រទេសអូស្ត្រាលីវិញម្តង។
ភោជនីយដ្ឋាននេះ ប្រើសាច់គោប្រហែលប្រាំពីរ ទៅប្រាំបីតោនក្នុងមួយខែ ហើយជាសាច់គោរបស់អាម៉េរិក ដែលត្រូវបាននាំចូល និងត្រូវបានរក្សាទុកនៅក្នុងទូរបង្កករហូតដល់ពីរបីសប្តាហ៍ ដើម្បីធ្វើម្ហូបជូនភ្ញៀវ ប៉ុន្តែដល់ពេលឥឡូវនេះ ហាងនេះប្រើតែសាច់គោពីប្រទេសអូស្ត្រាលីប៉ុណ្ណោះ។
សាច់គោអាម៉េរិក បានរងគ្រោះមុនគេនៅប្រទេសចិន ក្នុងសង្គ្រាមពាណិជ្ជកម្មរវាងដៃគូពាណិជ្ជកម្មដ៏ធំបំផុតរបស់ពិភពលោក។ មុនពេលសង្គ្រាមចាប់ផ្ដើម សាច់គោអាម៉េរិក ដូចជាសាច់ស្មា សាច់ជាប់ឆ្អឹងជំនី និងសាច់ចំឡកជាដើម មានតម្លៃថ្លៃណាស់រួចទៅហើយ លុះពន្ធបដិការបស់ទីក្រុងប៉េកាំង ឡើងដល់១២៥ភាគរយ ដើម្បីតបទៅអាម៉េរិកវិញ ធ្វើឱ្យសាច់គោលែងមានអ្នកទិញហូប ព្រោះវាថ្លៃខ្លាំងពេក។
លោក ឆាល ឌឺប៉េឡែត (Charles de Pellette) នាយកប្រតិបត្តិការរបស់ហាងសាច់គោអាំងនេះ បាននិយាយថា “វាពិតជាធ្វើឱ្យពិបាកដល់ពួកយើងខ្លាំងណាស់ ក្នុងការបន្តលក់សាច់គោសហរដ្ឋអាម៉េរិក” ។
សាច់គោអាម៉េរិក ត្រូវបាននាំចូលទីផ្សារប្រទេសចិនក្នុងតម្លៃទឹកប្រាក់១២៥លានដុល្លារក្នុងមួយខែ ឥឡូវការធ្វើពាណិជ្ជកម្មមុខទំនិញនេះ ការលុបឈ្មោះសាច់គោចេញពីម៉ឺបញ្ជីមុខម្ហូប នៅតាមហាងក្នុងទីក្រុងប៉េកាំង គឺជាការបង្ហាញឱ្យឃើញពីជោគវាសនាអាក្រក់នៃទំនិញរាប់ពាន់មុខរបស់ប្រទេសទាំងពីរ គឺចិន និងអាម៉េរិក។
លោក ឆាល ឌឺប៉េឡែត បាននិយាយថា “នៅពេលយើងអស់ពីស្តុក យើងឈប់កុម្ម៉ង់ចូលទៀតហើយ យើងនឹងប្តូរទៅប្រើសាច់គោអូស្ត្រាលីទាំងអស់តែម្តង។ យើងនៅតែគិតថា រសជាតិឆ្ងាញ់ដូចល្អ និងមានគុណភាពល្អដូចគ្នា ប៉ុន្តែយើងត្រូវតែដូរចេញ ដោយសារតែសម្ពាធពីទីផ្សារ និងពន្ធច្រើនពេក”។
លោកបានបញ្ជាក់បន្ថែមទៀតថា ចំណែកសាច់ឆ្អឹងជំនីជ្រូកវិញក៏ដូរចេញដែរ។ ឥឡូវនេះ សាច់ជ្រូកនាំចូលមកពីប្រទេសកាណាដាវិញម្តង។
យោងតាមអ្នកផ្គត់ផ្គង់សាច់គោ នៅក្នុងទីក្រុងប៉េកាំង បាននិយាយថា នេះគឺជាបទពិសោធន៍ល្វីងជូរចត់នៃបណ្តាញភោជនីយដ្ឋាន ដែលមានសាខាចំនួនបី នៅក្នុងប្រទេសចិន។
អ្នកផ្គត់ផ្គង់សាច់គោដដែលនេះ បាននិយាយទៀតថា «គេត្រូវប្តូរទៅប្រើសាច់គោអូស្ត្រាលី – សូម្បីតែភោជនីយដ្ឋានសាច់អាំងអាម៉េរិក ក៏ត្រូវប្រើសាច់គោអូស្ត្រាលីដែរ»។
សាច់គោអាម៉េរិក នៅក្នុងប្រទេសចិន បានឡើងថ្លៃតាំងពីមុនសង្គ្រាមពាណិជ្ជកម្មចាប់ផ្តើមម៉្លេះ ដោយសារខ្វះសាច់ ដែលបង្កឡើងដោយអាកាសធាតុរាំងស្ងួតអស់ជាច្រើនឆ្នាំកន្លងមក។
តម្លៃសាច់ស្មារបស់សហរដ្ឋអាម៉េរិក បានឡើងថ្លៃជិត៥០ភាគរយ នៅក្នុងចន្លោះខែឧសភា និងខែមីនា ឆ្នាំ២០២៥ បន្ទាប់មកបានឡើងយ៉ាងខ្លាំងបន្ថែមទៀត ដោយពន្ធរបស់លោក ដូណាល់ ត្រាំ។ ចំណែកអ្នកលក់សាច់គោអូស្ត្រាលីកំពុងតែសម្លឹងរកហក់ចូលជំនួស ហើយមានតម្លៃថោកជាងសាច់គោអាម៉េរិករហូតដល់៤០ភាគរយ។
លោក ឆាល ឌឺប៉េឡែត បាននិយាយថា «យើងបានសាកល្បងប្រើសាច់គោអូស្ត្រាលីអស់រយៈពេលពីរបីខែ ហើយយើងបានឃើញថា តាមពិតវាល្អដូចតែគ្នា ហើយអតិថិជនរបស់យើងក៏ចូលចិត្តដែរ»៕
