អន្តរជាតិ៖ សត្វត្រី ប្លប ហ្វីស( Blobfish) ត្រូវបានគេចាត់ទុកថា ជាសត្វដែលមានមុខមាត់អាក្រក់បំផុតនៅក្នុងពិភពលោក ដោយសារវាមានមុខមាត់គួរឱ្យ ភ្ញាក់ផ្អើល ប៉ុន្តែត្រីនេះបានឈ្នះពានរង្វាន់ “ត្រីប្រចាំឆ្នាំ២០២៥” ពីអង្គការអភិរក្សបរិស្ថានណូវែលសេឡង់។
ក្នុងការប្រកួតប្រជែងប្រចាំឆ្នាំនេះ បានរៀបចំឡើងដោយសមាគមអភិរក្សសត្វព្រៃ និងសត្វសមុទ្រ (Mountain to Sea Conservation Trust) របស់ប្រទេសណូវែលសូឡង់ ក្នុងគោលបំណងលើកកម្ពស់ការយល់ដឹងអំពីសត្វទឹកសាប និងប្រភេទសត្វរស់នៅក្នុងសមុទ្រទឹកប្រៃ។
លទ្ធផលការប្រកួតនៅឆ្នាំនេះ ត្រីប្លប ហ្វីស បានឈ្នះតំណែងដ៏មានកិត្យានុភាព ដោយមានសំឡេងឆ្នោតជាង១ ៣០០ លើសំឡេងឆ្នោតសរុបជាង៥ ៥០០។
វាជាជ័យជម្នះ ដែលមិននឹកស្មានដល់សម្រាប់ត្រីមុខអាក្រក់ ដែលគេមិនចង់ឃើញពួកវាបែរជាឈ្នះ ដោយបានទទួលការចាប់អារម្មណ៍ និងក្លាយជាត្រីល្បីឈ្មោះមួយរំពេច។
កាលពីមុននេះ ត្រី ប្លប ហ្វីស ធ្លាប់ល្បីថា ជាត្រីល្បីឈ្មោះមានមុខមាត់អាក្រក់ របស់សមាគមអភិរក្សសត្វព្រៃ និងសត្វសមុទ្រ ក្នុងឆ្នាំ២០១៣ ម្តងរួចមកហើយ។
គួរបញ្ជាក់ថា ត្រី ប្លប ហ្វីស រស់នៅក្នុងបាតសមុទ្រ ហើយអាចលូតលាស់ដល់ប្រវែងប្រមាណ៣០ សង់ទីម៉ែត្រ។ គេអាចរកឃើញត្រី ប្លប ហ្វីស ភាគច្រើននៅតាមឆ្នេរសមុទ្រនៃកោះថេសម៉ានៀ (Tasmania) ប្រទេសអូស្រ្តាលី ដោយពួកវារស់នៅក្នុងជម្រៅ៦០០-១២០០ម៉ែត្រនៅក្រោមមហាសមុទ្រ។
ទោះបីជារូបរាងខាងក្រៅរបស់វាមើលទៅប្លែកក៏ដោយ ប៉ុន្តែនៅក្នុងបរិយាកាសក្រោមទឹកជ្រៅ ត្រីប្លប ហ្វីស មានរូបរាងធម្មតាស្រដៀងនឹងត្រីដទៃទៀតផងដែរ។ ដោយសារតែសម្ពាធទឹកខ្ពស់ជួយរក្សារូបរាងរបស់វា។ ប៉ុន្តែនៅពេលគេយកវាចេញផុតពីផ្ទៃទឹកយ៉ាងលឿន បានធ្វើឱ្យរាងកាយរបស់វាខូចទ្រង់ទ្រាយ ដោយប្រែទៅជាសាច់ចាហួយទន់ទៅវិញ។ តាមរយៈការប្រែប្រួលរូបរាងនេះដែរ ទើបវាទទួលឈ្មោះហៅក្រៅថា ជាសត្វអាក្រក់បំផុតរបស់ពិភពលោក។
ដោយឡែកចំពោះត្រី ដែលជាប់ចំណាត់ថ្នាក់លេខ២ ក្នុងការប្រកួតនេះគឺ Orange Roughy ជាត្រីសមុទ្រទឹកជ្រៅ ដែលមានលក្ខណៈប្លែកមួយប្រភេទទៀតក្នុងសមុទ្រ។
ត្រី ប្លប ហ្វីស វាស៊ីសំបកខ្យង ក្តាម បង្គា បង្កង និងអណ្តើកសមុទ្រ។ លក្ខណៈពិសេសរបស់វា គឺគ្មានឆ្អឹងរឹង និងគ្មានស្រកា។ ប៉ុន្តែជាមួយនឹងរាងកាយទន់ និងស្បែកធ្លាក់យារ ពេលនេះ ប្លបហ្វីស ត្រូវបានចាត់ទុកថា ជាសត្វដែលប្រឈមនឹងការផុតពូជដោយសារតែពួកវាត្រូវបានគំរាមកំហែងដោយការប្រមាញ់ពីសំណាក់អ្នកនេសាទអូសអួនក្នុងទឹកសមុទ្រជ្រៅៗនោះ៕
