អន្តរជាតិ៖ ក្រសួងពាណិជ្ជកម្មថៃ កាលពីសប្តាហ៍មុន បានចាត់វិធានការបន្ទាន់មួយ ដើម្បីជួយលើកតម្កើងតម្លៃស្រូវអង្កររបស់ថៃឡើងវិញ បន្ទាប់ពីមានការធ្លាក់ចុះយ៉ាងគំហុក និងធ្វើឲ្យកសិករមានការព្រួយបារម្ភ លើកគ្នាតវ៉ាសុំឲ្យរដ្ឋាភិបាលជួយអន្តរាគមន៍។
យោងតាមកាសែត បាងកកប៉ុស្តិ៍ បានចេញផ្សាយថា វិធានការខាងលើនេះ រួមមានដូចជាធ្វើពិព័រណ៍ទីផ្សារស្រូវអង្ករ ពង្រីកការនាំចេញ និងបង្កើតអនុគណៈកម្មាធិការ សម្រាប់ដោះស្រាយបញ្ហាតម្លៃស្រូវអង្ករ។
រដ្ឋមន្ត្រីក្រសួងពាណិជ្ជកម្មថៃ លោក ភិឆៃ ណារីបថាផាន (Pichai Naripthaphan) បានមានប្រសាសន៍ថា ការធ្លាក់ចុះតម្លៃអង្ករថៃនាពេលថ្មីៗនេះ គឺបណ្តាលមកពីកត្តាខាងក្រៅ ជាពិសេសការបន្តការនាំចេញអង្គរឡើងវិញរបស់ប្រទេសឥណ្ឌា និងការថយចុះតម្រូវការនៅប្រទេសឥណ្ឌូនេស៊ី និងហ្វីលីពីន។
យោងតាមនាយកដ្ឋានពាណិជ្ជកម្មផ្ទៃក្នុងរបស់ថៃ បានឲ្យដឹងថា បើគិតត្រឹមថ្ងៃទី១៧ ខែកុម្ភៈ ឆ្នាំ២០២៥នេះ តម្លៃស្រូវ ហុនម៉ាលី របស់ថៃ មានតម្លៃពី១៥ ៥០០ ទៅ ១៦ ៥០០បាត ក្នុងមួយតោន គែកើនឡើង៨ភាគរយពីមួយឆ្នាំទៅមួយឆ្នាំ ចំណែកស្រូវ ផាធុម ថានី មានតម្លៃពី១១ ៥០០ ទៅ១២ ៧០០បាត ក្នុងមួយតោន ដោយធ្លាក់ចុះ ១៦ភាគរយ។
លោករដ្ឋមន្ត្រីក្រសួងពាណិជ្ជកម្ម បានបញ្ជាក់ថា ក្រសួងបានអនុម័តវិធានការបន្ទាន់ ដើម្បីដោះស្រាយការធ្លាក់ចុះតម្លៃស្រូវ ហើយក្រសួងគ្រោងនឹងកោះប្រជុំអនុគណៈកម្មការគោលនយោបាយជាតិ និងគ្រប់គ្រងទីផ្សារអង្កររបស់ថៃ ដើម្បីចាត់វិធានការយ៉ាងណាជួយគាំទ្រដល់កសិករ ដែលរងផលប៉ះពាល់ដោយតម្លៃស្រូវអង្ករធ្លាក់ចុះនេះ។
លោកបានបន្តថា ក្រសួងក៏បានរៀបចំពិព័រណ៍ទីផ្សារស្រូវនៅក្នុងខេត្តចំនួន២០ ស្ថិតនៅតាមដងទន្លេចៅប្រាយ៉ា ដើម្បីផ្តល់ឱកាសដល់កសិករអាចលក់ស្រូវបានតម្លៃខ្ពស់ ដោយរំពឹងថា នឹងធ្វើឱ្យតម្លៃស្រូវអង្ករកើនឡើងពី១០០ទៅ២០០បាត ក្នុងមួយតោន បន្ទាប់ពីពិព័រណ៍ស្រូវអង្ករលើកដំបូង ត្រូវបានប្រារព្ធធ្វើឡើងនៅក្នុងខេត្តអយុធ្យា ចាប់ពីថ្ងៃទី១៦ ដល់ថ្ងៃទី២០ ខែកុម្ភៈ ឆ្នាំ២០២៥ ចំណែកពិព័រណ៍ចំនួន១៤ទៀត គ្រោងនឹងធ្វើរហូតដល់ខែមេសា ឆ្នាំនេះ។
ទាក់ទងនឹងការពង្រីកការនាំចេញវិញ លោក ភិឆៃ ណារីបថាផាន គ្រោងនឹងធ្វើទស្សនកិច្ចនៅប្រទេសអាហ្វ្រិកខាងត្បូង ក្នុងខែមីនាខាងមុខនេះ ដើម្បីចុះហត្ថលេខាលើអនុស្សរណៈនៃការយោគយល់គ្នា សម្រាប់ទិញអង្ករទិញក្នុងបរិមាណចំនួន៣០០ ០០០តោន ដែលមានតម្លៃជាង៥,២៥ពាន់លានបាត រួមទាំងការចុះហត្ថលេខាលើកិច្ចព្រមព្រៀងរវាងរដ្ឋាភិបាលថៃ ជាមួយរដ្ឋាភិបាលចិន សម្រាប់នាំចេញអង្ករក្នុងបរិមាណចំនួន២៨០ ០០០តោន នៅកាន់ប្រទេសចិន។
ព្រមជាមួយគ្នានេះដែរ ក្រសួងពាណិជ្ជកម្មថៃ បានឲ្យដឹងទៀតថា ជំនួយឥណទានឯកទេសពីរដ្ឋាភិបាលនឹងត្រូវផ្តល់ជូនដល់សហគ្រាសស្រូវអង្ករ ដោយសហការជាមួយធនាគាររបស់ប្រទេសថៃ ដើម្បីផ្តល់កម្ចីដល់អាជីវកម្ម និងក្រុមហ៊ុននាំចេញអង្ករ សម្រាប់សម្រួលដល់ការទិញស្រូវពីកសិករ និងកសាងហេដ្ឋារចនាសម្ព័ន្ធសម្រាប់ស្តុកស្រូវបន្ថែមទៀត។
លើសពីនេះទៅទៀត ក្រសួងពាណិជ្ជកម្ម ក៏មានគម្រោងផ្សព្វផ្សាយអង្ករថៃជាអន្តរជាតិ សម្រាប់ការពង្រីកទីផ្សារក្នុងរយៈពេលវែង ដូចជាស្វែងរកឱកាសទីផ្សារថ្មីៗ នៅសហរដ្ឋអាមេរិក សហភាពអឺរ៉ុប និងនៅប្រទេសហ្វីលីពីន រួមជាមួយនឹងការចូលរួមក្នុងពិព័រណ៍ពាណិជ្ជកម្មអន្តរជាតិជាច្រើនទៀត ដើម្បីពង្រឹងទំនុកចិត្តលើគុណភាពអង្ករថៃ។
លោកបានមានប្រសាសន៍ថា «ប្រសិនបើយុទ្ធសាស្រ្តរបស់យើងទទួលបានជោគជ័យ យើងអាចរំពឹងទុកថានឹងមានការងើបឡើងវិញនៃតម្លៃស្រូវអង្ករ។ យើងប្តេជ្ញាធ្វើអ្វីគ្រប់យ៉ាង ដើម្បីជួយដល់កសិកររបស់យើង»។
កាសែតដដែល បានចេញផ្សាយទៀតថា កសិករថៃមកពីតាមបណ្តាខេត្តមួយចំនួន បានប្រមូលផ្តុំគ្នានៅក្នុងទីក្នុងបាងកក ដើម្បីទាមទារឲ្យមានការគាំទ្រពីរដ្ឋាភិបាល ខណៈតម្លៃស្រូវអង្ករបន្តធ្លាក់ចុះ។
ក្រសួងពាណិជ្ជកម្ម បានឲ្យដឹងថា តម្លៃស្រូវអង្កររបស់ថៃបានធ្លាក់ចុះ៣០ភាគរយ ពីមួយឆ្នាំទៅមួយឆ្នាំ មកនៅប្រហែល៨ ៦០០បាត ក្នុងមួយតោន នាខែកុម្ភៈ ឆ្នាំ២០២៥នេះ។
មេដឹកនាំកសិករមកពីខេត្តអយុធ្យា កាលពីថ្ងៃពុធបាននិយាយថា ពួកគេមិនសប្បាយចិត្តនឹងវិធានការនេះទេ។ ពួកគេគិតថា រដ្ឋាភិបាលមិនស្មោះត្រង់ជាមួយកសិករទាល់តែសោះ។
រដ្ឋាភិបាលថៃ កាលពីថ្ងៃទី២០ ខែកុម្ភៈ បានប្រកាសចាត់វិធានការ ដែលមានតម្លៃទឹកប្រាក់ចំនួន១,៨៩ ពាន់លានបាត រួមទាំងការផ្តល់ប្រាក់កម្ចីសម្រាប់កសិករ ដើម្បីពន្យារការលក់ស្រូវ ជំនួយលើថ្លៃស្តុកទុកស្រូវ និងថ្លៃការប្រាក់ស្តុកទុ៧កស្រូវរបស់សហគ្រាសរោងម៉ាស៊ីនកិនស្រូវ។
ប៉ុន្តែរដ្ឋមន្ត្រីក្រសួងពាណិជ្ជកម្ម បានប្រាប់អ្នកយកព័ត៌មានថា វិធានការទាំងនេះ មិនទាន់ត្រូវបានអនុម័តដោយគណៈរដ្ឋមន្ត្រីឡើយ ដើម្បីរក្សាតម្លៃស្រូវឱ្យលើសពី៨ ០០០បាត ក្នុងមួយតោន។ ខណៈកសិករស្នើឱ្យរដ្ឋាភិបាលជួយពួកគេលក់អង្ករក្នុងតម្លៃ១១ ០០០បាត ក្នុងមួយតោន ឬផ្តល់តម្លៃធានាក្នុងកម្រិតដូចគ្នា ខណៈដែលតម្លៃផលិតមានកម្រិតខ្ពស់រហូតដល់៦ ៥០០បាតក្នុងមួយតោន។
ការបន្តនាំចេញអង្ករឡើងវិញ របស់ប្រទេសឥណ្ឌា ដែលជាប្រទេសនាំចេញគ្រាប់ធញ្ញជាតិធំជាងគេលើពិភពលោក ទំនងជាបង្កផលប៉ះពាល់ដល់ប្រទេសថៃយ៉ាងខ្លាំង ដោយក្រសួងរំពឹងថា ការនាំចេញអង្ករនឹងធ្លាក់ចុះមកនៅត្រឹម២៤ភាគរយ ពីមួយឆ្នាំទៅមួយឆ្នាំ មកនៅត្រឹម២,៥លានតោន នៅឆ្នាំ២០២៥នេះ។
កសិករមកពីតាមបណ្តា ខេត្តជាច្រើន រួមទាំងខេត្តសុខាទ័យ ខេត្តភិសានុលោក និងខេត្តសុផាន បុរី សង្ឃឹមថា ពួកគេនឹងបានជួបជាមួយលោកស្រីនាយករដ្ឋមន្ត្រី រួមទាំងរដ្ឋមន្ត្រីក្រសួងកសិកម្ម ឬរដ្ឋមន្ត្រីក្រសួងពាណិជ្ជកម្ម ដើម្បីពិភាក្សាអំពីវិធានការដោះស្រាយការធ្លាក់ថ្លៃស្រូវអង្ករ៕
