ឯកឧត្តមបណ្ឌិត កៅ ថាច ណែនាំកសិករនៅស្រុកស្ទោង​ ខេត្តកំពង់ធំ​​ ឱ្យគិតពីថ្លៃដើមផលិត

photo_2026-11-03_08-39-11

ដោយ ឡុង សារេត

ខេត្តកំពង់ធំ៖  ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងជាប្រធានសមាគម​បណ្តាញកសិករតេជោ នៅរសៀលថ្ងៃទី​២ ខែវិច្ឆិកា ឆ្នាំ​២០២៦ បានដឹកនាំ​សហការីជួបសំណេះសំណាល និងសួរសុខទុក្ខប្រជាកសិករជាង​៣០០នាក់ នៅស្រុកស្ទោង ខេត្តកំពង់ធំ​។

ពិធីនេះមានការអញ្ជើញចូលរួមជាកិត្តិយសពីឯកឧត្តម តាំង ម៉េងលាង អភិបាលខេត្តកំពង់ធំ លោក យ៉ុម ហឿន អភិបាលរងស្រុកស្ទោង ក្រុមការងារសមាគមបណ្តាញកសិករតេជោ មន្ទីរកសិកម្ម​ខេត្ត រដ្ឋបាល​ស្រុក ការិយាល័យ​កសិកម្ម​ស្រុក មេឃុំ​គ្រប់ឃុំ មេភូមិ​គ្រប់ភូមិ តំណាង​សហគមន៍​កសិកម្ម រួមនិងកសិករប្រមាណ៣០០នាក់​។​

ឯកឧត្តមបណ្ឌិត កៅ ថាច​ មានប្រសាសន៍ថា​ គោលបំណង​នៃការជួបសំណេះសំណាល​ និងសួរសុខទុក្ខ​បងប្អូន​ប្រជាកសិករ​នៅស្រុកស្ទោងនេះ មានគោលដៅ​​ធំ៣៖

១)-ចង់បង្ហាញឱ្យស្គាល់​សមាគមបណ្តាញកសិករតេជោ។​ ទី​២)-បង្ហាញឱ្យស្គាល់​ធនាគារអភិវឌ្ឍន៍ជនបទ និងកសិកម្ម និងទី​៣)-ចង់ជជែក​អំពីបញ្ហា​ការធ្វើកសិកម្ម​របស់បងប្អូននៅក្នុងស្រុកស្ទោង​។

ឯកឧត្តមបណ្ឌិតប្រតិភូ មានប្រសាសន៍ថា​ “សមាគមបណ្តាញកសិករតេជោ មានតួនាទី ទី១)- ជាស្ពានឱ្យបងប្អូនប្រជាកសិករទូទាំងប្រទេសដើរឆ្លង​ ភ្ជាប់ទៅ​ប្រភពហិរញ្ញវត្ថុ​ ដែលមានទឹកចិត្តស្រឡាញ់ជួយ​ដល់​វិស័យកសិកម្ម​។ ស្ពានទី​២)- ជាស្ពានដើរឆ្លងទៅរកបច្ចេកទេស​។ បងប្អូនមានរបៀបរបរក្នុងការដាំដុះ ចិញ្ចឹម​សត្វ  ចិញ្ចឹមត្រី ខ្លួនឯងហើយ​ ប៉ុន្តែបច្ចេកទេសថ្មីៗមានច្រើន  និងមានការអភិវឌ្ឍពីមួយឆ្នាំទៅមួយឆ្នាំ​។ ដូច្នេះ ទាមទារចំណេះដឹងថ្មី​បន្ថែម​ តាមរយៈសមាគមបណ្តាញកសិករតេជោ។​ ស្ពានទី​៣)​ ជាស្ពានដើរឆ្លងទៅរកទីផ្សារ​  ព្រោះការធ្វើកសិកម្ម​ ហើយលក់មិនដាច់​ បងប្អូនអាចយំ ។ យើងខ្ញុំអាចផ្តល់ព័ត៌មានលក់នៅកន្លែងណា​ ឬអាចង្អុលប្រាប់​ឱ្យក្រុមហ៊ុន​ផ្សេង​មកជួយទិញ​បងប្អូន​បាន​។ ទីផ្សារពិតជាសំខាន់ណាស់​ មានតែដើមទុនតែអត់មានទីផ្សារ​ គឺជាហានិភ័យខ្ពស់​។ ស្ពានទី​៤) ជាស្ពានចម្លងសំឡេង​របស់បងប្អូនកសិករ​នៅតាម​មូលដ្ឋាន​។ សំឡេងនៃការព្រួយបារម្ភ​ សំឡេងបង្ហាញពីទុក្ខលំបាក​ ត្រូវការជំនួយ​ ដើម្បីឱ្យអ្នកជំនាញផ្នែក កសិកម្ម អាជ្ញាធរមានសមត្ថកិច្ច ថ្នាក់ដឹកនាំ​បានឮនៅទូទាំងប្រទេស​ ចុះដោះស្រាយ​បានលឿន​។​ ខ្ញុំមិនចង់ឃើញ​សំឡេង​កង្វល់​របស់បងប្អូន នៅភូមិឃុំ​ត្រូវកប់ចោល​នោះទេ​។

សម្រាប់តួនាទី២របស់សមាគមបណ្តាញកសិករតេជោ​ គឺ​ចង់ធ្វើជាខែល​ឱ្យបងប្អូន​ជ្រក​ពេល​ភ្លៀង ជ្រកពេល​ថ្ងៃ​ ទាំងក្តៅទាំងត្រជាក់​បាន។ ជួយការពារ​ភាពស្របច្បាប់ ភាពត្រឹមត្រូវរបស់បងប្អូន​​។​ បើបងប្អូនមានរឿង​ណា​ដែលមានការ​រំលោភ​ឬបំពានដោយខុសច្បាប់ដោយបុគ្គលណាមួយ យើងខ្ញុំអាចផ្តល់មេធាវី​ ឬត្រូវផ្តល់ជាយោបល់ត្រូវធ្វើរបៀបម៉េច​បា​ន​។ នេះហើយគឺជាជម្រកឬ​ ជាខែល​សម្រាប់ការពារភាពស្របច្បាប់របស់បងប្អូន​។​

ឯកឧត្តបណ្ឌិតបានគូសបញ្ជាក់បន្ថែមថា៖ ​“ដូចនេះសូមបងប្អូនជឿជាក់មកលើសមាគមបណ្តាញកសិករតេជោ របស់យើង​ ហើយបងប្អូន​អាចចូលរួម​បានទោះបីបងប្អូននៅក្នុងសហគមន៍កសិកម្មណាក៏អាចចូលរួមនៅតាមបណ្តាញ​ណាមួយក៏បាន ដើម្បីទទួលបាននូវអត្ថប្រយោជន៍”​។
ឯកឧត្តមបណ្ឌិត លើកឡើង​ថា កង្វល់ធំ​របស់បងប្អូនប្រជាកសិករធ្វើកសិកម្ម គឺ​ទុននិងទីផ្សារ​។ បើនិយាយ​ពីទុន របស់ធនាគារ​​​ ARDB មាន​អត្រាការប្រាក់​សមរម្យ​សម្រាប់យកប្រើប្រាស់ក្នុងមុខរបរក្នុងវិស័យ​កសិកម្ម ដែលអាចទទួលបាន​ផលចំណេញ​​ ។ លើសពីនេះ ឯកឧត្តមបណ្ឌិត ក្រើនរំលឹក​ដល់ប្រជាកសិករ​ថា ថ្មីៗរាជរដ្ឋាភិបាលក៏បានជូនដំណឹងអំពីកង្វះទឹកសម្រាប់ធ្វើកសិកម្ម​ដោយសារតែស៊ុពើអែលនីញ៉ូ ដែលអាចធ្វើឱ្យ​ខ្វះខាតទឹកនៅពេល​ខាងមុខ​​។ ដូចនេះមុនធ្វើទាមទារឱ្យមានគិតគូរ ពិចារណា​ឱ្យបានច្បាស់លាស់ ចៀសវាងការខាតបង់ប្រាក់​និងខាតបង់ពេលវេលា​។

បន្ថែមលើសពីនេះ​ ឯកឧត្តមបណ្ឌិត​ ក៏បាន​លើកទឹកចិត្ត​ឱ្យ​បងប្អូនប្រជាកសិករ នៅក្នុងស្រុកស្ទោង ខេត្តកំពង់ធំ ចាប់អារម្មណ៍​ទៅលើការ​​គិតគូ​ដល់​ថ្លៃដើមផលិតស្រូវឱ្យបានច្បាស់លាស់ ​ ដើម្បីឱ្យ​​ដឹងថាបាន​ប្រាក់ចំណេញឬខាត​នៅពេលលក់កសិផលរបស់ខ្លួន​ម្តងៗ៕


photo_2026-11-13_13-49-41
ស្វាយចន្ទីខ្មែរ កំពុងទាក់ចិត្តក្រុមហ៊ុនជប៉ុនមួយទៀត មកកែច្នៃគ្រាប់ និងចម្រាញ់ប្រេង

ភ្នំពេញ៖ ក្រុមហ៊ុនជប៉ុន ជេ អេហ្វ អ៊ី ស៊ូជី (JFE Shoji) កំពុងស្វែងរកឱកាសវិនិយោគនៅកម្ពុជា លើការបង្កើតរោងចក្រកែច្នៃគ្រាប់ស្វាយចន្ទី និងចម្រាញ់ប្រេងពីសំបកស្វាយចន្ទី ដែលអាចមានសមត្ថភាពកែច្នៃគ្រាប់ស្វាយចន្ទីឆៅ ៣០ ០០០តោន និងផលិតប្រេង CNSL ៥ ០០០តោនក្នុងមួយឆ្នាំ។ គម្រោងនេះគ្រោងចាប់ផ្តើមដំណើរការវិនិយោគ និងសាងសង់នៅឆ្នាំ២០២៧ ប្រសិនបើការសាកល្បងបច្ចេកទេសទទួលបានជោគជ័យ។ ក្រុមហ៊ុន ជេ អេហ្វ អ៊ី ស៊ូជី (JFE Shoji) របស់ជប៉ុន កំពុងស្វែងរកឱកាសវិនិយោគ និងកិច្ចសហការដើម្បីបង្កើតរោងចក្រកែច្នៃគ្រាប់ស្វាយចន្ទី និងរោងចក្រចម្រាញ់ប្រេងពីសំបកស្វាយចន្ទីនៅកម្ពុជា ដែលអាចមានសមត្ថភាពកែច្នៃគ្រាប់ស្វាយចន្ទីឆៅ៣០​ ០០០តោនក្នុងមួយឆ្នាំ។ យោងតាមសមាគមស្វាយចន្ទីកម្ពុជា (CAC) គម្រោងនេះត្រូវបានលើកយកមកពិភាក្សាក្នុងជំនួបរវាងសមាគម និងលោក កិស៊ូកិ សាតូ (Keisuke Satoh) អនុប្រធានក្រុមហ៊ុន ជេ អេហ្វ អ៊ី ស៊ូជី វៀតណាម ដើម្បីស្វែងយល់ពីលទ្ធភាពវិនិយោគលើគម្រោងនេះ។ តាមផែនការ រោងចក្រកែច្នៃគ្រាប់ស្វាយចន្ទីនឹងមានសមត្ថភាពកែច្នៃគ្រាប់ស្វាយចន្ទីឆៅ ៣០.០០០តោនក្នុងមួយឆ្នាំ និងទទួលបានសំបកស្វាយចន្ទីប្រមាណ២០ ០០០តោន ក្នុងមួយឆ្នាំ […]

photo_2026-11-13_10-10-24
ទិន្នន័យកសិកម្មឆ្នាំ២០២៥ ត្រូវបានប្រកាសឱ្យប្រើសម្រាប់គាំទ្រគោលនយោបាយអភិវឌ្ឍសេដ្ឋកិច្ច និងសង្គម

ភ្នំពេញ៖ កម្ពុជាបានប្រកាសដាក់ឱ្យប្រើប្រាស់ជាផ្លូវការរបាយការណ៍អង្កេតកសិកម្មឆ្នាំ២០២៥ ដើម្បីផ្តល់ទិន្នន័យស្ថិតិសំខាន់ៗសម្រាប់គាំទ្រការរៀបចំគោលនយោបាយ និងផែនការអភិវឌ្ឍវិស័យកសិកម្ម ខណៈរបាយការណ៍នេះគ្របដណ្តប់លើការដាំដុះដំណាំ ការចិញ្ចឹមសត្វ វារីវប្បកម្ម និងការនេសាទ។ កម្ពុជាបានប្រកាសដាក់ឱ្យប្រើប្រាស់ជាផ្លូវការនូវរបាយការណ៍អង្កេតកសិកម្មកម្ពុជា ឆ្នាំ២០២៥ ដើម្បីផ្តល់ទិន្នន័យស្ថិតិដល់ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ និងអ្នកប្រើប្រាស់ផ្សេងទៀត សម្រាប់គាំទ្រការរៀបចំគោលនយោបាយ ផែនការ និងការសម្រេចចិត្តក្នុងការអភិវឌ្ឍសេដ្ឋកិច្ច និងសង្គមកម្ពុជា។ ពិធីប្រកាសនេះធ្វើឡើងនៅថ្ងៃទី១២ ខែវិច្ឆិកា ឆ្នាំ២០២៦ នៅសណ្ឋាគារភ្នំពេញ ក្រោមកិច្ចសហការរវាងវិទ្យាស្ថានជាតិស្ថិតិ នៃក្រសួងផែនការ ក្រសួងកសិកម្ម រុក្ខាប្រមាញ់ និងនេសាទ និងអង្គការស្បៀង និងកសិកម្មនៃសហប្រជាជាតិ។ ក្នុងឱកាសនោះ លោក ប៊ិន ត្រឈៃ រដ្ឋមន្ត្រីក្រសួងផែនការ បានថ្លែងថា ការប្រកាសដាក់ឱ្យប្រើប្រាស់របាយការណ៍នេះ គឺជាសមិទ្ធផលសំខាន់មួយក្នុងការលើកកម្ពស់ការប្រើប្រាស់ទិន្នន័យស្ថិតិផ្លូវការ ដើម្បីគាំទ្រការរៀបចំផែនការ និងគោលនយោបាយ ការតាមដាន និងវាយតម្លៃសមិទ្ធកម្ម ព្រមទាំងការសម្រេចចិត្តលើការអភិវឌ្ឍវិស័យកសិកម្ម និងសេដ្ឋកិច្ចជាតិ។ លោកបានបញ្ជាក់ថា របាយការណ៍នេះផ្តល់នូវទិន្នន័យសំខាន់ៗពាក់ព័ន្ធនឹងការប្រើប្រាស់ និងការគ្រប់គ្រងដីកសិកម្ម ការដាំដុះដំណាំតាមរដូវ និងដំណាំអចិន្ត្រៃយ៍ ការចិញ្ចឹមសត្វ និងបសុបក្សី វារីវប្បកម្ម និងការនេសាទ កម្លាំងពលកម្ម សកម្មភាពសេដ្ឋកិច្ចរបស់គ្រួសារកសិកម្ម ព្រមទាំងផលប៉ះពាល់ពីគ្រោះធម្មជាតិ […]

image_2026-11-13_13-25-52
ក្រុមហ៊ុនក្នុងស្រុកមួយចុះកុងត្រាជាមួយចិន ដើម្បី​ទិញ​​​ដំឡូងមីស្ងួត២០ម៉ឺនតោន នាំចេញទៅចិន

ដោយ​ ហៃ ស៊ីណា ភ្នំពេញ៖ ក្រុមហ៊ុន ហង់ ហាវ៉េស (Hang Harvest) បានចុះកុងត្រាជាមួយក្រុមហ៊ុនចិន ដើម្បីទិញដំឡូងមីស្ងួត ចំនួន២០ម៉ឺនតោន សម្រាប់នាំចេញទៅកាន់ទីផ្សារប្រទេសចិន។ លោក គឹម លាស់ ប្រធានក្រុមហ៊ុន HANG HARVEST បាន​​ឲ្យដឹងថា ក្រុមហ៊ុនបាន​​ចុះអនុស្សា​រណៈ​នៃ​ការ​យោគ​យល់គ្នា ជាមួយក្រុមហ៊ុន កូហ្វកូ បាយអូ អេនើជី (COFCO BIO-ENERGY CO., LTD) ជាជំហានទី២ នៅកំពង់ផែក្នុងទីក្រុងប៉ីហៃ នៃតំបន់​ស្វយ័​ត​ ជនជាតិជាំងក្វាងស៊ីប្រទេសចិន ដើម្បីទិញដំឡូងមី ចំនួន២០ម៉ឺនតោនពីឆ្នាំ២០២៥ ដល់ ឆ្នាំ២០២៦។​ លោកបាន​​លើកឡើងថា ​​​​កិច្ចព្រមព្រៀងនេះនឹងជួយពង្រឹង និងពង្រីកកិច្ចសហប្រតិបត្ដិការពាណិជ្ជកម្មរវាង​កម្ពុជា និងសាធារណៈរដ្ឋប្រជាមានិតចិន ក៏ដូចជាជួយជំរុញការនាំចេញ​វិស័យដំឡូងមី​របស់កម្ពុជាទៅកាន់ទីផ្សារប្រទេសចិន។ លើសពីនេះ លោកបានពន្យល់ថា ​​ចិនជាទីផ្សារដ៏ធំសម្រាប់​ដំឡូងមីកម្ពុជា ហើយ​​ក្រុមហ៊ុនបាននិងកំពុងប្រមូលទិញដំឡូងមីក្រៀមក្នុងរង្វង់២០ម៉ឺនតោនទៅកាន់ទីផ្សារប្រទេសចិនផងដែរ​​​។ ប្រទេសកម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០នៅលើពិភពលោក ជាមួយផ្ទៃដីដាំដុះប្រមាណ៦០ ទៅ៨០ម៉ឺនហិកតា។ ក្នុងរយៈពេល៨ ខែដើមឆ្នាំ២០២៦នេះ កម្ពុជាបាន​​នាំចេញដំឡូងមីក្រៀម និងចំណិតដំឡូងមីទៅកាន់ទីផ្សារចិន […]

photo_2026-11-13_10-35-01 (4)
ក្រុមអ្នកចិញ្ចឹមសត្វ គួរ​​បន្ថែមការកែច្នៃសាច់ – CDC ថានេះជាការ​បោះជំហានឆ្ពោះទៅការនាំចេញ

ដោយ​ នៅ ស៊ីវុត្ថា ភ្នំពេញ៖ មន្ត្រីជាន់ខ្ពស់ នៃក្រុមប្រឹក្សាអភិវឌ្ឍន៍កម្ពុជា បានជំរុញឱ្យអ្នកចិញ្ចឹមសត្វនៅ​កម្ពុជាកែ​ច្នៃផលិតផល ដើម្បីឈានទៅរកការនាំចេញទៅទីផ្សារអន្តរជាតិ។ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានមានប្រសាសន៍ថា សមាគមអ្នកចិញ្ចឹមសត្វកម្ពុជា គួរបន្តអភិវឌ្ឍវិស័យចិញ្ចឹមសត្វ ដោយមិនត្រឹមតែបំពេញតម្រូវការទីផ្សារក្នុងស្រុកប៉ុណ្ណោះទេ ប៉ុន្តែត្រូវពង្រឹងការកែច្នៃផលិតផល សម្រាប់ការនាំចេញផងដែរ។ ក្នុងជំនួបជាមួយនឹង​សមាគម​អ្នកចិញ្ចឹមសត្វកម្ពុជា លោក ជា វុទ្ធី បានបញ្ជាក់ថា គណៈកម្មាធិការវិនិយោគកម្ពុជា នឹងជួយ​សម្របសម្រួល និងសហការជាមួយក្រសួង-ស្ថាប័នពាក់ព័ន្ធ ដើម្បីជំរុញការអភិវឌ្ឍវិស័យចិញ្ចឹមសត្វ។ ជាការឆ្លើយតប លោក ស្រ៊ុន ពៅ បានបង្ហាញការគាំទ្រចំពោះការលើកទឹកចិត្តនេះ ហើយថា សមាគមនឹង​ត្រៀមរៀបចំកែច្នៃសាច់ ដើម្បីនាំចេញទៅកាន់ទីផ្សារបរទេស។ ជាមួយគ្នានេះលោក ស្រ៊ុន ពៅ ក៏បានលើកឡើងពីបញ្ហាប្រឈម និងសំណូមពរមួយចំនួន ដើម្បីស្វែងរកដំណោះស្រាយសមស្របសម្រាប់កសិករ​អ្នកចិញ្ចឹមសត្វ ឱ្យមានការរីកចម្រើន និងមានចីរភាព៕

កាលវិភាគផ្សព្វផ្សាយ