ភ្នំពេញ៖ ដោយមានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) លោក សួរ សុខចំរើន អនុប្រធាននាយកដ្ឋានឥណទាននៃធនាគារARDB បានចូលរួមជាវាគ្មិនក្នុងវេទិកាថ្នាក់ជាតិស្ដីពី “សុវត្ថិភាពចំណីអាហារសម្រាប់ផលិតផលសហគមន៍កសិកម្ម ដើម្បីទទួលបានលទ្ធភាពចូលទៅកាន់ទីផ្សារ” ក្រោមអធិបតីភាពលោក ប្រាក់ ជាតិថូ អគ្គនាយករងនៃអគ្គនាយកដ្ឋានក្សេត្រសាស្រ្តនៃក្រសួងកសិកម្ម រុក្ខាប្រមាញ់ និងនេសាទ។
ក្នុងពិធីក៏មានការអញ្ជើញចូលរួមពីលោកជំទាវបណ្ឌិត ឆាយគីម សុទ្ធាវី ប្រធាននាយកដ្ឋានសុខភាពសិក្សា នៃក្រសួងអប់រំ យុវជន និងកីឡា, លោក វង់ តុន មន្រ្តីគម្រោងអភិបាលកិច្ចសហភាពអឺរ៉ុប ប្រចាំកម្ពុជា និងលោក មិន សោភ័ន តំណាងប្រចាំប្រទេសអង្គការអ្នកក្សេត្រសាស្ត្រ និងពេទ្យសត្វគ្មានព្រំដែន ((Agronomes et Vétérinaires Sans Frontières – AVSF) សរុបមានអ្នកចូលរួមចំនួន៧៩នាក់ ដែលអញ្ជើញមកពីថ្នាក់ដឹកនាំក្រសួង ស្ថាប័នពាក់ព័ន្ធ វិស័យឯកជន ដៃគូអភិវឌ្ឍន៍ និងសហគមន៍កសិកម្មក្នុងតំបន់គោលដៅរបស់គម្រោង ”សហគមន៍ឆ្នើម” ដែលប្រព្រឹត្តទៅថ្ងៃទី២៧ ខែសីហា ឆ្នាំ២០២៦ នៅរាជធានីភ្នំពេញ។
វេទិកាថ្នាក់ជាតិនេះមានគោលបំណងទី១ លើកកម្ពស់ការយល់ដឹង ពង្រឹងការអនុវត្តស្តង់ដាសុវត្ថិភាពចំណីអាហារ និងស្វែងរកដំណោះស្រាយយុទ្ធសាស្ត្រក្នុងការតភ្ជាប់កសិផលសហគមន៍កសិកម្មទៅកាន់ទីផ្សារក្នុងស្រុក និងអន្តរជាតិ ប្រកបដោយភាពប្រកួតប្រជែង។
ទី២ បង្កើនការយល់ដឹង និងការយកចិត្តទុកដាក់ពីសំណាក់អាជ្ញាធរពាក់ព័ន្ធលើបញ្ហាប្រឈមរបស់សហគមន៍កសិកម្មក្នុងការបំពេញស្តង់ដាសុវត្ថិភាពចំណីអាហារ និងជំរុញឱ្យមានការសម្របសម្រួល និងការគាំទ្រផ្នែកបច្ចេកទេសផលិតកម្ម ការបញ្ជាក់គុណភាព (Certification) សម្រាប់សហគមន៍កសិកម្ម។
ទី៣ ពង្រឹងកិច្ចសហការរវាងសហគមន៍កសិកម្ម វិស័យឯកជន (ផ្សារទំនើប និងក្រុមហ៊ុនចែកចាយ) និងស្ថាប័នរដ្ឋ ដើម្បីពង្រីកច្រកទីផ្សារ។
និងទី៤ ការលើកឡើងនូវបទពិសោធន៍អនុវត្តការងារជាក់ស្ដែងរបស់សហគមន៍កសិកម្ម ការប្រែប្រួលទីផ្សារ ការផ្ដល់យោបល់ និងដំណោះស្រាយ ដើម្បីជាធាតុចូលពង្រឹងសមត្ថភាពអាជីវកម្មរបស់សហគមន៍កសិកម្មឱ្យកាន់តែប្រសើរ។
គួរបញ្ជាក់ថា វេទិកាថ្នាក់ជាតិនេះ ត្រូវបានរៀបចំឡើងក្រោមគម្រោង «សហគមន៍ឆ្នើម៖ គម្រោងពង្រឹងសមត្ថភាពអង្គការសង្គមស៊ីវិលសម្រាប់ការអភិវឌ្ឍកសិកម្មប្រកបដោយចីរភាព និងបរិយាបន្ននៅកម្ពុជា» ដែលទទួលបានការគាំទ្រថវិកាពីសហភាពអឺរ៉ុប និងអនុវត្តដោយអង្គការអ្នកក្សេត្រសាស្ត្រ និងពេទ្យសត្វគ្មានព្រំដែន សហការជាមួយសម្ព័ន្ធសហគមន៍កសិកម្មកម្ពុជា (Cambodia Agricultural Cooperative Alliance – CACA) និងអង្គការភ្នាក់ងារអភិវឌ្ឍន៍សេដ្ឋកិច្ច និងកសិកម្មជនបទ (Rural Economic and Agriculture Development Agency – READA) ដែលអនុវត្តលើតំបន់គោលដៅចំនួន១២ខេត្ត/រាជធានី រួមមាន ភ្នំពេញ តាកែវ ព្រៃវែង ស្វាយរៀង មណ្ឌលគិរី កំពង់ធំ សៀមរាប ព្រះវិហារ ឧត្តរមានជ័យ បាត់ដំបង កំពង់ឆ្នាំង និងខេត្តកំពង់ស្ពឺ ដោយផ្ដោតលើក្រុមគោលដៅអង្គការកសិករ និងសហគមន៍កសិកម្ម ។
ក្នុងឱកាសនេះដែរ លោក សួរ សុខចំរើន អនុប្រធាននាយកដ្ឋានឥណទាននៃធនាគារ ARDB បានចូលរួមចែករំលែកទស្សនទានក្នុងការអនុវត្តការងារក្នុងខ្សែច្រវាក់តម្លៃកសិកម្ម, ការរួមចំណែកអនុវត្តតាមគោលនយោបាយរបស់រាជរដ្ឋាភិបាល និងយន្ដការគាំទ្រការផ្ដល់ឥណទាន បច្ចេកទេស និងការតភ្ជាប់ទីផ្សាររបស់ធនាគារ ARDB ផងដែរ៕
