ដោយ ឡុង សារេត
បាត់ដំបង ៖ កសិករវ័យ៦៤ឆ្នាំម្នាក់ បានចាប់យកមុខរបរបង្កាត់ភ្ញាស់កូនត្រីពូជ និងជាប្រធានសហគមន៍ឧត្តមសែងត្រែង នៅភូមិទួលតាសុក ស្រុកថ្មគោល ខេត្តបាត់ដំបង បានអះអាងថា មុខរបរផលិតកូនត្រីលក់ ឬបង្កាត់ភ្ញាស់កូនត្រីពូជ គឺល្អប្រសើជាងមុខរបរធ្វើស្រែ ខណៈឆ្នាំ២០២៥ ទទួលបានប្រាក់ចំណេញសុទ្ធ២៤លានរៀល។
លោក ម៉ៅ ពេក បានឱ្យដឹងថា “សព្វថ្ងៃនេះគ្រួសារបានធ្វើស្រែចំនួនពីរហិកតាដែរ តែបើប្រៀបធៀបនិងមុខរបរផលិតកូនត្រី គឺមុខរបរផលិតកូនត្រីល្អជាងការធ្វើស្រែ។ សម្រាប់កូនត្រីយើងចាប់ផ្តើមបង្កាត់ភ្ញាស់ពីខែមីនា ដល់ខែមេសា និងខែឧសភា យើងអាចមានកូនត្រីសម្រាប់លក់ទទួលបានចំណូលបណ្តើរៗ។ តែបើធ្វើស្រែ យើងធ្វើពីរដង គឺយើងទទួលបានផលតែពីរដង ហើយការចំណាយម្តងៗអស់លុយច្រើន។ តួយ៉ាងរដូវកាលធ្វើស្រែកន្លងទៅនេះ សម្រាប់អ្នកខ្លះ គ្រាន់តែទូទាត់ទៅលើថ្លៃច្រូត ថ្លៃភ្ជួរ និងចំណាយផ្សេងៗអត់គ្រប់” ។
លោក ម៉ៅ ពេក បានចាប់ផ្តើមប្រកបមុខរបរបង្កាត់ភ្ញាស់កូនត្រីពូជ សម្រាប់ផ្គត់ផ្គង់ទៅលើទីផ្សារក្នុងស្រុក នៅឆ្នាំ២០១១ រហូតមកដល់ឆ្នាំ២០២៦នេះ មានស្រះត្រី១៩ស្រះ។ ដោយមើលឃើញពីមុខរបរបង្កាត់ភ្ញាស់បានប្រាក់ចំណូលខ្ពស់ជាងការធ្វើស្រែជាងពីរហិកតា កាលពីខែមេសាកន្លងទៅនេះ លោកបានជីកស្រះ ចំនួនប្រាំពីរស្រះទៀត ដោយរំពឹងថា ទទួលបានប្រាក់ចំណេញសុទ្ធចំនួន៤០លានរៀល។
លោកបានឱ្យដឹងទៀតថា ក្រោយពីជីកស្រះបន្ថែមរួចហើយ ក្នុងនាមជាអ្នកជំនាញ លោកត្រៀមចាប់ផ្តើមបង្ហាត់បង្រៀកូនពៅ ឱ្យចេះបង្កាត់ភ្ញាស់កូនត្រី អំពីការថែទាំកូនត្រីពូជ ពិសេសចង់ឱ្យកូនចេះធ្វើទីផ្សារឱ្យបានធំទូលំទូលាយជាងពេលបច្ចុប្បន្ន ។
សិ្ថតក្នុងវ័យ៦៤ឆ្នាំ លោក ម៉ៅ ពេក មានកូនប្រុសស្រីសរុបប្រាំបីនាក់ និងមានបទពិសោធន៍បង្កាត់ភ្ញាស់កូនត្រីពូជអស់រយៈពេលជាច្រើនឆ្នាំ ដោយមិនបារម្ភអំពីទីផ្សារប៉ុន្មាននោះទេ ព្រោះមានម៉ូយចាំទទួលទិញកូនត្រីទាំងនៅក្នុងខេត្ត និងក្រៅខេត្ត ខណៈលោកផលិតកូនត្រីពូជមានត្រីទីឡាព្យា ត្រីអណ្តែង និងត្រីក្រាញ់ ។
លោកបានបន្តថា ក្នុងការបង្កាត់ភ្ញាស់កូនត្រីពូជ ឆ្នាំ២០២៥ លោកផលិតបានត្រីទីឡាព្យាចម្រុះភេទ ជាង១៨ម៉ឺនកូន ដោយឡែកត្រីទីឡាព្យាឈ្មោល បានជាង១៣ម៉ឺនកូន ត្រីក្រាញ់បាន៦០ ០០០កូន ត្រីអណ្តែងបានជាង៨០ ០០០កូន ។ សរុបប្រាក់ចំណូលសរុបបាន៣៨លានរៀល ក្រោយកាត់ចំណាយ បានប្រាក់ចំណេញប្រមាណ២៤លានរៀល៕
