ឈីកាហ្គោ៖ ក្រុមហ៊ុនថៃសាន់ហ្វូដស៍ (Tyson Foods) ដ៏ល្បីល្បាញរបស់សហរដ្ឋអាម៉េរិក បានប្រកាសកាលពីថ្ងៃទី១៣ ខែសីហា ឆ្នាំ២០២៦ថា ខ្លួននឹងបិទ ឬលក់ទីតាំងរោងចក្រកែច្នៃសាច់គោ និងវេចខ្ចប់ចំនួន៣កន្លែង ដែលធ្វើឱ្យសកម្មភាពអាជីវកម្មសាច់គោរបស់ក្រុមហ៊ុនកាន់តែរួមតូច ដោយសារខ្វះខាតគោនៅក្នុងសហរដ្ឋអាម៉េរិក។
ក្រុមហ៊ុនកែច្នៃសាច់ដ៏ធំបំផុតរបស់អាម៉េរិកនេះ បានជួបវិបត្តិកាន់តែធ្ងន់ធ្ងរមិន និងកំពុងរងការខាតបង់កាន់តែច្រើនឡើងៗ ដូច្នេះ ទើបក្រុមហ៊ុនសម្រេចបញ្ចប់ប្រតិបត្តិការនៅតាមរោងចក្រសាច់គោ ក្នុងរដ្ឋអីល្លីណយ (Illinois) និងរោងចក្រកែច្នៃវេចខ្ចប់សាច់នៅក្នុងរដ្ឋអ៊ូតាស (Utah) ហើយនឹងស្វែងរកអ្នកទិញរោងចក្រសាច់គោមួយទៀតនៅរដ្ឋវ៉ាស៊ីងតោន។
ក្រុមហ៊ុនបាននិយាយថា ខ្លួននឹងផ្ទេរសមត្ថភាពកែច្នៃពីទីតាំងទាំងនេះទៅកាន់រោងចក្រផ្សេងទៀត ហើយនឹងផ្តោតអាជីវកម្មសាច់គោនៅក្បែរៗរោងចក្រនៅរដ្ឋកានសាស់ (Kansas) និងរដ្ឋតិចសាស់ (Texas)។
ការបិទរោងចក្រទាំងនេះ គឺជាសញ្ញាចុងក្រោយមួយបង្ហាញពីបញ្ហាក្នុងវិស័យកែច្នៃសាច់របស់សហរដ្ឋអាម៉េរិកកំពុងជួបប្រទះ ខណៈបច្ចុប្បន្នវិស័យនេះកំពុងប្រឈមនឹងការផ្គត់ផ្គង់គោធ្លាក់ចុះដល់កម្រិតទាបបំផុតក្នុងរយៈពេល៧៥ឆ្នាំកន្លងមកនេះ។
ក្រុមហ៊ុនកែច្នៃសាច់នៅអាម៉េរិកបានបន្តខាតបង់ប្រាក់ពីអាជីវកម្មសាច់គោរបស់ខ្លួន ដោយសារតែតម្លៃគោកើនឡើងលឿន ជាពិសេសតម្លៃសាច់ស្ទេក និងសាច់គោកិន។
តម្លៃហ៊ុនរបស់ក្រុមហ៊ុនថៃសាន់ហ្វូដស៍ ក៏បានជួបការលំបាកចាប់តាំងពីការងើបឡើងវិញ ក្រោយវិបត្តិកូវីដ-១៩ នៅពាក់កណ្តាលឆ្នាំ២០២២។ ក្នុងរយៈពេល៥ឆ្នាំចុងក្រោយនេះតម្លៃហ៊ុនបានធ្លាក់ចុះជិត៣០ភាគរយ។
ក្រុមហ៊ុនបាននិយាយក្នុងសេចក្តីថ្លែងការណ៍ថា ខ្លួនកំពុងព្យាយាម «បង្កើតបណ្តាញរោងចក្រ ដែលមានសមត្ថភាពប្រកួតប្រជែងកាន់តែខ្លាំង» នៅក្នុងស្ថានភាពប្រទេសកំពុងជួបការខ្វះខាតគោដ៏ធ្ងន់ធ្ងរបំផុតមួយក្នុងប្រវត្តិសាស្ត្រ។
កាលពីថ្ងៃទី១៣ ខែសីហា ក្រុមហ៊ុនបានបដិសេធមិនប្រាប់ថា តើកម្មករចំនួនប៉ុន្មាននាក់នឹងរងផលប៉ះពាល់ពីការបិទរោងចក្រទាំងនេះទេ ហើយរោងចក្រទាំងនោះអាចបន្តកែច្នៃសាច់គោចំនួនប៉ុន្មានក្បាលឡើយ។ ក្រុមហ៊ុនបាននិយាយថា ការផ្លាស់ប្តូរផលិតកម្មទៅតាមរោងចក្រ ដែលនៅសល់អាចធ្វើឱ្យក្រុមហ៊ុនរក្សាបរិមាណនៃការសម្លាប់គោប្រហាក់ប្រហែលគ្នាដដែល ប៉ុន្តែត្រូវធ្វើតាមរយៈបណ្តាញរោងចក្រឱ្យមានប្រសិទ្ធភាពជាងមុន។
ការរៀបចំរចនាសម្ព័ន្ធថ្មីនេះ កើតឡើងបន្ទាប់ពីក្រុមហ៊ុនបានបិទរោងចក្រសាច់គោដ៏ធំរបស់ខ្លួននៅរដ្ឋណេប្រាស្កា (Nebraska) កាលពីខែមករា ឆ្នាំ២០២៦នេះ។ តាមការប៉ាន់ស្មានរបស់វិស័យឧស្សាហកម្ម រោងចក្រនោះមានកម្មករប្រមាណ៣ ២០០នាក់ ហើយអាចកែច្នៃគោបានប្រមាណ៥ ០០០ក្បាលក្នុងមួយថ្ងៃ។ ព្រមជាមួយគ្នានេះដែរ ក្រុមហ៊ុនក៏បានកាត់បន្ថយប្រតិបត្តិការនៅរោងចក្រក្នុងរដ្ឋតិចសាស់ មកនៅត្រឹមមួយវេនប៉ុណ្ណោះ ដែលប៉ះពាល់ដល់កម្មករប្រមាណ១ ៧០០នាក់ ត្រូវបាត់បង់ការងារ។
ក្រុមហ៊ុនបាននិយាយទៀតថា ខ្លួនមានផែនការបង្កើនផលិតកម្មវេនទីពីរ នៅក្នុងរដ្ឋតិចសាស់ឡើងវិញ «នៅពេលផ្គត់ផ្គង់គោគ្រប់គ្រាន់ឡើងវិញ»។
ក្រុមហ៊ុនក៏បាននិយាយថា ខ្លួននឹងធ្វើការជាមួយកម្មករ ដែលរងផលប៉ះពាល់នៅក្នុងរដ្ឋអីល្លីណយ រដ្ឋអ៊ូតាស និងរដ្ឋវ៉ាសីងតោន ដោយឱ្យពួកគេដាក់ពាក្យសុំការងារថ្មីនៅតាមរោងចក្រផ្សេងទៀត។
ចំណែកលោកស្នងការកសិកម្មនៅរដ្ឋតិចសាស់ បាននិយាយក្នុងសេចក្តីថ្លែងការណ៍ចំពោះការសម្រេចចិត្តរបស់ថៃសាន់ថា
«យើងកំពុងឆ្លងកាត់ការខ្វះខាតគោដ៏ធ្ងន់ធ្ងរបំផុតមួយក្នុងប្រវត្តិសាស្ត្ររបស់ប្រទេសយើង ហើយឥឡូវនេះ យើងកំពុងជួបផលវិបាកកាន់តែច្រើននៅក្នុងខ្សែសង្វាក់ផ្គត់ផ្គង់សាច់គោ»។
យោងតាមអ្នកទិញគោ បានឱ្យដឹងថា ការបិទរោងចក្រអាចធ្វើឱ្យតម្លៃគោនៅតាមតំបន់មួយចំនួនរងផលប៉ះពាល់ ដោយសារមានអ្នកប្រកួតប្រជែងដេញថ្លៃទិញគោមានចំនួនតិចជាងមុន។
លោកបាននិយាយថា«ប៉ុន្តែនៅកម្រិតទូទាំងប្រទេស ខ្ញុំមិនគិតថា វានឹងធ្វើឱ្យតម្លៃគោមានការប្រែប្រួលខ្លាំងទេ ព្រោះទីតាំងត្រូវបិទទាំងនោះ មិនមែនជាតំបន់ ដែលមានការប្រមូលផ្តុំគោក្នុងបរិមាណច្រើននោះឡើយ»។
កាលពីថ្ងៃទី៣ ខែសីហា ឆ្នាំ២០២៦នេះ ក្រុមហ៊ុនថៃសាន់ ហ្វូដស៍ បានព្រមានថា ការខាតបង់ពីអាជីវកម្មសាច់គោនឹងកាន់តែធ្ងន់ឡើង ដោយសារការផ្គត់ផ្គង់គោមានកម្រិតទាបពេក ដែលធ្វើឱ្យថ្លៃគោនៅតែខ្ពស់។
ចំណែកសម្រាប់ឆ្នាំសារពើពន្ធ២០២៦ ក្រុមហ៊ុនបានព្យាករណ៍ថា អាជីវកម្មសាច់គោនឹងខាតបង់ចន្លោះពី៥០០លានដុល្លារ ទៅ៦៥០លានដុល្លារ ខណៈការព្យាករណ៍លើកមុន អាចខាតបង់ត្រឹម៣៥០លានដុល្លារ ទៅ៥០០លានដុល្លារ៕ (ផាន់ អាណា)
